¹ Po ubonyene Uyesu akabazgora, akanenaso nabo umwa viyerezgero, akati, ² "Ubufumu ubwa kumwanya bukuyanana bwelere nu munthu, imfumu, uyonyene wo akanozgecher iphwando lyakwe ilya mwana wakwe ilya wukwati. ³ Akatumizga abazga bakwe ukuti baye babitizge bo bakapundika ku wukwati uwu, po abene batakanza ukwinzako. ⁴ Po aponyene akatumizgaso abazga abanji, akanena, 'Babuzge bo bitisile abo, "Yen'ya, nanozga iphwando lyane. Ning'ombe zgane, ni zgakunona zgo nkhazigoga, ni vyinthu vyonsi vyapya. Zaji ku wukwati."' ⁵ Kwene popenyene batakayako, bakafumapo, wunji akaya ku mugunda wakwe, uwamwabo akaya ku vyakukazga vyakwe. ⁶ Po abakusyala abo bakabalema abazga bakwe, nukubakoma, nukubagoga. ⁷ Kwene imfumu yikakalala, Po yikatuma abasilikari bakwe, po bakaya bagoga abakufyeka abo, nu kocha akaya kabo. ⁸ Aponyene po yikanena ku bazga bakwe, 'Ivya wukwati vila nomba vyapya, abakupundika abo te bakwenelera. ⁹ Ichifukwa chakwe imwe mujende kunzira izga ndekana, aliwonsi wo inthi mwaya mwamwaga mumwitizge ayinze ku wukwati uwu.' ¹⁰ Po abazga abo bakajenda mu zganzira, po bakawunganika bonsi bo bakabaga, napo babibi, napo bangaba abinza. Po wukwati ubo bukavula na banthu bo bakapundika. ¹¹ Kwene imfumu iyo po yikinza kuben'ya abanthu bo bakulya abo, aken'ya umunthu wo akazwara ichakuzwara cho te chawukwati. ¹² Akanena nawo, 'We wamwitu, ukinjira umu bulibuli po ute ni chakuzwara icha wukwati?' Po uwene atakaba ni chakunena. ¹³ Po aponyene imfumu yikanena na bakutumichira bakwe, 'Mumupinye inyobe zgakwe ni vinama vyakwe, mumusumbire ku chisi icha kunzi. Ukonyene ko kwayu ukuba kulira nu kuluman'ya amino.' ¹⁴ Pakuti abakupundika binji, kwene abakusebeka bakuberenjeka bwelere." ¹⁵ Po aponyene abafarisi bakanyamuka, bakajenda ukuyu kunenesan'ya mo bangamulemera mu manenero gakwe. ¹⁶ Po bakatumizga abasambiri babo kwa wuyo, poka na bamwabo abigulu ilya kwa Herodi. Abene po bakati, "Musambizi, tukumanya ukuti imwe mwebawunenesyo, po mukusambizga munzira iya Mulungu umwa wunenesyo nadi. Po mutakupwelelera ivya munthu aliwonsi, pakuti mutakwenerezga paminso aga munthu. ¹⁷ Ichifukwa chakwe mutubuzge iswe, mukughanaghanachi? Chakuzomerezgeka ukutwara umusonkho kwa Kaisara pamo awe?" ¹⁸ UYesu akamanya uwubibi bwabo, akati, "Choni cho mukunjezga, mwe bakupusika imwe? ¹⁹ Mundongozge indalama iya musonkho." Abene po bakamusendera indalama. ²⁰ Po uwene akanena nabo, "Inkhope iyi yawenu nu kulemba kwakwe?" ²¹ Po bakazgora bakati, "Vya Kaisara." Po aponyene Uwene akanena nabo, "Ichifukwa chakwe ivya Kaisara muvitware kwa Kaisara, na kwa Mulungu vyakwe ivya Mulungu." ²² Po abene po bakati bivwa, bakazizwa, po bakamuleka, po bakafumapo. ²³ Isiku ilyonyene abasaduki bakaya kwa Yesu, abene bo bakunenaga ukuti kutali kunyamuka ku bakufwa. Bakamuwuzichizga, ²⁴ po bakanena, "Musambizi, uMose akati, 'Nanthi umunthu afwa wo ate nu mwana, umukamu wakwe akwenera amupyane umwanthanda yura nu kumupapiramo abana. ²⁵ Nomba pakaba abanavuli seveni aba pawukamu. Uwakwamba akasenda, akafwa uwamburu umwana. Akalechera umukamu wakwe umwanthanda wakwe. ²⁶ Vikachitikaso uwonyene nu wachibiri, nu wachitatu bulo, mpaka bonsi seveni bara. ²⁷ Pawumaliro bwakwe umwanthanda uyo wope akafwa. ²⁸ Ka aponyene pakunyamuka ku bakufwa, umwanthanda uyonyene akwinzu kuba wawenu? Pakuti bonsi seveni bakamusenda." ²⁹ UYesu akabazgora ukuti, "Mukunanjisya, chifukwa mutakumanya amalemba pamo na maka aga Mulungu. ³⁰ Pakuti mukunyamuka mu bakufwa mute ukusenda pamo ukusendwa. Kwene inthi babe ngati abangelo aba kumwanya. ³¹ Kwene ivya bakanyamuka ku bakufwa, ka mutaberenzire vyo vikaneneka kuimwe nu Mulungu, ukuti, ³² 'Ine ne Mulungu uwa Abrahamu, nu Mulungu uwa Isaki, nu Mulungu uwa Jakobo'? Te uMulungu uwa bakufwa, kwene uMulungu uwa bamoyo." ³³ Po ubwinji ubwa banthu bukati wivwa, bukazizwa ni chisambizgo chakwe. ³⁴ Kwene abafarisi, pakwivwa ukuti uwene akabasosya ichakunena abasaduki, bakawungana. ³⁵ Po woka uwa bamwabo, umusambizi uwa malamulo, akamubuzichizga, nukumuyezga, akati, ³⁶ "Musambizi, ilamulo ilikuru lyo lili kwii mu malamulo?" ³⁷ Po uYesu akamuzgora, "'Umutemwaje uMulungu wako nu moyo wako wonsi, nu moyo wako wonsi, na mahara gako gonsi.' ³⁸ Ilyo lyo lilamulo ilikuru ilyakwamba. ³⁹ Ilyachibiri lyo vingayanana lyo ili, 'Umutemwe uwamwinyu ngati mo ukuyitemwezezwa iwe weka.' ⁴⁰ Amalamulo gabiri aga cho chakusajikapo amalamulo gonsi na baneneri." ⁴¹ Po aponyene po abafarisi bakati bawungana, uYesu akababuzichizga. ⁴² Akati, "Mukughanaghana bulibuli izga Khristu? Mwana uwa wenu?" Abene po bakanena nawo, "Uwa Deveti." ⁴³ Uwene po akanena nabo, "Choni cho uDeveti mu uzimu, akumupunda ukuti Mulungu, po akati, ⁴⁴ 'Umulungu akanena kwa Mulungu wane, "Wikale pa nyobe iya ndyero yane, ukufichira po nkhwinzu kubika abalwani bako pansi apa vinama vyako"'? ⁴⁵ Ichifukwa chakwe nanthi uDeveti akumupunda uwene ukuti, 'Mulungu,' mwana wakwe bulibuli?" ⁴⁶ Patakaba nanthi woka wo akamuzgora, ukufuma isiku ilyonyene, pate nanthi yumo wo akaba uwakulimba umoyo ukumubuzichizgaso ibuzgo lililyonsi.