¹ Po gakati gachilingan'ya amanda fayivi ni lyamwabo lyoka, uYesu akamusenda uPetrosi, nu Jakobo, nu Yohane umukamu wakwe, akajenda nabo pabeka pigamba ilitali. ² Po uwene akasintha paminso gabo. Po inkhope yakwe yikalama ngati lizuba, ni vyakuzwara vyakwe vikaba vizelu ngati mo kukulamira. ³ Nomba lora, uMose nu Eliya bakabalolechera po bakanenaga nawo. ⁴ UPetro po akazgora akati kwa Yesu, "Mulungu, chilichete ukuti iswe twikale apanye. Nanthi munganzomerezga, nkhwinzu kuzenga ivisakasa vitatu; woka wuimwe, nu wunji uwa Mose, nu wamwabo uwa Eliya.' ⁵ Achili akunena, lora, ibingu ilyakulama likabazgika, nomba lora, amazwi gakuneneka mwibingo, "Uyo wo Mwana wane uwakutemweka, mwa wuyo mo ne wakukondwa. Mumwivwire." ⁶ Po abasambiri bakati bivwa, bakafugamira nukugwisya inkhope zgabo pansi, bakanyira umwabukuru sana. ⁷ Po uYesu akinza, po akabakwamfya, akati, "nyamuchi, mutanyire." ⁸ Po abene pakunyamusya aminso gabo bataken'ya umunthu kwene uYesu weka. ⁹ Po aponyene po bakisikaga pigamba, uYesu akababuzga akati, "Mutaye mumubuzge umunthu aliwonsi cho mwachen'ya icho ukufichira po umwana wa munthu akwinzu kunyamuka ku bakufwa." ¹⁰ Po abasambiri bakwe bakamubuzga, po bakanena, "Nomba choni cho abalembi bakuti uEliya wo alongolere pakwinza?" ¹¹ Uwene po akabazgora akati,"UEliya inthi ayinze nadi, po akwinzu kuwezezga ivinthu vyonsi. ¹² Ine po nkhunena niimwe, ukuti Eliya akinza kale, abene po batakamumanya. Po bakamuchitira vyonsi vyo abene bakanzaga. Ubonyeneso , Umwana wa Munthu inthi binze bamuyimvye." ¹³ Aponyene abasambiri bakinza bamanya ukuti akanena nabo ivya Yohane m'batizi. ¹⁴ Aponyene po bakati binza kupipi nu bwinji ubwa banthu, umwanavuli woka akakumana nu Yesu, akamufugamilira, akati, ¹⁵ "Mulungu, mumuchitire ubwira umwana wane, chifukwa akulwara ichizilisi, ayimba umwakubipisisya nkhani. Pakuti akugwanga kabiri kabiri pamoto, po akugwangaso kabiri kabiri pa minzi. ¹⁶ Po nkhinza nawo ku basambiri binyu kwene abene batakamuchizga awe." ¹⁷ UYesu akazgora akati, "Hoo, mwe bakupapwa abambura mukugomezga na bamaluli, inthi nikale niimwe mpaka nyengo buli? inthi nzinzipizge mpaka nyengo buli? Mwinze nawo kuine." ¹⁸ Po aponyene uYesu akachichenyeramo ichibanda, po chikafumamo mwa wuyo, po umunyamata yura akachira inyengo iyonye. ¹⁹ Po aponyene abasambiri bakinza kwa Yesu po akaba paweka, bakati, "Nangi iswe choni cho twangupotwa ukuchifumyamo?" ²⁰ Uwene po akanena nabo,"Chifukwa ichigomezgo chinyu chichefire. Nadi ine nkhubabuzga imwe, waje mwaba ni chigomezgo ngati kambeyu akampiru, inthi munene ni gamba ili, 'Fumapo apa uye apo,' po likwinzu kufumapo, po pate ichinthu cho inthi chinze chibapote ukwambura ukuchitika. ²¹ Nangabuli ichamutundu ubu chitangafumapo awe, kwene mukuyiputa na kufunga." ²² Pakabapo po bakawungana mu Galileya, uYesu akanena nabo, "Umwana uwa Munthu akwinzu kuperecheka munyobe izga banthu, ²³ po aponyene bakwinzu kumugoga, po uwene akwinzu kunyamuka isiku ilya chitatu." Po abene bakaba ni chitima ichikulu nkhani. ²⁴ Po pakufika ku Kapernawo, balanyene bo bakupochelera indalama izga mu charichi bakinza kwa Petro bakati, "Ka umusambizi winyu atakupereka umusonkho uwa pa charichi?" ²⁵ Uwene akazomera ukuti, "Akupereka." Uwene po pakwinjira munyumba, Uyesu akalongolera ukunena nawo, akati, "Simon, ukughanaghana bulibuli? Amafumu aga charu icha pansi gakupochelera umusonkho ukufuma kwa wenu? Ku bana babo fwandi, pamo ku abanthu abachilendo?"