¹ Uwene po aken'ya ubwinji ubwa banthu, akakwera pigamba. Uwene po akikala pansi, abasambiri bakwe bakajenda kwa uyo. ² Po akigula mulomo wakwe nukwamba ukusambizga, po akati, ³ "Bali nu mwabi bo bakumanya ukusoberwa kwabo ukwa uzimu, chifukwa bwabo ubufumu bwa kumwanya. ⁴ Bamwabi bo bali ni chitima, chifukwa balikondwesyeka. ⁵ Bamwabi bo bali myaa, chifukwa bo balipochelera ichalo icha pansi. ⁶ Bamwabi bo bakwivwa inzara ni nyota iya wunenesyo, chifukwa baliyikuta. ⁷ Bali nu mwabi bo bakwivwira abamwabo ubwira, chifukwa bakwinzu kupochelera ubwira. ⁸ Bali nu mwabi bo umoyo wabo wuzelu, chifukwa bo bakwinzu kumwen'ya uMulungu. ⁹ Bali nu mwabi bo bali nu mutende, chifukwa bakwinzu kupundika abana aba Mulungu. ¹⁰ Bali nu mwabi bo bakuyimba chifukwa icha wunenesyo, chifukwa ubufumu bwa kumwanya bwabo. ¹¹ Mwe bamwabi mwe abanthu bakubanyoza, nu kubayimvya, bakwinzu kubanenera ivyilenga wubibi wonsi chifukwa chiine. ¹² Musechere, mukondwe, chifukwa imphoto yinyu yikuru kumwanya. Chifukwa mo bakabayimvizga abaneneri bo bakabako po imwe mutaliko. ¹³ Imwe mwe libeya ilya charu icha pansi. Ibeya ilyo nanthi lyamala amaka, amaka gakwe gangagaluchirama bulibuli? Lite nimbombo pa chinthu chonsi kweni ukuti lisumbiche panzi po abanthu balilyate. ¹⁴ Imwe mwe mwe kulama ukwa charu icha pansi. Akaya ko kazenjeka pamwanya pigamba katangavwama. ¹⁵ Batangakozga ukoroboyi nukumubika kunthende ku chidunga, kweni ukumubika pamalo gakwe, po ukulamira bonsi bo bali munyumba. ¹⁶ Umwakuyanana, uwuzelu winyu wulamire panthazi izga banthu mwakuti ben'ye imbombo zginyu izginza ukuti bamuchindiche uBaba winyu uwa kumwanya. ¹⁷ Mutaghanaghanaje ukuti ninza ukunangan'ya amalango panji vyo abaneneri bakalemba. Nthinzire ukunangan'ya, kwene ukukwanirisya. ¹⁸ Pakuti nadi nkhubabuzga ukuti chinza ukuti icharo icha kumwanya ni cha pansi vimale ukurusya ukuti akalemba kansi koka pamo ukuti akachigamba aka lemba ukuti kamale mwi dango mu nzira yiliyonsi, ukuti vinthu vyonsi vileche ukuchitika. ¹⁹ Chifukwa wonsi wo akunanga lyoka ilya madango agansi aga nukusambizga abanthu ukuti bachite uwonye, akwinzu kupundika 'we munsi nkhani' mubufumu bwa kumwanya. Kwene wo akugachita nukugasambizga, uwene akwinzu kupundika 'mukulu' mubufumu bwa kumwanya. ²⁰ Pakuti nkhubabuzga ukuti nanthi wunenesyo winyu wutangaba winji ukurusya uwa balembi nu baFarisi,mutakwinzu kwinjira mubufumu ubwa kumwanya. ²¹ Mukivwa ukuti kukaneneka ku bakale, 'Utagoje,' 'wonsi wo akugoga akwinzu kupalamula mulandu.' ²² Kwene ine nkhunena kuimwe ukuti wonsi wo akukalalira umukamu wakwe ukwambura ichifukwa, inthi ayinze awupalamule mulandu, wonsi wo inthi ayinze anene nu mukamu wakwe, 'we wamusita ukwenelera iwe!' akwinzu kupalamula gahena ilya moto. ²³ Nanthi ukwinza ni chakupereka chako kwi guwa ilya nsembe, po nanthi wakumbuchira ukuti um'bali wako ali niwe ni chifukwa, ²⁴ po uchileche ichakupereka chako panthanzi piguwa ilya nsembe, po ujende. Uye uwezezge umutende nu m'bale wako, po nanthi wabwerako upereche ichawanangwa chako. ²⁵ Mupepesan'ye lubiro nu wamwinyu wo umunanjiye po ulinawo panzira, pakuti uwene atakutwale ku wo akweruzga umulandu, po uwakweruzga uyo angakutwala kwa wo akwenerezga amalango, iwe po bakusumbire mu ndende. ²⁶ Nkhubabuzga nadi, mura te ufumemo mpaka utwale wasuti indalama iyaumaliro iyinsi. ²⁷ Mukivwa ukuti kukaneneka, 'Utapangaje ivya uhule.' ²⁸ Kwene ine nkhubabuzga ukuti wonsi wo akupitilira kumwenerezga mwanthanda nukumwanza, wachita kale nawo uhule mu moyo wako. ²⁹ Nanthi ilyinso lyako ilya ku ndyero likukunanjisya, ulifumye nu kulitaga. Pakuti chinza kuiwe ukuti ichibalo chako choka chinanjiche ukuchila ukuti mubili wako wonsi wusumbiche mu gahena. ³⁰ Nanthi inyobe yako iya kundyero yikukunanjisya iwe, ulidumule nu kulitaga. Pakuti chinza kuiwe ukuti ichibalo chako choka chinanjiche ukuchila ukuti umubili wako wonsi wumalire mu gahena. ³¹ Kwene kukanenekaso ukuti, 'wonsi wo akuleka mwanthanda wakwe, amupe ukalata uwa kulekanira.' ³² Ine po nkhunena kuimwe ukuti wonsi wo akuleka umwanthanda wakwe, kwambura ichifukwa icha uhule, akumubika mu wubibi uwakuchita uhule. Uyo wonsi wo akumusenda mwanthanda wo bamuleka munzira iyi, akupanga uhule. ³³ Mukivwaso ukuti kukaneneka ku bakale, 'mutanene ukwambura ukukwanirisya, ukwenera kutwara uwunenesyo wako kwa Mulungu wako.' ³⁴ Kwene ine nkhunena kuimwe, mutanene umwakulapa konsi, olo kutambula kumwanya, chifukwa kuli mpando uwa Mulungu; ³⁵ olo ukunena ni charo icha pansi, chifukwa po pakulyata ivinama vyakwe ivya Mulungu; olo kunenera nu Yerusalemu, chifukwa go malo aga Mfumu yo yikulu. ³⁶ Olo kulapira itwe lyako, chifukwa utangang'anamula isisi lyoka ukuba lizelu olo lifitu. ³⁷ Amazgo ginyu gabe, 'Ee, ee,' 'Awe, awe.' Ichakusanzizga apo chikufuma ku mulwani. ³⁸ Mukivwa ukuti kukaneneka, 'ilyinso pi lyinso, ilyino pi lyino.' ³⁹ Ine nkhunena kuimwe, mutamukanizge munthu wo mubibi. Kwene wonsi wo akwinzu kukukoma iwe palusaya lwako ulwa malyero, umung'anamulirenso lwamwabo. ⁴⁰ Uwene wo akwanza ukuya niiwe ku mulandu nu kusenda amalaya gako, umuzomerezgeso ni chakuvwinkhana chako. ⁴¹ Uwene wo akukukakamizga ukuti umubichizge inzira yoka, ujende nawo zibiri. ⁴² Umupe uyo wo akukulaba, uwene wo akwanzu kukukongola, utamung'anamuchire. ⁴³ Mukivwa ukuti kukaneneka, 'Umutemwe umukamu wako, umubenge mulwani wako.' ⁴⁴ Ine nkhunena kuimwe, mubatemwe abalwani binyu nu kubaputira bo bakubayimvya, ⁴⁵ uwonyene ukuti mube mwe bana aba Baba winyu uwa kumwanya. Pakuti uwene akulamisya izuba lyakwe pa babibi na binza, po akutonyesya imvula pa binza na bo te binza. ⁴⁶ Chifukwa nanthi mukutemwa bo bakubatemwa, phindu lyakwe lyachoni? Napo bangaba ba misonkho, asi bope bakupanga ichonyene? ⁴⁷ Nanthi mukulamuka abakamu binyu bekabeka, chinthu buli cho mukuchita icha palubazu? Na banthu abakunzi asi bope bakuchita ichonyene? ⁴⁸ Umwakuyanana bulo mube bakufikapo, ngati mo Baba winyu uwa kumwanya mo abeleye umwakufikapo.