¹ Ara babaa yang mondok dari Yudeaan, majar jo ara saurun yang saimannan, bada jo ara inaan "apabila ingkinnan injukin i sunat sadalan nana adat istiadat ta i Musaan, ingkinnan injukin dapat i salamatang. " ² i Paulus nana i Barnabas dawa pakara nana sut baba' yang araan kole'a ara inaan, ahirraan samua tu yang injenan mamutusang jo i Paulus, i Barnabas nana tuu darii ara inaan lamba' jo ara rasul nana toa-toa jo yerusaleman mananyaang mangana'i hal iniin. ³ Ara yang dautusan kole'a jemaat nan, tangkat malaloi Fenisia nana Samariaan, ara inaan mambele busi pertobatan tuu dari banua-banua yang boan nan Yahudi. Hal lan nan bua' susuu nyawa jo samua yang mambeleen. ⁴ Waktu mondoka ara inaan jo Yerusaleman, ara inaan da siolo kale'a jemaatan, rasul, nana ara toa-toa, ara inaan molaii mamadang samua yang maminna dakarajaan kole'a Alatalah. ⁵ Tapi, sapadua ara yang parsaya'an nan, yang asallan dari kelompok Farisi, kadeng laloang bada," penting jaji manyunat jo ara inaan, tiang cara ka' mayuro' ara inaan biar to' malolai Hukum ma i Musaan." ⁶ oleh sebab inaan ara rasul nana toa-toa an sikapulung mangombongang persoalan inin. ⁷ Karna ambat na kada yang ipadang ngan nana pasikule-kuleangan, dabarikan i Petrus kadeng laloang bada jo ara inaan,"ara saurun ku' ingkinan matawang ngain jolo-jolo iniin Alatalah maminna mile' jo intara nin, malaloi parantara baba' kuun nin, tuu yang boanan Yahudi mandalinga kada dari Injillan nana parcaya jo injillan. ⁸ Alatalah yang milala ate a muntuariin, maminna bersaksi jo ara inaan, mameang Roh Kudus, siruba bo nana yang maminna da karaja jo kaan; ⁹ Dabarikkan Ia inju samasali pasilenang jo kaan nana ara inaan, setelah mamborese ate ara inaan nana imannan ¹⁰ antiin katenaan aikamanun ingkinan mankoi kik jo Alatalah, nana munaa kuk jo ibalang kalonga ara murid-murid tannan , yang injuun kule' di awa, mam kate ara tamatoa ka' ijoloon apalagi'na dirik ka' kadirik? ¹¹ Tapi parsaya' kik bahwa ingkiin nan dasalamatkan kik kolea kasih Tuhan Yesus, sama kate ara inaan." ¹² Samua tu yg injenan tontonong, dabarikan mantantalinga jo i Barnabas nana i Petrussan manunutun sagala mujizat yang dakaraja kolea Alatalah malaloi ara inaan jo banua-banua yg boan nan Yahudi. ¹³ mamin poang baranti bada ara inaan, i Yakobusan manyut,"ara saurunkuk, tantalinga nak. ¹⁴ I Simonnan maminna manunnutun, dari mola a Alatalah pitang anugrah jo banua-banua leenan yang boan Yahudi nana mile' sakumpulan umat dari intara jo nin ilalama asonNaan. ¹⁵ Panyampaianna ara Nabi siruba nana hal iniin, kate yang maminna i tulis, ¹⁶ Ti'in mamin hal-hal niin akan mole' balikkak, maminnan Ku pakadeng balik kemah a i Daud yang arurunnan na; akan Ku pole balik nana Ku pamami balik bata rurun-rurunnaan, ¹⁷ manto' ara yang tasisa'an nan manyarii jo Tuhan nan, termasuk banua-banua yang boan Yahudi, malong-along ason Kuk. ¹⁸ Iniin na yang dapadangan kolea Tuhan nan, yang mangaraja samuaan nin, ikatawang darii mola-mola a zamannan. {kate kada tuu ijoloon, Iniin na yang dapadangan kolea Tuhan nan, dari zaman ijolo jajiin maminna milala jo karaja An.}* ¹⁹ Jadi, pandapan kuun, ingki'in injuki pande pakalin-kalin jo tu yang sileen banua nan ka' babalik jo Tuhan nan. ²⁰ Tapi yang ipadangan ingki' jo ara inaan bahwa ara inaan harus marantang jo bata pamindaraan, dari perbuatan inju mam nana dari dagin inatang yang mate tasaak nana dari dara' busi. ²¹ Karna Hukum ma i Musaan i dapadang sarara kota sejak zaman ijoloon dabarikan sampai kate ninnan Hukum naan ibasaang jo aso Sabatan jo langko' a Alatalah ²² Dabarikan dapikirkan kole'a ara rasul, toa-toa nana samua tuu yang injenaan, labi mam kalau mile' jo i Yudas yang asonnaan Barsabas, i Silas adalah nan busi pamimpin jo langko a Alatalah, yang di dutus sirarak nana i Paulus nana i Barnabas busi. ²³ Ara inaan manulis surat iniin yang isiaan,"Salam dari ingkam rasul, nana toa-toaan jo ninan ara saurunku' dari banua yang boannan Yahudi jo Antiokhia, Siria nana Kilikiaan. ²⁴ Ingkiin maminnai' mandalinga bahwa insa-insa mintuari inju imeang hukuman, marantang jo naman, manggado joninan nana pangajaran yang manggoyahkan ate nin. ²⁵ niin ibele mam, bagi ingkam maniang pakat mile' tu yang i dutussan ingkam lamba' jo ninan sirarak nana i paulus nana i Barnabas yang ikasang jaji ingkam. ²⁶ Ara iniin adalah tuu yang to'on mameang tio'a demi ason na Tuhan ka' Yesus Kristus. ²⁷ Oleh sebab inaan, ingkaman mutuskam jo i Yudas nana i Silas, yang akan mamadang manganai hal yang sirubaan jo ninan. ²⁸ Sebab iniin dabele mam kole'a Roh Kudus sama bo kate ingkaman, manto' inju manarima beban yang injuun nan perlu: ²⁹ Tapi manto' ingkin nan ambaken kin parsaya jo bata pamindaraan, dari dara' a dari dagin inatang yang mateen i sakkan, nana anjo' kin busi dari perzinahan. apabila ingkinan manjo'ang diri' nin dari hal-hal iniin, ingkinan maniang hal yang sangat mam bagi diri' nin kadirik. katenan poang salamat ki'." ³⁰ Mamin poang padang kale'a, ara inaan tangkat jo Antiokhia; mondok laloang mangapulung ngang jo tuu ambatan, ara inaan mamandeang surattan nan. ³¹ Mamin poang dabaca kole'a ara iraan, ara iraan susuu nyawa an. ³² Dabarikkan i Yudas, i Silas nana ara Nabi nan, mamengan penguatan nana ambata kadaan jo bata saurun ara iraan. ³³ mausan unsa-unsa aso injene, ara inaan da pi'ang mole' jo tu yang mamin mutussan jo ara inaan. ³⁴ (i Silasan bapikir bahwa labi mam la'lako injen jo banua inaan) ³⁵ I Paulus nana i Barnabas rantang kalea jo Antiokhia nana ara lenan nan, dabarikan ara inaan majar nana mamadang firman na Tuhan. ³⁶ Ka unsa-unsa asoo dabarikan Paulus bada jo i Barnabassan,"marea nai mole' kate nin nana mananggoi ki' jo bata saurun ka' jo sarara kota koson ka' padampeang bata firman Tuhan, mambele ki' jo ara inaan, loa'aika pamayo'annaan. ³⁷ I Barnabassan to' mawa jo i Yohanes busi yang asonnaan i Markus. ³⁸ Tapi i Paulus mamikirang anjau ratia mawa jo i Markussan, tuu yang kalaan marantang jo ara inaan jo Pamfilia nana amo on tamba bakaraja sama nana ara inaan. ³⁹ Dabarikan ara duaan nan sipadu, maminnan ara duaan nan sikataa'; i Barnabas mawa jo i Markussan tamba nan na berlayar jo banua Siprus san. ⁴⁰ Tapi i paulus mile' jo i Silassan dabarikan ara inaan tangkat, mamin poang da antat kolea ara iraan jo lalama anugeraha Tuhan nan. ⁴¹ Dabarikan ara inaan tangkat malaloi Siria naan Kilikiaan, to' mameang panguatan ate jo bata tuu yang injeen nan.