¹ Paulo, mutumwa wa Jeso Klisto kwiinda muluyando lwa Leza, ku bantu ba Leza basalala ibali mu Epheso, ibashyomeka muli Klisto Jeso. ² Luzhyalo lube kuli ndimwe aluumuno luhvwa kwa Leza Taata wesu a Mwami Jeso Klisto. ³ Alumbwe Leza a Wihyi wa Mwami weso Jeso Klisto, walo iwatuleleka swebo azhyileleko zhyoonse zhyaku Moza mumasena amuzeulu muli Klisto. ⁴ Leza wakatusala swe muli nguwe kuhvwa kumakankilo anyika, kutewa tululame akubula kampenda kumeso aakwe mu luyando. ⁵ Leza wakatukanzila cilawo swe kutewa akatulele mbuli bana bakwe muli Jeso Klisto, mbuli mbwabotelwa mukuyanda kwakwe kubotu. ⁶ Kulelwa kwesu kutuletela kutembaula bulemu bwa luse lwakwe bwalo mbwaatupa icabuyo muli yooyo ngwayanda. ⁷ Muli Jeso Klisto tukwete lununuko kwiinda mubulowa bwakwe akulekelelwa kwa milandu izhyesu, kweendalanya abuhvwubi bwa luse lwakwe. ⁸ Walo waka hvwuzhya luse ulu kuli ndiswe abusongo boonse a luzhyibo. ⁹ Leza wakatuzubulwila swebo zhyihisilwe zhya kuyanda kwakwe, kweelanya ambocakamubotela walo, alimwi anchakatondezhya muli Klisto, ¹⁰ kakuli kudongomwena ku muzeezo wakuhika kwaciindi, kwakubika zhyintu zhyoonse antoomwe, zhyintu zhyoonse zhyili kujulu a munyika, kwiinda ku mutwe omwe, nguwena Klisto. ¹¹ Muli Klisto twakapewa cikono, notwamana kukanziwa kwamaponeno kweendelanya a muzeezo wakwe walo ubeleka zhyintu zhyoonse mbuli makanze amukuyanda kwakwe. ¹² Leza wakatusala kuba bamukamwini lukono kutewa swebo, notwakatalihya kukwata bulangizhyi muli Klisto, tukabe bahyikutembaula bulemu bwakwe. ¹³ Muli Klisto, amwebo kupama, nomwakamana kuteelela izwi lya kahyimpe, aali makani aluhutuko lwenu, mwaka hvwumina muli nguwe mpoona mwaka hyimbwa kucihyomyo ca Moza usalala, ¹⁴ Walo uli nchecitondezhyo ca lukono lwesu mane kuhyikila kukunununwa ikwa lubono, kukutembaula bulemu ibwakwe. ¹⁵ Mukaambo kaako, kuhvwa nindakateelela kukwatikizhya luhyomo ulwenu mu Mwami Jeso aluyando ulwenu kubantu ba Lwza ibasalala, ¹⁶ nyina nindaka kulumba Leza kukwatikizhya ndimwe nimubanda mu mipailo yangu. ¹⁷ Ndapaila ikuti Leza wa Mwami wesu Jeso Klisto, Wihyi wabulemu, amupe mwebo moza wa busongo aciyubununzhyo mukuzhyiba nguwe. ¹⁸ Ndapaila ikuti meso amyoyo yenu a lemununwe, ikuti muzhyibe bulungizhyi bwalo mbomwakaitilwa abuhvwubi bwa bulemu bwalukono lwakwe akati kabantu bakwe Leza basalala. ¹⁹ Mumipailo yangu inga ndalomba kuti mube akuzhyiba bukando butaboli bwansana izhyakwe kuli ndiswe notuhyoma, kweendelenya akubeleka ikwa buyumu bwa nguzu zyakwe. ²⁰ Izhyi zhye nsana izhya kabelehye wa muli Klisto elyo naa ka mubuhya kuhvwa ku bahwu akumukazhyika walo kwitanhyi lyakwe lyalulyo mubusena bwakujulu. ²¹ Walo waka kalila Klisto kule atala lya malelo oonse a bweendelezhyi ansana a bulelo, alimwi amazhyina oonse akaambwa. Klisto uya kulela, kutali buyo kumusela uno, pele akumusela uciboola. ²² Leza wakalela zhyintu zhyoonse kunhyi lya matende akwa Klisto akumupa walo kucikombelo kuba mutwe ulanga zhyintu zhyoonse. ²³ Cikombelo ngo mubili wakwe, ikuzula ikwakwe walo uzuzhya zhyoonse muli zhyoonse.