¹ Po nomba uYesu akafuma mu charichi. Po abasambiri bakwe bakinza ukumurongozga akazenjero aka charichi ilyo. ² Uwene po akabazgora akati, "Mutakwen'ya ivi vyonsi fwandi? Ine nadi nkhunena niimwe, pataliyikala ibwe ilinji pibwe ilyamwabo lyo litaligwa." ³ Po uwene akikala pansi pigamba ilya Azitona, abasambiri po bakamulandata po akaba paweka, bakanena, "Mutubuzge iswe vila vililoleka liyi? Po ichimanyikwiro icha kwinza kwinyu choni, ni cha kumala ukwa charo icha pansi apa?" ⁴ UYesu po akabazgora akati, "Mwenerezge, umunthu atabasobezge imwe. ⁵ Pakuti abinji baliyinzira mwizina lyane. Baliyinza banena, 'Ine ne Khristu,' po bakwinzu kusobezga abanthu abinji. ⁶ Kwene imwe mukwinzu kwamba kwivwa izga nkhondo ni mbiri ya nkhondo. Yen'ya, imwe mutadandawule, chakwenelera ukuti ivi viloleche; kwene ubumaliro bwakwe buchili butinzire. ⁷ Pakuti umutundu woka uwa banthu wukwinzu kuba wakwambana nu mutundu wunji. Po kukwinzu kuba inzara ni vindindindi, amalo aga kupambana-pambana. ⁸ Ivyo vyonsi ivyo vyo vykubaba ivyakwamba. ⁹ Aponyene bakwinzu kubatwara mu wuyimvi, po bakwinzu kubagoga. Po abanthu aba mitundu yonsi bakwinzu kubengana niimwe chifukwa chizina lyane. ¹⁰ Po aponyene abinji bakwinzu kutaga ichigomezgo chabo, bakwinzu kutwarana wamwabo nu wamwabo po bakwinzu kutinkhana. ¹¹ Po abaneneri abinji abilenga bakwinzu kunyamuka nukwinzu kusobezga abanthu abinji. ¹² Chifukwa cha kuvura ukwamburu kweruzgika, ichitemwa icha banthu abinji chikwinzu kuba chakukatala. ¹³ Kwene uwene wo akulimbichira ukwinzu kufika pawumaliro, uyonyene wo akwinzu kupona. ¹⁴ Po ubuthenga ubwinza ubu ubwa bufumu bukwinzu kupharazgika pa charo chonsi icha pansi, ukuti wube wukaboni ku banthu aba mitundu yonsi. Po aponyene po paliyinza uwumaliro. ¹⁵ Ichifukwa chakwe, nanthi mwen'ya ichinthu chibibi cho chikunanga, cho chikaneneka nu Danieli wo muneneri, cho chimilira amalo agazelu" (Uwene wo aberenga mwakarata amanye), ¹⁶ "Aponyene bo bali mu Yudeya bachimbilire mwigamba, ¹⁷ wo ali pamwanya pa nyumba atisiche ukuti aye asende vyo vili munyumba yakwe, ¹⁸ nu wo ali mu mugunda atinze kusenda ichakuvwinkhana chakwe. ¹⁹ Kwene soka ku banthanda bo bakwinzu kuba ukuti bali na pakasi na bo bakwinzu kuba bakonsya utwana mu masiku ago. ²⁰ Nomba muyipute ukuti ukuchimbira kwinyu kutabe mu nyengo iya kukatala pamo isiku ilya Sabata. ²¹ Pakuti inyengo iyonyene kukwinzu kuba ukuyimba ukukuru, ko kutakatera kubanjepo nalumo ukufichira ukwa nomba, nadi po kutaliyikalanso. ²² Kwene kulekaje ukugachefyako amasiku ago, nge pate nanthi yumo uwakuponosyeka. Kwene bakagachefya chifukwa icha bakusebeka bakwe. ²³ Aponyene nanthi umunthu anena niimwe, 'Nomba yen'ya, uKhristu ali apa!' pamo 'Ali uko!' mutazomerezge. ²⁴ Chifukwa aba Khristu abilenga balinyamuka na baneneri abilenga bakwinzu kulolesya ivimanyikwiro ivikuru ni vyakuziziswa, ubonyene ukuti baye babapusiche, nanthi chakuzomerezgeka, na bakusebeka bulo. ²⁵ Yen'yi, Ine po nabachenjezgera nzila. ²⁶ Ichifukwa chakwe, nanthi banena niimwe, 'Yen'yi, uwene ali mu chimbalangwa,' mutayeko. Pamo, 'yen'yi, ali mu chipinda mukasi umwa nyumba,' mutazomerezge. ²⁷ Chifukwa ukwinza ukwa Mwana uwa Munthu kukwinzu kuba ngati kamesya, akonyene nanthi kamesya kubufumiro wizuba, kakuloreka mpaka kubwinjilirobwakwe. ²⁸ Kulikonsi ko kuli umuvimba, inzwanga zikwinzu kuwungana ukonyene. ²⁹ Kwene aponyene pisinda apa kuyimba ukwa masiku gala, izuba likwinzu kuba chisi, wope umwezi wutalirongozga nu kulama kwakwe, ni nthondwa zikwinzu kugwa kufuma kumwanya, na maka aga kumwanya gakwinzu kuyinzan'ya. ³⁰ Po aponyene po mwibingo mukwinzu kuloreka ichimanyikwiro icha Mwana uwa Munthu, po imitundu yonsi iya charo icha pansi inthi yinze yiyikome panganga, nukwinzu kumwen'ya Umwana wa Munthu po akwinza pa mabingo aga kumwanya na maka nu wulemelera wakwe uwukulu. ³¹ Po uwene akwinzu kutumizga abangelo bakwe nu kulira ukukuru ukwa lipenga, po abene bakwinzu kuwunganika abakusebeka bakwe ku mphepo folo, ukwambira pawumaliro uwa mabingo ukufichira uwumalireso uwunji. ³² Kwene musambire ni kunyu ichiyerezgero chakwe. Nomba aponyene po insamba yakwe yichiri yiteta, yikulemba amatundu gakwe, mukumanya ukuti ichisiku chili papipi. ³³ Ubonyeneso, imwe po mukwinzu kwen'ya ubonyene, mumanye ukuti uwene ali papipi, nadi pamulyango. ³⁴ Nadi, nkhunena niimwe, ukupapwa uwa nomba mutakwinzu kufumapo ukufichira ivinthu vyonsi ivi vinze vichitiche. ³⁵ Ibingo ni charu icha pansi vikwinzu kufumapo, kwene amazwi gane gataliyifumapo nalumo. ³⁶ Kwene ivi siku ilyo ni nyengo yakwe pate munthu aliwonsi wo akumanya, popenyene napo bangelo aba kumwanya, napo Mwana, kwene uBaba weka. ³⁷ Nomba ngati mu nyengo iya Nowa, ubonyene kukwinzu kuba kwinza ukwa Mwana wa Munthu. ³⁸ Ngati mo kukabera amasiku gala po ichigumura chitinzire, abanthu bakaryanga nu kung'wera, abanavuli bakasendaga abanthanda, bopeso abanthanda bakasendwaga mpaka likinza isiku lyo uNowa akinjira mu ngalaba, ³⁹ po abene batakamanya chilichonsi ukufichira po ichigumura chikinzaga cho chikabamalizga bonsi. Ubonyeneso mo kwayu kubera po Mwana wa Munthu akuyu kwinza. ⁴⁰ Aponyene pakwinzu kuba abanthu babiri mu mugunda, woka akwinzu kusendeka, nu wunji akwinzu kusyala. ⁴¹ Babiri bakwinzu kuba bakusya pa lwara, woka akwinzu kusendeka, nu wunji akwinzu kusyala. ⁴² Chifukwa chakwe mulindilire, pakuti mutakumanya isiku lyakwe ilya kwinzira Mulungu winyu. ⁴³ Kwene mumanye ichi, ukuti umwenecho wa nyumba amanyaje inyengo yo umunkhungu akwinzira, uwene nge akalindilira, te nge akalora ukuti inyumba yakwe badobole. ⁴⁴ Ichifukwa chakwe namwe mwikale mwe bakunozgechera nzira, chifukwa inyengo yo imwe mutakughanaghanira, Umwana wa Munthu akwinzu kwinza. ⁴⁵ Ka wuwenu wo muzga uwa kugomezgeka nu wamahara, wo ubwana wakwe akumwikazga ukuti abe wakwenerezga inyumba yakwe ukubapa ichakurya pa nyengo yakwe? ⁴⁶ Ali nu mwabi umuzga wo ubwana wakwe pakwinza akwinzu kumwaga akuchita ivyonyene. ⁴⁷ Po nadi nkhunena niimwe ukuti akwinzu kumwikazga ukuti uwene wakwenerezga ivinthu vyonsi. ⁴⁸ Kwene umuzga mubibi nanthi anena mu moyo wakwe, 'Ubwana wane achedwa,' ⁴⁹ akwinzu kwamba ukukoma abazga abamwabo, akurya nu kung'wera poka na bachakorwa; ⁵⁰ po ubwana uwa muzga uyo akwinzu kufika isiku lyo atalimanyire ni nyengo yo atayimanyire. ⁵¹ Po alimudumura, alibika apakwikara pakwe na banthu aba kupusika, aponyene po kukwinzu kuba ukulira nukusya amino.