¹ Onani, awa ndiwo wamabo wapadziko, wakuti wamuna waIziraeli wadakunda. Wa Iziraeli wadatora madziko yakukhundu kwa Djorodani, kukhundu lamabudiradziwa, kubudira kumukolonga wamukulo waArnomi kuswikira kubango laHermomi, naentse Araba yakumabudiradzuwa: ² Siomi, mambo waamorewu kuti akhalalamira kuHesibomi, akhatonga kubudira Aroweri, kuti alipaduze nakhulo laArnomi, futi kubudira pakati pakhulo la, ese napakati paGileade, kuswikira mukulo waDjaboke, namalire ya amonita; ³ Siomi akhatongawo basi Araba wakumadokera dzuwa, kuswikira kubala laKinerete, futi kubala laAraba (bala la munyu), pabodzi na njira iya Bete-Jezibote; na, kunyantsi, wakhaswika mumherera mwaBango laPiziga. ⁴ Ogue, mambo waBazani, akhali muwonereri warefainisi, kuti akhalalama kuAstarote na kuEderei. ⁵ Iye akhatonga bango laHermomi, Salka, naentse Bazani, kuswikira kumalire kwa gesurewu na wamaakatewu, nahafu yagiliade, kuswikira kumalire, kwaSiomi, mambo waHesbomi. ⁶ Mozisi, nyamubasa wa Yahweh, ese mbumba yaIziraeli idawakunda; ese Mozisi, nyamubasa waYahweh, adafudza dziko ninga upfumi pakati pawarubinita, wagadita, na hafu-mutupo waManase. ⁷ Awa ndiwo wamabo wadziko kuti Djochuwa na mbumba iya Iziraeli wadakunda, kukhundu kwa kumadokeradzuwa kwaDjorodani, kubudira Baal-Gade, pamukolonga paduze naLibano, kuswira kubango Halake paduze na Edomi. Djochuwa adapasa dziko kumutupo waIziraeli kuti watonge. ⁸ Adawapasa mukunhu wamabango, muthambe, murusare na Neguebe: dziko lawa hetewu, amorewu, kananewu, perizewu, hevewu nalawa jebuzewu. ⁹ Wamambo kuti wadakundiwa ndiwo awa: mambo waDjeriko, mambo waAi, kuti alikukhundu kwa Beteli, ¹⁰ mambo waDjerusalema, mambo waHebromi, ¹¹ mambo waDjarmute, mambo waLakisi, ¹² mambo waEglomi, mambo waGezeri, ^{13 16} mambo waDebiri, mambo na waGederi, mambo waHorma, mambo waArade, ¹⁵ mambo waLibna, na mambo waAdulawu, ¹⁴ mambo waMakeda, mambo waBeteli, ¹⁷ mambo waTapuwa, mambo waHeferi, ¹⁸ mambo waAfeke, mambo waLasaromi, ¹⁹ mambo waMadomi, mambo waHazor, ²⁰ mambo waSinrom-Meromi, mambo waAksafe, ²¹ mambo waTaanake, mambo waMegido, ²² mambo waKedisi, mambo waJokneawu waKarmelo, ²³ mambo waDori, munyumba mwaDori, mambo waGoimi, kuGilgal, ²⁴ na mambo waTirza. Wentse, makhumi matatu namubodzi wamambo.