¹ Ona, yentse matsasa yaDjeriko yikhadavaliwa nathangwe lamasodja ya Iziraeli. Hapalibe akhabuda, kana kupinda. ² Yehweh adalanga kuna Djochuwa: "Uya! Ona kuti Ine ndikupase mumanjamwako Djeriko, maambo watche na masodja yatche. ³ Imwe mutchadzafamba nalentse luwani, wentse mwamuna wankhondo, mutchirizungulira kabodzi pantsiku. Itani izvi pantsiku zitanhatu. ⁴ Wanyantsembe wanomwe watchadzatora mitoliro minomwe za nyanga yabhira pamberi pa Areka. Pantsiku yatchinomwe, dzafambeni mukhundu mwa luwani kanomwe, ese wanyantsembe tolopito nantsimba. ⁵ Napenepo, iwo wanadzaliza tolopito za mabhira nguwa ikulu, futi, pawo wanabva dhungu la mitoliro, yenste mbumba inadzakhuwa kukulu, ese matsose ya luwani yanadzagwa. Masodja yanadzadikana kuphaya, pamunhu, kumberi kwa mbuto yatche alipo". ⁶ Napenepo, Djochuwa, mwana wa Numi, adadaidza wanyantsembe ese adawabvunza: "Torani Areka ya Lubatano, ese wanyantsembe wanomwe watchadzadzusa tolopito zinomwe za bhira pamberi pa Areka ya Yahweh". ⁷ Futi iye adalanga kuna mbumba: "Endani kumberi ese fambani mukundu mwa luwani, ese wamuna wankhondo wanadzaenda kumberi kwa Areka ya Yahweh". ⁸ Dyali ninga Djochuwa akhadabvunza mbumba, wanyansembe wanomwe wakhadzusa mitoliro minomwe za nyanga ya bhira pamberi pa Yahweh. Pawo iwo wakhaenda kumberi, wakhaliza tolopito zawo. Areka ya Lubatano ya Yahweh ikhatewera kumasure kwawo. ⁹ Wamuna wanyankhondo wakhafamba pamberi pa wanyantsembe, futi iwo wakhaliza mitoliro yawo. Wakumasure wakhatewara kumberi kwa Areka, ese wanyantsembe wakalambirira watchiliza. ¹⁰ Apo Djochuwa adabvunza mbumba: "Imwe hamusa khuwe. Hapalibe dhungu linadzbuda pamulomo panu kuswikira ntsiku yangu ine ndinadzalanga kuti khuwani; napenepo dzakhuweni". ¹¹ Napenepo, iye adaita kuti Areka izungulire luwani kabodzi pantsiku. Ese wadapinda mumisasa mwawo ese nausiku wadagona penepo. ¹² Mangwanayatche, adamuka nakumatchibese, ese wanyantsembe wadatola Areka ya Yahweh. ¹³ Wanyantsembe wanomwe kuti wakhadadzusa mitoliro minomwe za nyanga ya bhira pamberi pa Areka ya Yahweh, wakhaenderera watchifamba futi watchiliza mitoliro. Masodja yankhondo yakhafamba kumberi kwawo. Wakumasure wakhafamba kumberi kwa Areka ya Yahweh, matolopito yakhalamba yatchikha. ¹⁴ Iwo wadafamba mukhundu mwa luwani kabodzi pantsiku yatchiwiri, ese wadahirira pamusasa. Iwo wadaita izvi pantsiku zitanhatu. ¹⁵ Pantsiku yatchinomwe, iwo wadamuka pakuetcha kwa ntsiku, ese wadafamba mukhundu mwa luwani zvibodzi bodzizvo ninga zvawo wadaita kumasureku. Ulendo huno, nazvinezvi, kanomwe. ¹⁶ Katchinomwe wanyantsembe wadaungisa mitoliro, Djochuwa adabvunza kuna mbumba: "Khuwani! Thangwe Yahweh akupasani luwani! ¹⁷ Luwani na zventse zvirimwenemo zvitchadza tongiwa, kufudziwa, na Yahweh. Basi yega Rakabi, tchikwachura, anadzalalama __ iye na wenewale watche anawo pamui watche __ thangwe adaswisa wamuna wathu tidatuma. ¹⁸ Kwa imwe, koyani zvinhu zvidasiyana na kufudziwa, ese, pakupeza kuwatonga, hamusa bhate mubodzi wawo. Mungati imwe mutchizviita, munadzagala wakunyangala pamusasa ya Iziraeli, mutchiwawisira kufudza. ¹⁹ Yentse siriva, golide na zvinhu zvidaitiwa na ndarira futi na simbi nswakutchenesiwa na Yahweh, zvinadzadikana kwendesiwa kuna upfumi Watche". ²⁰ Pawo wanyantsembe wadaliza mitoliro, mbumba yidakhuwa nantsimba ese tsose lidafudzika. Napenepo, mbumba idapinda mu luwani, pamunhu ege ega adathamangira mbuto yakumberi kwatche, ese wadatola luwani. ²¹ Iwo wadalifudza lentse, na bemha, zventse zvikhali mwenemo: mwamuna na mukadzi, djaha na musee, n'gombe, bhira na donki. ²² Napenepo, Djochuwa adalanga kuna wamuna wairi kuti wadaita ukapirikoni pn dziko: "Endani kumui watchikwachura. Uyisani mukadziyo na wentse watchw anawo iye, ninga zvako udadhumbira". ²³ Wakapirikoni wadaenda ese wadawisa Rakabi kunza, na baba watche, mai watche, wabale watche na lenste dhungwe kuti likhana iye. Iwo wadawatola wadaenda nawo mbuto yakunza na musasa wa Iziraeli. ²⁴ Ese wadapitsa luwani na zventse zvikhali mwenemo. Yoga siriva, golidi na mudziyo ya ndarira na simbi zvidaigiwa munyumba yaupfumi wa Yahweh. ²⁵ Apo Djochuwa adakoya upenyu wa Rakabi, tchikwachura, nyumba yababache, na wentse kuti wakhalalama na iye. Ese iye alikulalama mu Iziraeli kuswika ntsiku yanyamuntsi, thangwe iye adakoya wamuna kuti Djochuwa adatuma waite ukapirikoni ku Djeriko. ²⁶ Napenepo, Djochuwa adawabvunza kuti, panguwa yeneyo, waite tchidhumbiro tchibodzi, watchilanga: "Wakunyangala ngagale pamberi pa Yahweh mwamuna analonza luwani iri, Djeriko. Na bhuwe la dhangwe watche anadzalonza, ese na bhuwe la mwana wakupezesera iye anadzamusa matsasa yatche". ²⁷ Nadyali Yahweh akhaana Djochuwa, ese mutungulira watche udamwazika na dziko.