¹ Injene tuu asonan Ananias, nana bingea i Safira, mameet sabidang tana'a, ² duit aselan dauna' sabagi (dakatoang bo kole' bingea), yang sabagiin dawa bo barik dajejenang ijoloa kaia rasul-rasulan. ³ Tapi i Petrusan bada. "Ananias, aika manun Iblisan mamano'i ate nuun pandenko abarek jo Roh Kudusan nana manaan sabagi asel tana' yang ipeetan ingko? ⁴ Injuanpi da'angan ipeet, boan de'naan tana' nu bo? Barik mamin ipeetan, boan de'naan jo lalam kuasanuun bo? Aika manuun mamikirang jau kateninanko jo ate nuun? Injuko makannakan jo mintuariin, tapi makannakanko jo Alatalaan. ⁵ Mamin mandalinga kada iniin, Ananiasan adato' laloang mate. Dabarikan samua tuu yang mandalingaan nande' baka taut. ⁶ Barik moondok ara anak baruun naan mambalun joaan, barikan dawa maruan manguburang joaan. ⁷ Injenna mo'tae' talung jam, moondok bingeaan, injupi matoang aika yang terjadiin. ⁸ I Petrusan bada joaan, " Padaanga joku'un tana' yang ipeetan ingko kateninna raga'an. " Bibingeen naan bada, " Ii, katenaanna." ⁹ Dabarikan i Petrusan bada jooan, " Aisi manun jooninan duaan bapakatankin makoi Roh Tuhan? Belena, bas kaia ara yang mamin manguburangan jo lainuun injenna jo katombangannan, ari naan mo' busi yang mananggungan jonuun maruan." ¹⁰ Bibingeen naan araba' laloang malampusang nyawa'a, mintama'a ara anak baruun naan dakita bibingeen naan mate; bibingeen naan dawa maruan barik dakuburang biringa laiaan. ¹¹ Dabarikan samua jemaatan naan baka taut, nana samua tuu yang mandalinga inaan. ¹² Ambatna tanda nana mujizatan yang terjadiin jo intara tuu'un malaloi tangana ara rasulan naan. Ari naan sikapulung mansen jo Serambi Salomoon. ¹³ Tapi dampe sera tuu barani simalo' nana ari naan; tapi, tuu'un hormat jo ari naan. ¹⁴ Katenanna lele' ambat tuu parasayaan jo Tuhanan, mam baba mam bibinge, ¹⁵ katenan busi ari naan dawa tuu kapaisannan jo dalanan barik dapagoleng jo ambat koson tindo'on, manto' saat laloa i Petrusan, ayongan kana' jo ari naan. ¹⁶ Injene busi tuu dari ambat kotaan biring Yerusaleman mondok siarak-arak, mawa tuu kapaisan nana tuu darasuki sumangat-sumangat baraat, barik maam mansennana ari naan de'. ¹⁷ Tapi Imam Raa'an mondok, siarak-arak nana tuu yang tambaan nanna (yaitu sekte Saduki); ari naan muna' ate baraat ¹⁸ barik datingkama ara rasulan dapintama jo lalam penjara tuu ambatan. ¹⁹ Jo aso malaman mondok sera malaikat Tuhanan mambuka'ang katombangan penjara ari naan laloang dawa'ana maruan, kada'an, " Tangkatnain, kadengain jo Langko Alatala ²⁰ barik badanain saraa-raa tuu mangana'i Firman Tio'on naan." ²¹ Saat mandalinga ni'in, kukukoan ari naan mintama jo Langko Alatalaan to' maajar. Tapi mondoka Imam Raa'an, injene busi tuu tamba nanna, barik mangalong jo anggota Dewan Agamaan, nana samua toa-toa Israel, barik dautus lamba' jo penjaraan mala jo ara rasulan naan. ²² Tapi ara yang dasuro" tangkatan naan inju manduang jo ara inaan lalam penjaraan, barik mole' balik malapor, ²³ " Mitakam penjaraan naan takunci nana ambat penjaga'a kadeng jo katombanganan, tapi waktu ibuka'an ingkam katombanganan, dampe sera tuu ilalaman. ²⁴ Waktu Kapala' Langko Alatalaan nana ara Imam kapala'an mandalinga inaan, ari naan tangkarado'an mangana'i yang terjadiin jo ara rasulan. ²⁵ Dabarikan mondok sera mintuari yang badaan jo ari naan, " Tuu yang ipenjaraan ingkin injene kadeng jo Langko Alatalaan majar tuu ambat. ²⁶ Dabarikan Kapala' Langk Alatalaan nana ara yang batugasan tangkat mala balik jo ara rasulan de' naan, tapi inju nana kekerasanan, ataut busi ando'on daparaat nana batuun kole' tuu ambatan. ²⁷ Mamin poang dawa, ara rasulan naan dapanyorongang jo ijoloa anggota dewanan. Imam Raa'an mananya' jo araa rasulan, ²⁸ kada'an, " Ingkaman maminnam majariang joninan majar lalam ason niin, tapi ingkoon, ipano'i ingkin Yerusaleman nana jalu yang iajarangan ingkin, barik ingkamma yang mananggung dara' tuu'un niin. ²⁹ Tapi i Petrusan nana i Yohanes manyuut, " Ingki'in haruski' labi mana'ati Alatala daripada mintuariin. ³⁰ Alatala ara tamatoa jolonaman mamin matio' balik jo Yesusan, yang iduno'on ingkin, nana manggantung jooan jo kayu salipan. ³¹ Alatala yang palangkeen jooan jo katooan barik dapadari Pamimpin nana pawa salamatan, mameang pertobatan jo urang Israelan, nana mampuni ambata dosaan. ³² Ingkamma saksi dari ambata ni'in, katenan busi Roh Kudusan, yang dapandeangan kole' Alatala jo tuu yang mana'atiin jooan. ³³ Saat ara anggota dewanan mandalinga ni'in, ari naan rarasi barik to' muno' jo ara rasulan. ³⁴ Tapi injen sera Urang Farisi asonan Gamaliel, iyaan de' naan guru Taurat, yang dahormati tuu'un, iyaan kadeng manyuro' mawa maruan jo ara rasulan naan samentara waktu. ³⁵ Dabarikan iyaan bada jo ari naan, " O Urang Israel, paratina jo ingkiin mam-mam aika yang to' ikalakonan ingkin jo tuu'un niin. ³⁶ Joloa inaan, i Tadeusan kadeng mambu'i diri'an boan tuu sambarang, nana sakitar ampat ratus mintuari,yang malola'an joan. Iyaan kana' uno', barik ambat tuu yang malola'an joan akaus tambor-ambor nana injuun manduang aika-ika. ³⁷ Mamin tuu'un naan, maruan i Yudasan urang Galilea jo aso sensus suang banua nana mawa tuu ibalangan. Iyaan mate busi, barik ara yang malola'an jooan tambor-ambor. ³⁸ Kateniinan iyakan to' bada'ak jonuun, jo'ina ambat tuu'un niin bua'kaleana ari naan kadiri', sebab bila rencana niin atau karaja niin dari mintuariin, naan mo' isabeang. ³⁹ Tapi bila jaluun naan dari Alatala, injukin dapat manaloang jo ara inaan; barik mo' baru'nain sadar kalau ingkinan malawan jo Alatalaan." barik ari naan parasaya'. ⁴⁰ Mamin naan dakalong ara rasulan naan mintama, dababania ari naan barik daparinta'api inju pande bada lalam asona Yesusan, baru' dasuro' sansang. ⁴¹ mamin naan ara rasulan tangkat dari aroa ara anggota Dewan Agamaan nana susua nyawa'an pandenna tio' kapaisan kole'a Ason inaan. ⁴² Mamin kajadian naan, tiap aso, jo lalam langko Alatalaan barik jo saraa-raa langko tuu'un, ari naan majar ulu'-ulu' mandongoang jo Yesusan sebagai Kristus.