¹ Ekuseni baPhristi labakhulu netibondza benta lisu lekubulala Jesu. ² Bambopha bamtsatsa bammikisa kuLusibalukhulu Philatu. ³ Judasi labengumtsengisi wakhe, nakabona kutsi Jesu bamlahle ngelicala lekufa, watisola, wabuyisela tinhlavu letinema-30 kubaphristi labakhulu kanye netibondza, ⁴ atsi, ''ngonile ngekutsengisa ngengati lengenacala'' Bona batsi; ''Pho, singenaphi lapho tsine ?Tibonele wena!'' ⁵ Judasi wasakata lemali ethempelini, wahamba wayewutikhunga. ⁶ Baphristi labakhulu bayicobonga lemali batsi;''Lemali ngeyengati, kantsi kuphambene nemtsetfo wakitsi kutsi imali lenje ifakwe esikhwameni selithempeli.'' ⁷ Emvakwekuvumelana ngaloko, lemali batsenga ngayo iNsimi yeMbumbi, kuze ibe yindzawo yekungcwabela tihambi. ⁸ Ngiko nje lensimi kuze kube ngulamuhla ibitwa ngekutsi; ''YiNsimi yeNgati'' ⁹ Ngako kwagcwaliseka loko lokwashiwo ngumphrofethi Jeremiya kutsi ''Batsatsa tinhlavu letingema-30 tesiliva, intsengo yakhe. Lentsengo ngaye yalungiswa ngulabanye bemadvodzana aka-Israyeli. ¹⁰ Batsenga ngayo insimi yembumbi, njengobe iNkosi ingiyaliale. ¹¹ Jesu wemiswa embikwaLusibalukhulu lowambuta watsi; ''Wena ungiyo yini iNkhosi yemaJuda?'' Jesu waphendvula watsi; ''Usho kona.'' ¹² Kepha ngesikhatsi baphristi labakhulu netibondza bametfwesa emacala eva abengaphendvuli. ¹³ Ngako Philatu watsi kuye '' Awuweva yini lamacala langaka labebakubeka wona?'' ¹⁴ Kepha Jesu akazange abaphendvule, ngisho nangalinye nje. Lusibakhulu wamangala kakhulu. ¹⁵ Ngesikhathi somkhosi lusibalukhulu abenemkhuba wekukhulula sinye siboshwa lesasifunwa sicuku sebantfu. ¹⁶ Ngaso leso sikhatsi-ke kwakunesiboshwa lesasidvume ngebubi baso lebesinguBharaba. ¹⁷ Ngako -ke satsi kube lesicuku sibutsane, Philatu wasibuta watsi; 'Nifuna nginikhululele bani emkhatsini waBharaba naJesu lowatiwa ngekutsi nguKhristu? ¹⁸ Ati kahle kamhlophe kutsi Jesu bamletse ngobe banemona naye. ¹⁹ Watsi Philatu asahleli esihlalweni sekwehlulela, umfati wakhe watfumela kuye livi atsi 'Ungatifaki endzabeni yalowo longenacala, ngobe angikalali ngihlushwa ngaye ngeliphupho ebusuku balamuhla.' ²⁰ Kepha baPhristi labakhulu netibondza bativumisa leticumbi kutsi ticele Bharaba kubulawe Jesu. ²¹ Kodwa lusibalukhulu wabuta watsi; 'nifuna nginikhululele muphi emkhatsini walaba lababili?' Baphendvula batsi; Bharaba!'. ²² Philatu wabuta watsi ; 'Ngenteni -ke ngaloJesu lokutsiwa nguKhristu?' Bonkhe baphendvula batsi;' Mbetsele esiphambanweni!' ²³ Kodwa Philatu wababuta futsi watsi;' Ngobe ente cala lini? Kepha kwabo ngukhona bamemeta bonkhe batsi; 'mbetsele esiphambanweni!' ²⁴ Watsi kube abone Philatu kutsi kute langaphindze akwente, nekutsi sekususa siphitsiphitsi, watsatsa emanti ,wageza tandla embikwebantfu bonkhe watsi ; 'Anginacala engatini yalomuntfu ! Tiboneleni nine !' ²⁵ Sonkhe sive saphendvula satsi; 'Ingati yakhe ayibesetikwetfu nasetikwebantfwna betfu! ' ²⁶ Philatu wase ubakhululela Bharaba; kepha Jesu asashayiwe wase umnikela kubo kutsi abetselwe esiphambanweni. ²⁷ Emasotja aLusibalukhulu ase atsatsa Jesu ammikisa esigodlweni saLusibalukhulu. Lonkhe libutfo lemasotja lasondzela lamtungeleta. ²⁸ Lamhlubula tingubo takhe, lamembatsisa ingubo lebovu. ²⁹ Lase leluka umchele ngemanyeva, lawufaka enhloko yakhe, lambambisa umhlanga ngesekudla, laguca embikwakhe, lamphukuta latsi; 'Bayethe! Nkhosi yemaJuda!' ³⁰ Lamkhafulela ngematse, latsatsa lomhlanga, lamshaya enhloko. ³¹ Naselicedzile kumphukuta, lamkhumula lengubo lebovu, laphindze futsi lamembatsisa letakhe tingubo, lase liphuma naye layakumbetsela esiphambanweni. ³² Libutfo lemasotja latsi lisaphuma nje lahlangana nalenye indvodza yaseSirene, lenguSimoni libito layo, layicindzetela kutsi yetfwale siphambano saJesu. ³³ Nasebafikile endzaweni lekutsiwa yiGolkotha, lokusho kutsi; ''YiNdzawo yeSikobho,'' ³⁴ lamnatsisa liwayini lelalibhicwe nenyongo; watsi kube alive walala, wangete walinatsa. ³⁵ Selimbetsele esiphambanweni, lase lenta inkatho, lehlukaniselana ngetingubo takhe. ³⁶ Lahlala phansi, lamgadza. ³⁷ Ngetulu kwenhloko yakhe labeka satiso selicalalagwetjwe ngalo sitsi; ''LONA NGUJESU, INKHOSI YEMAJUDA.'' ³⁸ Kwase kubetselwa kanye naye tigebengu letimbili, lesinye ngesekudla, lesinye ngesancele. ³⁹ Bantfu lababedlula lapho babemetfuka banikine tinhloko, ⁴⁰ batsi; ''Wena lobhidlita lithempeli uphindze ulakhe ngemalanga lamatsatfu! Tisindzise phela, nangabe uyiNdvodzana yaNkulunkulu! Yehla lapho esiphambanweni!" ⁴¹ Kanjalo futsi nebaphristi labakhulu, netati temtsetfo, netibondza bamphukuta batsi; ⁴² ''Wabasindzisa labanye, kodvwa yena angeke atisindzise! Kantsi akasiyo iNkosi yema-Israel yini?Akehle phela nangabe angehla esiphambanweni sitawukholwa nguye! ⁴³ Wetsembele kuNkulunkulu. Akamehlise phela loNkulunkulu wakhe namtsandza! Ngobe watsi, NgiyiNdvodzana yaNkulunkulu.'' ⁴⁴ Ngisho nalabo lababili lababetsewelwe kanye naye, bametfuka nabo. ⁴⁵ Kepha kusukela ngeli-awa leli-12 emini umhlaba waba mnyama, kwaze kwaba li-awa lesitsatfu. ⁴⁶ Kwatsi ngensimbi yesitsatfu entsambama Jesu wakhala kakhulu watsi; ''Eli, Eli lama sabakthani?'' lokusho kutsi, Nkulunkulu wami, Nkulunkulu wami ungishiyelani?'' ⁴⁷ Labanye bantfu labebalapho labamuva batsi; ''Ase nimuve! Ubita Ejihah!'' ⁴⁸ Lomunye wabo wagijima masinyane waya kuye nesiponji, wasenya ewayinini lelimunyu wasihloma elutsini lwemhlanga wetama kumnatsisa. ⁴⁹ Kodvwa labanye bats; Ase nimyekele sibone kutsi lo-Elija utawufika yini atemsindzisa!'' ⁵⁰ Jesu waphindze wakhala ngelivi lelikhulu wase uyafa. ⁵¹ Bheka indvwangu leyayilenga ethemphelini yadzabuka ekhatsi, kusukela etulu kuya phansi . Umhlaba watamatama emadvwala achekeka ekhatsi, ⁵² emathuna avuleka, bantfu labanyenti baNkulunkulu labebafile bavuswa ekufeni. ⁵³ Bawashiya emathuna; emvakwekuvuka kwaJesu ekufeni baya bangena edolobheni lelingcwele, lapho babonwa bantfu labanyenti. ⁵⁴ Induna yelikhulu nalabo lababebukela Jesu, nabakubona lokutamatama kwemhlaba, nako konkhe lokwenteka, befikelwa kwesaba lokukhulu batsi, ''Ngempela lomuntfu abeyindvodzana yaNkulunkulu!'' ⁵⁵ Kwakunebafati labanyenti lapho bamlandzela basita Jesu kusukela eGalile; babebukela babucalu. ⁵⁶ Emkhatsi wabo bekukhona Mariya weseMagala, naMariya unina waJakobe na Josefa nenina wemadvodzana aZebedi. ⁵⁷ Kusihlwa kwefika Josefa labeyinjinga yase-Arimathiya, naye futsi abengulomunye webafundzi baJesu. ⁵⁸ Waya kuPhilatu kuyewucela sidvumbu saJesu. Philatu wakhipha livi watsi akanikwe. ⁵⁹ Josefa watsatsa sidvumbu, wasisonga ngendvwangu lenhle yelineni lehlobile, ⁶⁰ wasibeka ethuneni lelisha labesandza kuligubha edvwaleni. Wase ugicitela litje lelikhulu emnyango walelithuna wavala ngalo wesuka wahamba. ⁶¹ Kepha Mariya waseMgadala nalomunye Mariya babehleti khona lapho, macondzana nelithuna. ⁶² Ngakusasa, ngelilanga lelilandzela emalungiselelo, baphristi labakhulu nebaFarisi bahlangana naPhilatu, ⁶³ Batsi kuye ''' siyakhumbula kutsi lomkhohlisi asaphila, watsi, 'Ngiyawuvuka ngelilanga lesitsatfu'. ⁶⁴ Ngako khipha umnyalo kutsi lelithuna lakhe ligadzisiswe kahle kuze kube lilanga lesitsatfu, kuze bafundzi bakhe bangayi kuyawumeba bese batjela bantfu batsi, ''Uvusiwe kulabafile bese kutsi lamalanga akhe ekugcina abe makhulu kakhulu kunalwa ekucala.'' ⁶⁵ Philatu watsi kubo;'' Tsatsani naba balindzi nihambe niyekulelusa njengekubona kwenu'' ⁶⁶ Besuka bahamba bayawuligadzisisa lelithuna; balivalisisa baze bashiya neluphawu etjeni babeka nebalindzi.