¹ Djochuwa akhadakula maningi patche Yahweh adamuti: "Iwe wakula maningi, apo akutchalibe madziko kuti utonge. ² Iri ndiro dziko kuti ndiro lasara: wentse mutunhu wamafilistia na wentse mutunhu wamagezurewu; ³ kubudira Siori, kuti alikukhundu lamabudira dzuwa kwa Djipita, ese kudzaulu kuswikira malire na Ekromi, kuti ndiro linakhakhodziwa nhaka ya kananewu; watongi wachanu wafilistia: waku Gaza, waku Asdodi, waku Askelomi, waku Gati na waku Ekromi-- dziko lawa avewu. ⁴ Kunyantsi, yatchidasara yentse madziko yawa kananewu, kubudira Meara, njawa sidoni, kuswikira Afeka, kumarire nawa amorrewu; ⁵ zvamuche ninga dziko lawa gebalita na yentse Libano; kumabudiradzuwa, kubudira Baal-Gade, munyantsi mwa bango Hermomi kuswikira Lebo-Hamate; ⁶ basi, wentse wagali wakumutunhu wamabango kubudira Libano kuswikira Misirefote-Maimi, kukhanhiza na yentse mbumba yaSidomi. Ine ndinadzawabudisa pamberi pamasodja yaIziraeli. Zvibvumire kugowanisa dziko laIziraeli, ninga nhaka, ninga zvangu ndidakubvunza. ⁷ Adagowanisa dziko iri ninga nhaka kuna mipfemba minomwe ese nahafu yamutupo waManase". ⁸ Na hafu yamutupo waManase, warubenita na wagadita nanga waditambira nhaka yawo kuti Mozisi adapasa iwo, kukhundu lakumabudira dzuwa laDjorodani, ⁹ kubudira Aroweri, kuti ali mumherera mwamukolonga wamukulo waArnomi (kukhanhiza na luwani kuti liri pakati pamukolonga), naentse nhuda yaMedeba kuswikira Dibom, ¹⁰ Yentse maluwani yaSiomi, wamambo wa amorewu, kuti wadatonga kuHesbomi, kuswikira malire nawa amonita; ¹¹ futi Gileade, mutunhu wagesurewu na makatewu, lentse bango laHermomi, yentse bazani kuswikira Salika; ¹² lentse dziko la Ogue, kuBazani, kudatonga Astoreti na Edrei __ awa ndiwo wadasara wa refainzi __ kuti Mozisi adakunda ese atchithamangisa. ¹³ Apo mbumba yaIziraeli halibe kuthamangisa wagesurewu ne wamakatewu. Kunza kwa izvi, iwo walikulalama pakati paIziraeli kuswikira ntsiku yanyamuntsi. ¹⁴ Woga mutupo waLevi kuti Mozisi halibe kuupasa nhaka. Zvakufupira wakupitsiwa kuna Yahweh, Mulungu waIziraeli, ndizvo nhaka yatche, ninga Mulungu adalanda kuna Mozisi. ¹⁵ Mozisi adapasa nhaka ibodzi kunutupo waRubeni, ninga zvinaenderana dzinza lawo. ¹⁶ Dziko lawo likaerengiwa kubudira Aroweri, kuti liri mumherera mwa mukulo waArnomi, luwani kuti liri pakati pamukolonga, na yentse nhunda kuswikira Medeba; ¹⁷ Rubeni adatambirawo basi Hesibomi, na yentse maluwani kuti yalipanhunda: Dibomi, Bamote-Baal, Bete-Baali-Meomi, ¹⁸ Djaza, Kedemote, Mafate, ¹⁹ Kiriataimi, Sibma na Zerete-Sar, pabango lapamukolonga; ²⁰ Rubeni adatambira, basiwo, Bete Power, mumherera labango Pisiga na Bete-Djezimote; ²¹ yentse maluwani yapanhunda na yentse madziko yaSiomi, mambo waamorewu, kuti adatonga hesibomi, kuti Mozisi adakunda pabodzi nawanyakwawa waMidiani, Evi, Rekemi, Zuri, na Reba, wanyakwaw waSiomi, kuti wakhada lalama padziko. ²² Mbumba yaIziraeli idaulayawo basi, na mabemha, Balaawu,mwan waBoeri, kuti akhaita zvakubvumbira, pakati pawenewale kuti iwo wadaulaya. ²³ Malire yamutupo waRubeni ndi mukulo waDjorodani. Iyi ndiyo nhaka yamutupo warubeni, idapasiwa pafamilha iyogayioga, kukhanhiza na maluwani yawo na mitunhu. ²⁴ Mozisi adapasa ninga nhaka mutupo wagade, zvinaenderana na dzinza latche: ²⁵ dziko laDjazer, yentse maluwani yaGileade, kukhanhiza na hafu ladziko lawaamonita, kuswikira Arower, kuti alikumabudira dzuwa kwa Rabani; ²⁶ kubudira Hesibomi kuswikira Rama-Misipa na Betonimi, kubudira Manaimi kuswikira mutunhu waDebir. ²⁷ Mumukolonga, mubodzibodzimo, Mozisi Mozisi adawapasa Bete-Arani, Bete-Ninra, Sukote na Zafomi, unangoho utongi waSiomi, mambo waHesibomi, utchigala mukulo waDjorodani ninga malire, kuswikira kumhera kwa Bala Kinerete, kukhundu lakumadokera laDjorodani. ²⁸ Iyi ndiyo nhaka yamutupoi waGade, zvinaenderana na dzinza latche, kukhanhiza maluwani yatche na mitunhu. ²⁹ Hafu yamutupoi waManase, Mozisi adapasa nhaka yakuguwanisaiwa zvinapindirana namadzinza yawo. ³⁰ Dziko latche likhaerengiwa kubudira Manai, yentse Bazani, wentse utongi waOgue, mambo waBazani, na entse mbumba yaDjair, kuti liri kuBazani, makhumi matanhatu lentse; ³¹ ese hafu laGileade, Astorete na Edrei (maluwani yadziko laOgue, kuBazani). Iyi ndiyo nhaka kuti idagowanisiwa familha zadzinza laMakiri, mwana waManase, Izvi ndizvo, hafu yambumba yaMakiri. ³² Iyi ndiyo nhaka kuti Mozisi adagawanisa muthambe laMoabe, ku'ngambu yaDjorodani, kumabudira dzuwa yaDjeriko. ³³ Mozisi halibe kupasa nhaka kudzinza laLevi. Yahweh, Mulungu waIziraeli, ndiyo nhaka yatche, ninga zvatche akhadawabvunza.