¹ Po panapo po uYesu akamalizgaga ukunena amazwi gonsi aga, akati ku basambiri bakwe, ² "Mukumanya ukuti nanthi amasiku gabiri gajenda Paska inthi yinze, Umwana uwa Munthu akwinzu kuperecheka nu kupayikika pa mphinjika." ³ Po aponyene bakawungana abansembe abakuru na basongo aba banthu ukwakulonjera imilandu ukwa songo uwa bansembe, nizina lyakwe uKayafa. ⁴ Bakapangana umo mo bangamulemera uYesu umwakuchenjera ukuti bamugoge. ⁵ Abene po bakanena, "Pisiku ilya chakurya awe, ukuti pataye ichongo icha banthu." ⁶ Po aponyene uYesu po akaba ku Betaniya munyumba iya Simoni uwa mawumbombo, ⁷ umwanthanda akajenda kwa wuyo ni botolo ilya mafuta ilya kwizula na mafuta agakununtchira aga narido aga mutengo uwa patali, po akitira pitwe lyakwe, po uwene akaba pa chakurya. ⁸ Po aponyene abasambiri bakwe bakati ben'ya, po bakakaripa bakati, "Choni cho mwananga amafuta aga? ⁹ Pakuti amafuta aga nge bangukazga ni ndalama izginji nukubapa abanthu abakavu." ¹⁰ Kwene uYesu pakumanya, akanena nabo, "Choni cho mukumutamya umwanthanda uno? Pakuti uwene antchitira imbombo iyinza. ¹¹ Pakuti inyengo yonsi mulinabo abakavu poka niimwe, kwene inyengo yonsi mute niine. ¹² Pakuti umwanthanda uyo, po uwene ayitiraga amafuta pa mubiri wane, abombera nzira imbombo mukusunjika kwane. ¹³ Ine nadi nkhunena niimwe, kulikonsi ubuthenga ubwinza ubu wulipharazgika pa charo chonsi icha pansi, cho achita umwanthanda uyu chope chayu kuneneka ukuti bamukumbukiraje." ¹⁴ Po aponyene woka uwa teni na bamwabo babiri abo, wo izina lyakwe wo uYudasi Sikariyoti, akaya ku bansembe abasongo ¹⁵ po akati, "Mukwanza kumphachi, ine po inthi ninze impereche uwene kuimwe?" Po abene bakamuberenjera indalama izga masiliva izga ma teni gatatu. ¹⁶ Po ukwambira aponyene uwene akalondoralondora inyengo iyinza iyakuti amupereche UYesu. ¹⁷ Isiku ilyakwamba ilya buledi uwambura ichakututumusya, abasambiri bakinza kwa Yesu, bakati, "Mukwanza tuye tumbanjire kwii iPaska ukuti muye murye?" ¹⁸ UYesu po akati, "Bukaji mu chikaya icha munthu uwunji muye mumubuzge ukuti, 'Umusambizi atubuzga, "Inyengo yane yapalamira. Nkhwinzu kurya Paska kuimwe ukonyene poka na basambiri bane."'" ¹⁹ Po abasambiri bakapanga ukuyanana na mo UYesu akababuzizga, bakanozga Ipaska. ²⁰ Po pakufika pa nyengo iya chamabwira, Uwene akikala pa chakurya poka na basambiri teni na bamwabo babiri. ²¹ Po aponyene po bakaryanga, uwene akati, "Ine nadi nkhunena niimwe, woka wuimwe akwinzu kumphereka ine." ²² Po abene ichitima chikabalema nkhani ichikuru, po bakamba ukunena nawo woka na woka, "Ka nene, Mulungu?" ²³ Uwene po akazgora akati, "Uyo wo akukwamvya inyobe yakwe poka niine mumbale, uyonyene wo akwinzu kumphereka. ²⁴ Po nadi Umwana uwa Munthu inthi ajende, ngati mo kukalembechera izga kwa wuyo. Kwene soka alinalyo umunthu wo inthi amupereke Umwana uwa Munthu! Nge chikaba chinza ukuti umunthu uyo atapapwe." ²⁵ Po Uyudasi, wo akampereka akanena akati, "Ka nene, musambizi?" Uwene akamuzgora akati, "Iwe wanena ubonye." ²⁶ Po aponyene abene po bakaba ukuti bakurya, UYesu akasenda ubuledi, po akayiputa, po akamensura. Po akati abapa abasambiri bakwe, akati, "Sendi, murye. Ichi wo mubiri wane." ²⁷ Po akati asenda ulupindi, akayiputa, po akabapa, po akanena, "Mung'were ichi, mwensi. ²⁸ Pakuti ichi wo udaba wane uwi pangano, wo akwitichira abanthu abinji ukuti ukwananga kwabo kugobochereche. ²⁹ Ine po nkhunena niimwe, nthaling'weraso ichipaso ichi icha mphesya, ukufichira isiku lyo nkhwinzu kung'weraso icha nomba poka niimwe mubufumu ubwa Baba wane." ³⁰ Po aponyene po bakimba ulwimbo, po bakafuma ukuya kwigamba ilya azitona. ³¹ Aponyene Uyesu akanena nabo, "Imwe mwense inthi mufurwe ubusiku ubwilero chifukwa chiine, pakuti kukalembeka, 'Ndiyinza imukome umubusa, po zikwinzu kusatana imberere izga gulu.' ³² Nanthi ninza nanyamuka, nkhwinzu kubarongozga ukuya ku Galileya." ³³ Kwene uPetro akanena nawo, "Kwene nangabuli bonsi inthi binze bafurwe chifukwa chiimwe, ine neka nthaliyinza nkhalare." ³⁴ Po Uyesu akanena nawo, "Ine nadi nkhunena niiwe, ukuti ubusiku ubwilero, umukorwe achili atalizire, ukwinzu kunkhana ine katatu." ³⁵ UPetro akanena nawo, "Ine napo ningafwa niimwe, nthaliyinza imbakane imwe pole." Bakanenaso ubonyene abasambiri bonsi. ³⁶ Aponyene Uyesu akaya nabo amalo agakupundika ukuti Gesemani, akanena na basambiri bakwe, "Imwe mwikale panapa, najenda uko nayu kuyiputa." ³⁷ Po akamusenda Upetro na bana babiri aba Zebediya poka na wuyo, ichitima chikambu kumulema nu kumara amahara. ³⁸ Uwene po akanena nabo, "Umoyo wane wukwivwa ichitima ichakuya nacho kumfwa. Yikali panapa muchesye poka niine." ³⁹ Po uwene akaya panthanzi kali mphi, akafugamira nukugwisya inkhope yakwe pansi, po akayiputa. Po akati, "Baba, nanthi chingaba chakwenelera, ulupindi ulo lumphitilire. Kwene, te mo ine nkhwanzira, kwene imwe." ⁴⁰ Po akinza ku basambiri, akabaga abene bali mutulo, akanena nu Petro, "Ka mwapotwa ukuchesya niine ora lyoka? ⁴¹ Muchesye nu kuyiputa ukuti munginjira mu kuyezgeka. Umuzimu uwene wukwanza, kwene umubiri womwakulita." ⁴² Akajendaso akachibiri, po akayiputaso. Akati, "Baba wane, nanthi ichi chitangamphitilira, kwene ing'were ichi, ukwanza kwinyu ko kubombwe." ⁴³ Po akinzaso, akaga bali mutulo, pakuti ivikumbisi vyabo vikaba vyakulita nu tulo. ⁴⁴ Po akabalekaso, po akayiputaso akachitatu, akanenaso ubonyene amazwi ago. ⁴⁵ Aponyene po akinza ku basambiri bakwe, po akanena nabo, "Ka muchili mugonire mukutuzga? Yen'yi, inyengo yafika, Umwana wa Munthu inthi aperecheke mu nyobe izga bakwananga. ⁴⁶ Po nyamuchi, tujendaje. Yen'yi, uwene uwakumphereka aparamira." ⁴⁷ Ubonyene uwene po achili akunena, yen'yi Ujudasi, woka uwa ba teni na bamwabo babiri abo, akinza, poka na wuyo ni gulu ilyinji ilya banthu, bo bakinza na malupanga ni nsanzu, ukufumira ku bansembe abasongo na basongo aba banthu. ⁴⁸ Kwene wo akamuperekaga akabapa ichimanyikwiro, akanena, "Wo inthi ninze imufyomphe nu mulomo, wo wunuyo. Wo mwinze mumuleme." ⁴⁹ Po aponyene po akinza kwa Yesu, akati, "Mutende wube niimwe, Musambizi!" Po akamufyompha. ⁵⁰ Po Uyesu akanena nawo, "We wamwitu, bomba bwelere cho ukwanza." Po aponyene abene bakinza, po bakamulema Uyesu inyobe, nukumulema. ⁵¹ Nomba Yen'yi, woka wuibo wo akaba poka nu Yesu akagolosya inyobe yakwe, po akaguza ulupanga lwakwe, akamudiba nalo umuzga uwa mukuru uwa bansembe, akadumula ikutu lyakwe. ⁵² Po aponyene Uyesu akanena nawo, "Bwezezga ulupanga lwako mumalo gakwe, pakuti aliwonsi wo akulema ulupanga lulimugoga lo lupanga. ⁵³ Pamo ukughanaghana ukuti nthangamulaba Ubaba wane, ukuti anthumire amagulu aga bankhondo agakuchira twelovu aga bangelo inyengo yiniyi? ⁵⁴ Kwene ubonyene amalemba ganginza gakwanirisyiche bulibuli, pakuti chakwenelera ukuti mo chibere?" ⁵⁵ Inyengo iyonyene Uyesu akanena nu bwinji ubwa banthu ubo, "Ka mwangwinza ukundema ine na malupanga ni nsanzu ngati ne munkhungu? Isiku ni siku nkhwikala mu charichi ukusambizga, po mutakandema. ⁵⁶ Kwene vyonsi ivi vyo vyachitika ukuti ivyakulembeka ivya baneneri vikwanirisyiche." Aponyene abasambiri bonsi bakamuleka weka, bakachimbira. ⁵⁷ Bo bakamulema, Uyesu po bakajenda nawo kwa Kayafa usongo uwa bansembe, ko bakawungana abalembi na basongo bwelere. ⁵⁸ Kwene Upetro akamulandata kuwutali ukufichira ku bwalo ilya songo uwa bansembe. Akinjiramo, po akikala pansi na banyamata ukuti ayen'ye ubumaliro. ⁵⁹ Po abansembe abasongo na basongo aba milandu bonsi bakalondoralondora uwukaboni uwilenga uwakumususya Uyesu, ukuti bamugoje uwene. ⁶⁰ Kwene batakawaga, nangabuli bakinza abakaboni abilenga abinji. Kwene pisinda lyakwe bakinza babiri ⁶¹ bakati, "Uyu akanena akati, 'Ine ninganangan'ya icharichi nukuzengaso amasiku gatatu.'" ⁶² Po usongo uwa bansembe akimilira akanena nu Yesu, "Ute uzomere chilichonsi? Choni ichi cho aba bakukunenera iwe?" ⁶³ Kwene Uyesu atakanena chilichonsi. Po usongo uwa bansembe akanena nawo, "Nkhulapisya piiwe Umulungu uwa moyo, ukuti utubuzge iswe ngati iwe we Khristu, Umwana wa Mulungu." ⁶⁴ Uyesu akanena nawo, "Mwanena mwemwe. Kwene nkhunenaso kuimwe, ukwamba ukwa nomba mukwinzu kumwen'ya Umwana wa Munthu ayikaye ku nyobe iya ndyero iya maka, nukufika pa mabingo aga kumwanya." ⁶⁵ Aponyene po usongo uwa bansembe po akalepura ivyakuzwara vyakwe, akati, "Akumuchitira Umulungu mutafu! Tukulondolerachi abakaboni abanji? Yen'yi, nomba mwivwa umutafu uwo. ⁶⁶ Mukughanaghana bulibuli?" Abene bakazgora bakati, "Uyu wo wakwenelere ukumugoga." ⁶⁷ Aponyene bakamuswilira amate paminso gakwe, po bakamukoma, po abanjiso bakamukoma na makofi, ⁶⁸ bakati, "Utulote iswe, Khristu iwe. Wo akukoma iwe wuwenu?" ⁶⁹ Upetro akikala pansi mukasi umwakulonjera amalandu, po umwanthanda akaya kwa wuyo akanena, "Iweso ukaba nu Yesu uwa ku Galileya." ⁷⁰ Kwene uwene akakana paminso aga banthu bonsi, ukuti, "Cho ukunena icho ine nthachimanyire." ⁷¹ Uwene akati afuma nukuya ku kanyumba akakufyenyeka, umwanthanda yumo akamwen'ya, akanena nabo bo bakaba panapo, "Uyeso akaba poka nu Yesu uwa mu Nazareti." ⁷² Po uwene akakanaso nukulapa, "Nthamumanyire umunthu uyo!" ⁷³ Pakati pajenda inyengo iyakuchepa bulo, abo bo abakwimilira apo bakinza, bakanena nu Petro, "Nadi iweso we woka wabo, pakuti ukunena kwako kukulongozga ukuti uli poka nawo." ⁷⁴ Po aponyene uwene akamba ukutembelera nu kulapisya ukuti, "Nthamumanyire umunthu uyo," po panapo umukorwe akalira. ⁷⁵ Upetro po akakumbuchira amazwi go Uyesu akanena nawo ukuti, "Umukorwe atalizire ukwinzu kunkhana katatu." Po akafumira panzi akambu kulira nu moyo uwa kubaba.