¹ Lekeni njimbile umutemwikwa wandi, ulwimbo lwa mu temwikwa pebala lya mwangashi wakwe. Umutemwikwa wandi alikwata ibala lya mwangashi pa lupili ulwa mufundo. ² Alilifukilile, nokufumyamo amabwe, na ukubyalamo umwangashi uwa wamisha. Akulile ulupungu pa kati kaliko, kabili na ukukula ica kukaminamo umwangashi. Alicilolele ukuti cikatwale imyangashi, lelo catwele imyangashi ya mpanga. ³ Eico nomba, mwebekashi ba mu Yerusalemu na bantu bakwa Yuda, pinguleni pakati kaine na ibala lyandi ilya myangashi. ⁴ Finshi fimbi ifingacitwapo pe bala lyandi ilyamyangashi, ifyo nshacitamo? Elyo ndecilolela ukuti calatwala imyangashi, mulandu nshi catwalile imyangashi ya mpanga? ⁵ Nomba nalamyeba ifyo ndi no kucita kwibala lyandi ilya mwangashi: Ndi nokufumyako ulubao, ndi nokulyoca, nkalipilibula ukuba incende ya mulemfwe, kabili nkatobaula icibumba ca ciko, kabili cikanyantaulwapo. ⁶ Nkacileka icasulwa, kabili tacakatungwilwe nangu ukufukililwa. Eico, ifimpusa na imyunga fikamenamo. Nkakambisha amakumbi ukukana loka pali lyena. ⁷ Pantu ibala lya myangashi ilya kwa Yawe wa mabumba ni ng'anda iya bena Israele, kabili umuntu wakwa Yuda efilimwa ifyo atemenwe ukulimba; alelolela umulinganya, lelo kwena, kwali ukwipaiwa; pamulandu nobulangami, lelo kwena, babilikishe ukuti bafwiwe. ⁸ Ubulanda kuli abo abaisansha mu ng'anda ne ng'anda, abaisansha mwi bala ne bala, mpaka takuli umuputule uwashala, kabili imwe mweka mwashala mu calo! ⁹ Yawe wa mabumba anjebele, amayanda ayengi yakashala umwabula nangu fimo, nangu ayakalamba nayawamisha sana, umwabula nangu umo umwikashi. ¹⁰ Pantu ba ekera ikumi ayebala lya mwangashi yakasombolwafye imbeketi imo, kabili dalamu imo iya mbuto ikafumyafye itepe limo. ¹¹ Ubulanda kuli abo abashibuka ku maaca mu kufwaya ifyakunwa ifikola, abo abakokola ukufika ubushiku mpaka umwangashi wabakola. ¹² Basefya nefilimba fya sango, ne cilimba ca nsale, akaoma ka nyenjele, ne cimpeeta, kabili nomwangashi, lelo tabalolesha pa mulimo wakwa Yawe, nangu ukusakamana imilimo ya minwe yabo. ¹³ Eico abantu bandi nabengila muli bunkole pa kubulisha ubwishibilo; nabashimucindikwa babo bakekatwa insala, kabili abantu babo tabakakwate ifyakulya. ¹⁴ Eico inshishi naikwata icilaka icikalamba sana kabili naisula akanwa kaiko sana; ubucindami bwabo, abantu, intungulushi shabo, na icimfundawila kabili nabo abasangalala muli bena, baya mu nshishi. ¹⁵ Umuntu akapatikishiwa ukukontama, no muntunse akacefiwa; amenso yaba shimucindikwa yaka sebana. ¹⁶ Yawe wa mabumba akasansabikwa ku mulinganya wakwe, kabili Lesa wa mupashi akailanga uwamushilo ku bulungami. ¹⁷ Elyo impungu shikalalya umulemfwe wa shiko, na mufyaonaika, impaanga shikalya nge mitula tula. ¹⁸ Ubulanda kuli abo abatinta ulubembu ku myando na kuli abo abatinta ulubembu kwati ni ku mwando wa cikotikaala. ¹⁹ Ubulanda kuli abo abatila, ''Lekeni Lesa endeshe, lekeni abombe mukwangufyanya, pakuti twamona ukuti filecitika; kabili lekeni amapange ya washila wakwa Israele yeese, pakuti twingabeshiba ²⁰ Ubulanda kuli abo abakuta ifibi ifisuma, abalanga imfifi nga ulubuto, na ulubuto nga imfifi; abalanga ifyalula nga ifyalowa, na ifyalowa nga ifyalula! ²¹ Ubulanda kuli abo aba mano ku menso yabo, kabili abashilimuka mu ku mfwa kwabo! ²² Ubulanda kuli abo ababa bakalapashi mu kunwa umwangashi, kabili abakosa mu kusankanya ifikola; ²³ abapela insambu ku mubifi pamulandu we fisa kanwa, na ukupoka umulungami ubulungami bwakwe! ²⁴ Eico filya umulilo oca icani, na icani icauma cikapya ku lubingu, eco imishila yafiko ikabola, na amabula yafiko yakolulwa ngo lukungu. Ifi fikaciika pamulandu balikana ifunde lya kwa Yawe Lesa wa mabumba, kabili pamulandu wakususha ishiwi lya wa mushilo wakwa Israele. ²⁵ Eico ubukali kwa kwa Yawe bwaishile pa bantu bakwe. Atambulwile ukubko kwakwe pali bena na ukubakanda. Impili shatenta, ne fitumbi fyabo fyaba kwati fisoso fya mu misebo. Muli ifi fyonse, ubukali bwakwe tabwa cefiweko; eico, ukuboko kwakwe kulifye ukwatambulukka. ²⁶ Akemya uluunga lwa cishibilo ku nko shakutali na ukulishisha umu nsoli kuli abo aba ku mpela ya calo. Moneni, bakesa bwangu bwangu kabili mukupumikisha. ²⁷ Tapali nangu umo uwamaka nangu ukuipununa muli bena; tapali nangu umo uuleshipula nangu uulele. Takuli nangu bamo abo amalamba yabo yakakakuka, nangu inshinga sha ku nsapato shabo ishaputauka. ²⁸ Imifwi yabo yalitwa na amata yabo yonse naya petama; amabondo yabo kabalwe babo yaba nge ceela, kabili imipeto yama celeta yabo yakaba nga kankungwala. ²⁹ Ukubuluma kwabo ikaba nge ya nkalamo; bakabuluma nge nkalamo ishinono. Bakabuluma na ukwikata ica kutakanya na ukucitintila ukutali, ukwabula nangu umo uwa kupususha. ³⁰ Pali bulya bushiku bakabuluma ku cakutakanya nga icibulumo ca bemba. Nga cakuti umo alolesha pa calo, akamona imfifi na ubucushi; nangu lubuto lukasanguka imfifi ku ma kumbi.