¹ Kwefika ngalelinye lilanga Jesu asafundzisa labantfu ethempelini futsi ashumayela lelivangeli kutse baphristi labakhulu netati temtsetfo teta kuye nalabadzala. ² Bakhuluma, batsi kuye, ''Tjela tsine ngaliphi ligunya wenta letintfo leti, nome ngubani lowakunika leligunya leli.'' ³ Waphendvula watsi kubo, ''Ngitawunibuta umbuto, bese niyangitjela. ⁴ Kubhabhatisa kwaJohane: Bekubuya kuNkulunkulu yini nome kubuya kumuntfu?'' ⁵ Babonisana bodwana, batsi, ''Uma sitsi, 'Kwasezulwini,' utawutsi, 'Pho animkholwanga ngani?' ⁶ Kepha uma sitsi, 'kubuya kubantfu,' bonkhe labantfu batasigcoba ngematje, ngoba bayakholelwa kutsi Johane abengumphrofethi.'' ⁷ Ngako baphendvula batsi asati kutsi kuchamukaphi. ⁸ Jesu watsi kubo, ''Nami ngeke nginitjele kutsi ligunya lini lengenta ngalo letintfo leti.'' ⁹ Watjela labantfu lomfanekiso, ''Indvodza yahlanyela insimi yemagelebisi, yayichashisa kulabantfu labalima emagelebisi, bese waya kulelinye live sikhatsi lesidze. ¹⁰ Ngesikhatsi labasibeka watfumela sisebenti kulabalimi bemagelebisi, kutsi kumele bamunike incenye yetitselo talensimi. Kepha labalimi bemagelebisi bamushaya, bese bamtfumela emuva angakaphatsi lutfo. ¹¹ Wabese utfumela lesinye sisebenti basishaya futsi naso, tasiphatsa kabuhlungu, bese bamtfumela emuva angakaphatsi lutfo. ¹² Watfumela futsi sesitsatfu basilimata futsi naso, basikhiphela ngaphandle. ¹³ Ngako leNkhosi yalensimi yemagelebisi yatsi, 'Yini lengitakwenta? Ngitawutfumela indvodzana yami letsandzekako. Kungenteka batomhlonipha.' ¹⁴ ''Kepha uma balimi bemagelebisi bambona, tase tikhuluma todvwa, titsi, 'Lena ngulenkhosana. Asimbulaleni, khona lomcebo utawuba wetfu.' ¹⁵ Bamkhiphela ngaphandle kwalensimi bambulala. Yini lengabese iyakwenta leNkhosi yalensimi kubo? ¹⁶ Utawuta bese ubhubhisa labalimi bemagelebisi, bese unika lensimi kulabanye.'' Uma bakuva loko, batsi, ''Akungabi njalo!'' ¹⁷ Kepha Jesu wababuka, bese watsi, ''Kusho kutsini lolokubhaliwe: 'Lelitje lelaliwa bakhi seligucuke laba litje lelimcokwa lesakhiwo'? ¹⁸ Wonkhe muntfu lowela tikwalelitje lelo uyafihlika abe ticucu, bese lona leliyawuwela tikwakhe liyawusila.'' ¹⁹ Ngako letati temtsetfo nebaphristi labakhulu bafuna indlela yekumbeka tandla ngalelo hora, ngoba bebati kutsi abekhulume lomfanekiso kumelana nabo. Kepha bebesaba labantfu. ²⁰ Bambukisisa, batfumela timpimpi labatentisa ngatsi balungile, kutsi batfole liphutsa ngenkhulumo yakhe, kuze bamnikele kulabaphetse nasemandleni embusi. ²¹ Bambuta, batsi, ''Mfundzisi, siyati kutsi ukhuluma ufundzise kahle, futsi awesabi buso bemuntfu, kepha ufundzisa liciniso ngetindlela taNkulunkulu. ²² Kuphambene nemtsetfo uma tsine sikhipha umtselo kuKhesari, nome cha? ²³ Kepha Jesu wabucondza lobucili babo, bese watsi kubo, ²⁴ ''Ngikhombiseni luhlavu lwesiliva. Lomfanekiso naleligama lokulo labani?'' Batsi, ''LaKhesari.'' ²⁵ Watsi kubo, ''Ngako nikani Khesari letintfo letitaKhesari, futsi kuNkulunkulu letintfo letitaNkulunkulu.'' ²⁶ Abatange bakhona kutfola liphutsa kulakusho phambi kwabantfu, kepha bamangala emphendvulweni yakhe, ngako bathula dvu. ²⁷ Uma labanye baSadusi beta kuye, bona bebatsi kute kuvuka ekufeni, ²⁸ bambuta, batsi, ''Mfundzisi, Mosi wasibhalela kutsi uma umnakabo ndvodza afa, anemfati, futsi ete bantfwana, umnakabo kumele atsatse lomfati wemnakabo, bese uba nemntfwana naye entelele umnakabo. ²⁹ Bekunabomnaka labasikhombisa bese lowekucala watsatsa umfati, wabese uyafa ete umntfwana, ³⁰ newesibili kanjalo. ³¹ Lowesitsatfu wamtsatsa, futsi ngalokukanjalo newesikhombisa washiya ete bantfwana, wafa. ³² Emvakwaloko nalomfati wafa futsi. ³³ Bese ke ekuvusweni, lomfati utawuba wabani? Ngoba labasikhombisa bebanaye njengemfati wabo.'' ³⁴ Jesu watsi kubo, ''Emadvodzana alelive leli ayashada futsi anikwa emshadweni. ³⁵ Kepha labo labatawutsatfwa njengalabafanele ngaleso sikhatsi kwemukela kuvuswa ekufeni kutawuba bete kushada kute lotonikwa emshadweni. ³⁶ Ngeke basafa phindze, ngoba bafana netingelosi, futsi bamadvodzana aNkulunkulu, ngekuba madvodzana ekuvuswa ekufeni. ³⁷ Kepha kutsi labafile bavuswa, ngisho Mosi waveta, kulendzawo mayelana nesihlahla, lapho wabita iNkhosi ngaNkulunkulu waAbrahama naNkulunkulu wa Isaka naNkulunkulu waJakobe. ³⁸ Nyalo akasasuye Nkulunkulu walabafile, kepha walabaphilako, ngoba bonkhe bayaphila kuye.'' ³⁹ Labanye baletati temtsetfo baphendvula, ''Mfundzisi, uphendvule kahle.'' ⁴⁰ Ngoba abatange batame kumbuta leminye imibuto. ⁴¹ Jesu watsi kubo, ''Bakusho kanjani loko kutsi Khristu yindvodzana yaDavide? ⁴² Ngoba yena Davide lucobo lwakhe utsi eNcwadzini yeTihlabelelo, INkhosi yatsi eNkhosini yami, 'Hlala ngesekudla sami, ⁴³ ngize ngente titsa takho sihlalo setinyawo takho.' ⁴⁴ Ngako ke Davide ubita Khristu 'Nkhosi,' ngako uyindvodzana yaDavide kanjani?'' ⁴⁵ Bonkhe labantfu baselalele watsi kubafundzi bakhe, ⁴⁶ ''Caphelani letati temtsetfo, labatsandza kuhamba bagcoke imijiva lemidze futsi labatsandza kubingelelwa ngalokuhlukile etindzaweni temibutswano futsi titsandza tihlalo talabakhulu emasinagogweni netindzawo tekudlela talabakhulu. ⁴⁷ Futsi badla tindlu tebafelokati, bese ngekubukisa bathantaza imithandazo lemidze. Emadvodza lanjena atawemukela sijeziso lesikhulu.''