¹ Ngaleso sikhatsi Jesu ngeliSabatha ahamba ensimini yemabele. Bafundzi bakhe besebalambile ngako bagamula tinhloko temabele badla. ² Kodvwa baFarisi bakubona loko, batsi ku Jesu, ''Asubuke, labafundzi bakho benta lokungakavumeleki ngelilanga leli Sabatha'' ³ Kodvwa Jesu wabaphendvula watsi; ''Anifundzanga yini ngalokwentiwa nguDavide ngesikhatsi alambile kanye nalamdvodza labenawo? ⁴ Wangena endlini yaNkulunkulu wadla tinkhwa tase ebukhoneni, lebekungakavumeleki kutsi tidliwe nguye, kanye nalabo bekahamba nabo, kepha tidliwa baphristi kuphela. ⁵ Khona anifundzanga yini emtsetfweni kutsi ngeli Sabatha baphristi ethempelini bephula umtsetfo welisabatha kodvwa bangabi nacala? ⁶ kodvwa ngitsi kini lapha kukhona lomkhulu kakhulu kunelithempeli . ⁷ Kepha kube benati kutsi kusho kutsini kutsi, 'Ngifuna sihawu, hhayi umhlatjelo,' ngabe anibalahlanga ngelicala laba labangelo. ⁸ Ngobe iNdvodzana yeMuntfu iyiNkhosi yeliSabatha.'' ⁹ Jesu wesuka lapho wangena esinagogeni labo. ¹⁰ khona lapho, kwakukhona indvoza leyayinesandla lesasishwaphene. BaFarisi babuta Jesu, batsi, "Ngabe kuvumelelekile yini kutsi kuphiliswe ngeliSabatha?" khona batomsola kutsi wente sono. ¹¹ Jesu watsi kubo, "Ukhona yini lapha kini umuntfu, longatsi, anemvu yinye, nayiyele emgodzini angete ayikhipha ngobe kuliSabatha, Pho-ke umuntfu ubaluleke kanganani-ke kunemvu? ¹² Ngako-ke kuvumelekile kutsi wente lokuhle ngeliSabatha." ¹³ 13 Wase utsi kulendvodza,''yelula sandla sakho.'' Yaselula, saphila, njengalesi lesinye sandla. ¹⁴ Kodvwa baFarisi baphuma lapho bayakwakha lisu lelimelene naye. Bebafuna kutsi bangambulala njani. ¹⁶ Jesu asakwati loko, wesuka kuleyo ndzawo, labanyenti bamlandzela, futsi wabaphilisa bonkhe. ¹⁵ Wabayala kutsi bangabatjeli labanye , ¹⁷ kuze kutsi kube liciniso lokwashiwo ngemPhrofethi Isaya kutsi, ¹⁸ Bukani sisebenti sami lengisikhetsile: lotsandzekako wami, nalengitfokotako ngaye. Ngitawufaka umoya wami kuye, utawumemetela bulungiswa kubetive. ¹⁹ Angeke akhale, abange umsindvo, futsi kute loyawuliva livi lakhe etitaladini. ²⁰ Akanawephula umhlanga lofecekile akanawucima nentsambo yesibane lebhunyako aze acedze kwehlulela, ²¹ libito lakhe betive bayawukwetsembela kulo." ²² Base bamletsela umuntfu labekayimphumphutse asimungulu, kantsi-ke, abenemadimoni. Wamphilisa, wabona futsi wakhuluma. ²³ Ticuku tebantfu tamangala tatsi, ''kungenteka lendvodza lena kube yindvodzana yaDavide?'' ²⁵ Kodvwa baFarisi nabeva lommangaliso, batsi, '' lendvodza lena ayikhiphi emadimoni ngaphandle ngaBhelzebule, inkhosi yemadimoni'' ²⁴ Kepha Jesu wayati imicabango yabo wase utsi kubo, ''wonkhe umbuso lowehlukene ekhatsi uyacitseka, kute lidolobha noma likhaya lelingema uma lehlukene ekhatsi. ²⁶ ngako-ke uma Sathane akhipha Sathane kusho kutsi yena uhlukene ekhatsi. uyawubese uma kanjani-ke umbuso wakhe? ²⁷ Uma mine ngikhipha emadimoni ngaBhelzebule, emadvodzana enu wona awakhipha ngabani? Kungako-ke bona bayoba behluleli benu. ²⁸ Kodvwa uma ngikhipha emadimoni ngamoya waNkulunkulu, kusobala kutsi umbuso waNkulunkulu sewehlele kini. ²⁹ Futsi-ke umuntfu angangena njani endlini yesichwaga atsatse imphahla yaso ngaphandle kwekucale abophe lesichwaga? Bese-ke uyayitsatsa lemphahla yalesichwaga. ³⁰ Ngako-ke ngitsi, longekho kanye nami umelene nami, naloyo longabutsi kanye nami uyasakata. ³² Ngaloku ngitsi kini konkhe kona nekuhlambalata kuyawutsetselelwa, kepha kuhlambalata Moya waNkulunkulu kungeke kutsetselelwe. ³¹ Wonkhe lokhuluma kabi ngeNdvodzana yeMuntfu uyawutsetselelwa kepha loyo lokhuluma kabi ngaMoya Longcwele angeke atsetselelwe kuleli nakulelitako.'' ³³ Yenta sihlahla sibe sihle, netitselo taso tiyawuba mnandzi, kunjalo noma ngabe sihlahla sisibi, titselo taso tiyawuba nguletimbi, ngobe sihlahla satiwa ngetitselo taso. ³⁴ Nine ntalo yetinyoka, njengoba nibabi, ningatisho njani tintfo letinhle? Ngobe umlomo ukhuluma loko lokuphuma enhlitiweni. ³⁵ Umuntfu lolungile ukhipha lokuhle emgodlagodleni wakhe wekulunga, nalomubi ngalokunjalo ukhipha bubi emgodlagodleni wakhe webubi. ³⁶ Ngiyanitjela ngitsi ngelingala lekwehlulela bantfu bayawutilandza ngalo lonkhe ligama lelibulima labalikhulumako. ³⁷ Ngobe ngemavi akho uyawuba msulwa, nangemavi akho uyawulahlwa.'' ³⁸ Tati temtsetfo nebaFarisi baphendvula Jesu batsi,'' Mfundzisi, sifisa shengatsi singabona sibonakaliso kuwe.'' ³⁹ kodvwa Jesu waphendvula watsi kubo, ''situkulwane lesibi nesetiphingi sifuna sibonakaliso. Kepha kute sibonakaliso labayawusibona ngaphandle kwaleso saJona umphrofethi. ⁴⁰ Ngoba Jona wahlala emalanga lamatsatfu nebusuku lobutsatfu esiswini senhlanti lenkhulu, neNdvodzana yeMuntfu iyawuhlala emalanga lamatsatfu nebusuku lobutsatfu enhlitiyweni yemhlaba. ⁴¹ Bantfu base Niniva bayawusukuma ekwahlulelweni kanye nalesitukulwane sebantfu basilahle. ngobe baphendvuka enshumayelweni yaJona, buka-ke, lomkhulu kuna Jona ulapha. ⁴² iNdlovukazi yaseNingizimu iyawusukuma ekwahlulelweni nebantfu bakulesitukulwane isilahle. Ngobe ngenca yemavi enhlakanipho yaSolomoni yasuka emkhawulweni wemhlaba kutewalalela; Bukani-ke ngoba emkhatsini wenu kukhona lomkhuku khakhulu kunaSolomoni''. ⁴³ Uma umoyalomubi uphuma kumuntfu udzabula umhlaba solo ufuna indzawo yekuphumula, uma ungayitfoli. ⁴⁴ Bese utsi '' kuncono ngibuyele endlini yami lengiphume kuyo ''nawufika ukhandze indlu ihlobile konkhe kume ngemumo. ⁴⁵ Ubese uyahamba ulandze leminye lesikhombisa lemibi kakhulu kwendlula wona itohlala lapho. Ngako siphetfo saloyo muntfu siba sibi kakulu kunakucala. Kuyawuba njalo ke nakulesitukulwane lesibi. ⁴⁶ Watsi Jesu asakhuluma nalesicuku sebantfu, kwefika unina nebanakabo batowukhuluma naye. ⁴⁷ Kwabakhona lotsi kuye, ''Mfundzisi buka unyoko nebakini beme ngaphandle bafuna kukhuluma nawe.'' ⁴⁸ Kepha Jesu wagucukela kulendvodza wayiphendvula watsi, "Ngubani make wami? Bobani bomnaketfu? ⁴⁹ Wase welulela sandla wasibhekisa kubafundzi bakhe, watsi "bukani lapha-ke , nangu make naba bomnaketfu!" ⁵⁰ Ngoba lowo lowenta intsandvo yaBabe losezulwini, nguye kanye umnaketfu, nadzadzewetfu namake.