¹ Mumwaka walenga ikumi na naine, apo Hesekia atekele icalo ca Yuda, Senakeribu imfumu nkalamba iya bena Asiria alisanshile imisumba ya malinga yonse mu calo ca Yuda, nokucimfya alicimfishe. ² Elyo Senakeribu abula umukalamba wa mpuka nkalamba iya fita fyakwe, Rabushake, pamo ne bumba ilikalamba ilya fita, amukonkomeshe ukufuma mu Lakishi, nokuya ku Yerusalemu kukuyatinya imfumu Hesekia pakuti icimbe. Uyu mukalamba wa fita aya iminina mupepi no mulonga wa cishiba ca pamulu, icaba pa musebo wakuya kwi bala lyakwa kasamba ukwalebombela abantu abalecapa insalu. ³ Elyo abena Yuda batatu baya kumukalamba wa fita, umo ni Eliakimu umwana mwaume wakwa Hilikiya, uwali mushika wa kwisano, umunabo umbi nao ni Yoa umwana mwaume wakwa Asafu, kalemba wa fyalecitika mu calo. ⁴ Uyu Rabushake nao epakulabeba ati, ''Eba Hesekia ukuti, ifi efyo imfumu nkalamba iya bena Asiria yasosa ukuti, 'Bushe nipali cinshi ushintilishe icicetekelo cobe? ⁵ Bushe iwe uletontonkanya ukuti ukalandaukafye amashiwi yeka yeka auti e mano, nangu maka yakulwa inkondo, mwa? Bushe nani uyo wine washintililamo pakuti iwe unsangukile? ⁶ Mona, iwe ushintilile pali Egypti, uwaba nge nkoto ye tete iyalepauka iyakuti lilya umuntu ashintilileko, yamucena mu minwe. Ifi efyo Farao imfumu ya bena Egypti aba. ⁷ Kabili efyo acita na kuli bonse abashintilila kuli ena. Kabili nga wasosa kuli ine auti, ''Ifwe tucetekele pali Yawe Lesa wesu,'' bushe teuyo incende shakwe mu tupili ishakupepelamo elyo nefibimbili fyakwe ifya malambo imfumu Hesekia aonawile? Elyo yaeba abena Yuda na bena Yerusalemu aiti, ''Muli nokulapepelafye pali ubu bulambo bumo mpo?'' ⁸ ''Kanshi isa nomba upangane na shikulu, imfumu ya ku Asiria. Nomba ndi nokukupela bakabalwe amakana yabili nga wakwata abantu abakumanina abakuninapo! ⁹ Kuti wafulumuna shani cilolo umo uwacepeshapo pali bacilolo bakwa shikulu, ilyo washintilila pa bena Egypti ku maceleta na bashilika ba pali bakabalwe! ¹⁰ Nomba iwe uletontonkanya ukuti ine naitendekafye pakwisa sansa icalo nokuconaula, ukwabula ukuti Yawe asuminishe? Ala ni Yawe umwine ewanjeba ukwisa sansa cino calo nokuconaula.'' ¹¹ Elyo Eliakimu, na Shebina, na Yoa, baeba uyu Rabusheki abati, ''Twapapata, landa kuli ifwe fwebabomfi bobe mu cilimi ca Ciaramaiki pantu tulomfwa. Wilanda kuli ifwe mu Cihibulu, pantu balya bonse abali pe linga nikuno balekutika.'' ¹² Nao Rabusheki abankula ati, ''Bushe imwe kumo kwine ne mfumu yenu muleti nimwefye mweka imfumu yandi itumineko pakwisalanda iiyi milandu yonse? Ala iyoo, ine ndeeba balya bantu abali pe linga, abo pamo naimwe muli nokulya amafi yenu nokunwa imisu yenu?'' ¹³ Elyo uyu Rabusheki kabili aiminina aololoka nokubilikisha mu Cihibulu ati, ''Umfweni ishiwi lya mfumu nkalamba, imfumu yaku Asiria! Ifi efyo imfumu yasosa aiti, ¹⁴ ''Imwe mwileka Hesekia amabupe, pantu takwaba amaka ayakumupususha iyoo. ¹⁵ Mwileka Hesekia alemusembeleka ukucetekela muli Yawe nga alanda ukuti, ''Yawe aletupokolola, uno musumba tawapelwe mu minwe ya mfumu yaku Asiria.'' ¹⁶ Mwimufwila Hesekia.' Ifi efyo imfumu yaku Asiria yasosa ifyakuti, 'lekeni tumfwane mumutende, mwise mucimbefye kuli ine. Awe ninshi, nacilaumo pali imwe ali nokulya kwibala lyakwe ilyamyangashi nemikunyu, nokunwa ameshi ukufuma mucishima cakwe. ¹⁷ Mpaka kese mubula nokumutwala ku calo icabafye ngecalo cenu. Icalo ca ng'ano no mwangashi upya.Icalo camikate namabala yamyangashi. ¹⁸ Mwileka Hesekia alemubepa`pakulamweba ukutila ''Yawe aletupokolola!' Bushe kwalibako umulngu wamushobo uuli onse uwapokololako ku calo cauko ukufuma kukuboko kwa mfumu yabena Asiria? ¹⁹ Nge milungu yaku Hamati, neya ku Apadi, pali nomba alikwi? Imilungu yaku Sefafaimu, nayo nomba ilikwi? Bushe yalipokolola Samaria ukfuma mukubko kwandi? ²⁰ Bushe mulungu nshi pamilungu ifi fyonse uwatala aupusushako icalo ca uko kuli ine? Nga nomba imwe cinshi ico muleleenganishisha ukuti Yawe akapusushako Yerusalemu kukuboko kwandi?''' ²¹ Lelo abantu baikalafye tondolo ukwabula ukuti bamwasuke, pantu imfumu yalikonkomeshe bonse aiti, ''Mwimwasuka. ²² Elyo Aliakimu mwana mwaume wakwa Hikiya uwali mushika wa kwisano, Shebina kalemba mukalamba wa kwisano na Yoa mwana Asafafu kalemba wafyalecitika mu fyalo, baya kuli Hesekia nabalepula insalu shabo, nokumulondolwela ifyo uyu Rabushake aciba alelanda.