¹ Kabili Yawe asolele kuli Mose. Atile, ² ''Tumako abaume bamo ukuyalengula icalo ca Kenani, ico napela ku bantu ba Israeli: Tuma umwaume ukufuma mu mikowa yonse iyaba shibo wabo. Cilamuntu abe nintungulushi umo bali.'' ³ Mose abatumine ukufuma mu matololo ya Parani, pakutila bengakonka ikambisho lya kwa Yawe. Bonse bali nintungulushi mu bantu ba bena Israeli. ⁴ Aya emashina yabo: ukufuma mu mukowa wakwa Rubeni, Shamua umwana wakwa Sauri; ⁵ ukufuma ku mukowa wakwa Simoni, Shafati mwana Hori; ⁶ ukufuma ku mukowa wakwa Yuda, Kalebu mwana Yosefe; ⁷ ukufuma ku mukowa wakwa Isakari, Igali mwana Yosefe; ⁸ ukufuma ku mukowa wakwa Efraimu, Hoshea mwana Nuni; ⁹ ukufuma ku mukowa wakwa Benjamini, Pauti mwana Rafu; ¹⁰ ukufuma ku mukowa wakwa Sebuluni, Gadiele mwana Sodi; ¹¹ ukufuma ku mukowa wakwa Yosefe (emukutila ati, ukufuma mu mukowa wakwa Manase), Gadi mwana Susi; ¹² ukufuma ku mukowa wakwa Dani, Amele mwana Gemali; ¹³ ukufuma ku mukowa wakwa Ashere, Seturi mwana Mikaele; ¹⁴ ukufuma ku mukowa wakwa Naftani, Nabi mwana Bofsi; ¹⁵ ukufuma ku mukowa wakwa Gadi, Genele mwana Maki. ¹⁶ Aya eyali emashina ya bantu Mose atumine mukulengula impanga. Mose aleita Hoshea mwana Nuni peshina lya Yoshua. ¹⁷ Mose abatumine mukulengula impanga ya Kenani. Atile kuli bena, ''Nineni ukufuma mu Negebu no kuya ku caalo campili. ¹⁸ Lengweni icalo ukumona ifyo cili. Moneni na bantu baikalamo, nga cakuti balikosa nangu balinaka, nangu cakuti banono nangula bengi. ¹⁹ Moneni ifyo cili icalo ico bekalamo. Bushe cisuma nangula cibi? Bushe misumba nshi yaba mulya? Bushe yaba nge nkambi? ²⁰ Moneni ifyo impanga yaba, nga cakuti isuma ukukushamo ifyakulya nangu iyo, nangu cakuti mwaliba ifimuti nangu iyo. Mube abakosa na ukuletapo fimo ifyakufuma mu calo.'' Nomba inshita yali yafisabo fyantanshi ifyapya ifyamyangashi. ²¹ Eico abantu baninine nokuyalengula icalo ukufuma mu matololo ya Sini ukufika na Reobe, mupepi naku Lebo Hamati. ²² Baninine ukufuma mu Negebu no kufika mu Hebrone. Ahimani, Sheshai, na Talmai, ba mwana Anaki bali kulya. Nomba Hebroni yakulilwe imyaka cine lubali ilyo Zoani talabako mu Egypto. ²³ Elyo bafikile ku mumana wa Eshekole, baputawile ne misambo ya cisansangu ca mwangashi. Bacisendele na pa mabeya ya bantu aba mwibumba lyabo. Kabili baletele na ma pomegranate na makunyu. ²⁴ Ilya ncende yainikwe umumana wa Eshekole, pa mulandu wa cisansangu ico abena Israeli baletema kulya. ²⁵ Panuma ya nshiku amakumi yane, ba bwelele mukulengula icalo. ²⁶ Babwelele kuli Mose, Aaroni, na shonse imishi sha bantu ba kwa Israeli mu matololo ya Parani, ku Kadesha. Babweseshe amashiwi kuli bena na mu mishi shonse, kabili ukubalanga ifya sombwelwe ukufuma muli ilya mpanga. ²⁷ Baebele Mose, ''Twalifikile mu calo ico wa tutuminemo. Kwena ci fumfumunafye umukaka no buci. Ifi efifuma kuli cena. ²⁸ Eico, abantu abakuula amayanda yabo kulya balikosa. Twalimweneko na bana bakwa Anani kulya. ²⁹ Amaleke aikala mu Negebu. Hiti, Yebusi, Amore bakwata amayanda mu calo ca mpili. Kenani aikala pa mumana kabili ukukonkafye umu mana wa Yodani.'' ³⁰ Elyo Kalebu atalalike abantu abali pa ntanshi yakwa Mose no kutila ati, ''Lekeni tunine na ukuyapoka ifiputulwa fya mpanga, pantu ifwe tuli noku ci cimfya. ³¹ Lelo bamo abantu abaile nankwe ba tile, ''Teti tukwanishe ukubacimfya abantu pa mulandu wakuti balikosa ukucila ifwe.'' ³² Eico basalangenye ulukumo ukushinguluka ukuleta ku bantu bakwa Israeli palwa calo ico bailelengula. Batile, ''Icalo ico twaloleshepo calo cilya abaikalamo bonse abantu abo twa mwene bantu abafimo ifikalamba. ³³ Kulya twamweneko na mapaka, abana bakwa Anaki, abantu abafumine ku mapaka. Kumenso yesu twali kwati tupaso ukupalanya nabena, kabili ifi efyo twali mu menso yabo.''