¹ Inyengo iyonyene abasambiri bakinza kwa Yesu, bakanena, "Wenu wo alusizge mubufumu ubwa kumwanya? ² Po aponyene po uYesu akakitizga akamwana, akakimika pakasi pabo, ³ akati, "Nadi ine nkhunena niimwe, nanthi mutangalapa nukuti mwikale ngati tubana uto, mutakwinzu kwinjira mubufumu ubwa kumwanya. ⁴ Chifukwa chakwe, aliwonsi wo akuyichefya weka ngati kamwana aka, uyonyene wo wakulusya mubufumu ubwa kumwanya. ⁵ Chifukwa wo ayinza apochelera akamwana koka ngati aka chifukwa chizina lyane, kokuti nge amphochelera ine. ⁶ Kwene aliwonsi wo akwinzu kutukalalizga koka aka twana utu to tungomezizge, chingaba ichete ukumupinyilira ni chilwara munsingo po mumusumbire panyanja iya kwibira nkhani. ⁷ Isoka liri ni charu icha pansi chifukwa icha vyakukalalizga! Pakuti vitangachitika ukuti ivyakukalalizga vileche ukwinza, isoka liri na wo akwinza ni chakukalalizga. ⁸ Nanthi inyobe yako pamo ichinama chako chikukukalalizga iwe, uchidumule, uchitaje. Chinza kuiwe ukuti winjire mu wumoyo uwakulemara inyobe olo ichinama ukuchira ukuti winjire mu moto uwa nyengo yiliyonsi ukuti uli ni nyobe zibiri pamo ivinama vibiri. ⁹ Nanthi ilyinso lyako likukukalalizga, ulifumye nukulitaga. Chinza kuiwe ukuti winjire mu wumoyo ni lyinso lyoka ukulusya ukusumbika mu gahena ilya moto uli na minso gabiri. ¹⁰ Mwenerezge ukuti mutanyoze woka uwa bansi aba. Pakuti nkhunena niimwe ukuti abangelo babo bakwen'ya mo benerezgaga inkhope iya Baba wane uwa kumwanya. ¹¹ Pakuti umwana wa munthu akinza ukuponosya cho chikasobera. ¹² Imwe mukughanaghana bulibuli? Waje umunthu yumo ali ni mberere izgakukwana handiredi, Po nomba yoka yasobera, asi inthi aleche nayinte naini (99) pi gamba nukujenda ukulondora yo yasobera? ¹³ Po nanthi ayaga, nadi nkubabuzga, akusechera ukwakurusya chifukwa cha yo ayaga, ukurusya nayinte naini (99) zgo zitasobereye. ¹⁴ Umwakuyana bulo, te ukwanza ukwa Baba winyu wo ali kumwanya ukuti woka uwa bakuchepa aba ukuti asobere. ¹⁵ Nanthi umukamu wako akunajira iwe, bukaga, umubuzge pamweka. Nanthi akwivwira iwe, wamuwezga umukamu wako. ¹⁶ Nanthi atakwivwira iwe, usanzizgepo ukusenda uwamwabo woka olo babiri, ukuti inkhani yonsi yisimichizgiche na pamulomo apa bakaboni babiri olo batatu. ¹⁷ Nanthi apotwa ukubivwiraso aba, ubabuzge aba mupingo. nanthi uwene atangivwiraso umupingo uwo, Abe kuiwe ngati munthu uwa kunzi kweneso ngati uwakusontchesya umusonkho. ¹⁸ Kwene nadi nkhunena niimwe, vyonsi vyo mwavipinya pacharu icha pansi, vikwinzu kuba vyakupinyikaso na kumwanya; po vyonsi vyo mwavisatura pacharu icha pansi, vikwinzu kuba vyakusatulikaso na kumwanya. ¹⁹ Aponyene po nkhunenaso niimwe, nanthi abanthu babiri abiimwe bazomerezan'ya pacharu icha pansi ichinthu chonsi nanthi balaba, uBaba wane uwa kumwanya akwinzu kubachitira. ²⁰ Pakuti ko kuli babiri olo batatu bawungana chifukwa chizina lyane, ndiri aponyene pakasi pabo." ²¹ Aponyene po uPetro akinza, akati kwa wuyo, "Mulungu, umukamu wane angananjira kalinga ukuti imugobochere? akakukwana fayivi na kamwabo kabiri? ²² UYesu akanena nawo, "Nthakunena niimwe akakukwana fayivi na kamwabo kabiri, kwene ukufichira akakukwana sevente ukubwerezga aka fayivi na kamwabo kabiri. ²³ Ichifukwa chakwe ubufumu ubwa kumwanya bwakuyerezgera ni munthu, imfumu, yo yikanza ukuti abazga bakwe bawezge ingongole. ²⁴ Po aponyene po bakamba ukuberenjera, abazga bakwe bakinza nu munthu wo akaba ni ngongole iyakukwana amatalenti teni sauzandi. ²⁵ Pakuti uwene akasoba ichakuti angamuwezezga, ubwana wakwe akalamulira ukuti uwene bamukazge, nu mwanthanda wakwe, na bana bakwe, na vyonsi vyo ali navyo, ukuti baye babwezge ingongole iyo. ²⁶ Ichifukwa chakwe umuzga uyo akafugamilira pansi, po akasindama, akanena akati, 'Mumpheko inyengo, inthi mbwezge.' ²⁷ Po ubwana uyo, ichitima chikinza chamulema sana mumoyo wakwe, po akamusatula, po akamugobochera ingongole. ²⁸ Kwene umuzga uyu pakufuma akamwaga umuzga uwamwabo, wo akaba ni ngongole yakwe iyakukwana amadinari handiredi. Po akati amulema, po akamba ukumufyenya pansingo, akati, 'Mbwezezga chilichonsi cho iwe ukakongora.' ²⁹ Ubonyene umuzga uwamwabo akagwa pansi, po akamba ukumulambilizga, akati, 'Umpheko inyengo inthi inkhuwezezge vyako.' ³⁰ Nangabuli atakanza, kwene akajenda nukuyu ukumutwala ukuti baye bamutajire mundende mpaka abwezge ingongole. ³¹ Ubonyene abazga abamwabo bakati ben'ya vyo vikachitika, ubwira bukabalema sana. Po bakajenda nukuyu ukumulongosolera ubwana wabo ivinthu vyonsi vyo vikachitika. ³² Po aponyene ubwana wakwe po akamupunda, po akanena nawo, 'Umuzga umubibi, nkhakugobochera ingongole yonsi yira para po ukandambilizga. ³³ Asi nawe nge ukaba nu bwira pa muzga uwamwinyu, ngati mo nane nkhabera nu bwira niiwe?' ³⁴ Po ubwana wakwe akakalara, akamutwara ku bo bakunyoza ukufichira ukuti aye amubwezezge ingongole yakwe yonsi. ³⁵ Ubonyeneso uBaba wane akwinzu kubachitira imwe, nanthi imwe mutakugobochera aliwonsi umukamu wakwe ukufuma mu moyo ginyu."