¹ Emvakwemalanga lasitfupha Jesu watsatsa boPhetro, Jakobe, kanye naJohane umnakabo. wenyukela nabo entsabeni baba bodvwa . ² Jesu wagucuka lesinye simo embikwabo . Buso bakhe bakhatimula njengelilanga, tingubo takhe taba mhlophe njengekukhanya. ³ Kwase kubonakala boMosi naElija kubo bakhuluma naye. ⁴ Phetro waphendvula watsi kuJesu, ''Nkhosi kukahle kutsi sibe lana. Nawutsandza, ngitowakha emathende lamatsatfu--linye lakho, lelinye libe laMosi, lelinye libe laElija.'' ⁵ Watsi asakhuluma nabo, kwachamuka lifu lelikhatimulako, labasibekela. Kwevakala livi kule lifu litsi, ''lena yiNdvodzana yami letsandzekako, lengitfokota ngayo. Yilaleleni.'' ⁶ Batsi bafundzi bakhe nabeva loko, bawa phansi ngebuso besaba kakhulu. ⁷ Kepha Jesu weta wabatsintsa watsi,'' sukumani ningesabi.'' ⁸ Batsi nababuka bangaboni muntfu ngaphandle kwaJesu. ⁹ Basehla kulentsaba Jesu wabayala watsi, ''Ningatjeli muntfu ngalenikubonile kuze kuvuswe iNdvodzana yemuntfu kulabafile.'' ¹⁰ Bafundzi bakhe bambuta, batsi, ''Leni bafundzisi bemtsetfo batsi kufanele kutsi kufike Elija kucala?'' ¹¹ Jesu wabaphendvula watsi, ''Empeleni Elija uyeta uyawubuyisela konkhe esimeni sako. ¹² Kepha ngitsi kini, Elija sewufikile, kepha bantfu abambonanga. kepha, benta konkhe labafisa kukwenta kuye. Kanjalo, neNdvodzana yemuntfu iyawuhluphekela etandleni tabo.'' ¹³ Base bafundzi baya bona kutsi abekhuluma kubo ngaloJohane uMbhabhatisi. ¹⁴ Kwatsi nabefika esicumbini sebantfu, kweta iNdvodza kuye, yaguca embikwaJesu, yatsi,'' ¹⁵ Nkhosi, yiba nemusa endvodzaneni yami, ngoba inesitfutfwane ihlupheka kabi. Iwela futsi emlilweni nasemantini. ¹⁶ Ngiyiletse kubafundzi bakho behluleka kuyiphilisa.'' ¹⁷ Jesu waphendvula watsi, ''situkulwane lesingaketsembeki nalesikhohlakele ye, kuyawuba ngunini nginani? kuyawuba ngunini nginibeketelela? ¹⁸ Jesu walekhuta lelidimoni, laphuma kuye, lomfana waphila kusukela leso sikhatsi ¹⁹ Bafundzi base beta kuJesu ngasense batsi,'' Kwentiwa yini kutsi tsine singakhoni kulikhokha lelidimoni? ²⁰ Jesu watsi kubo, '' kwentiwa kutsi ninelukholo loluncane. Ngoba ngicinisile ngitsi kini, naningaba nekukholwa lokuncane lokungangenhlavu yendlulamitsi, ningatsi kulentsaba, 'suka la uye lapha,' ivele isuke,' kute lokungete kwenteka kini,'' ²¹ kepha loluhlobo lelidimoni aluphumi ngaphandle kwekukhuleka nekuzila.'' ²² Ngesikhatsi baseseGalile, Jesu watsi kuba fundzi bakhe,'' iNdvodzana yeMuntfu itawunikelwa etandleni tebantfu, ²³ batayibulala, kodvwa ngelilanga lesitsatfu itawuvuswa ekufeni.'' bafundzi badzabuka kakhulu. ²⁴ Batsi kube bafike eKhaphanawume, emadvodza labutsa umtselo welithempeli beta babuta kuPhetro batsi, ''umfudzisi wenu uyawukhipha yini umtselo welithempeli?'' ²⁵ Watsi, ''yebo.'' Ngesikhatsi Phetro angena endlini Jesu wambuta kucala watsi, ''Simoni ngembono wakho wena utsini? Emakhosi emhlaba ayitsatsa kubobani imitselo? Emadvodzaneni awo nobe kulabanye?'' ²⁶ Phetro waphendvula watsi, ''kulabanye.'' Jesu watsi, ''Emadvodzana akhululekile ekutseleni.'' ²⁷ Kodvwa ke kuze singabakhubi, hamba uye elwandle, jika lidweba, udwebe inhlanti lephuma kucala. nase uyivule umlomo wayo, utawutfola luhlavu lwemali. Ulutsatse ulinike bona utselele mine nawe.''