Pasal 17
Tegadi ta taling so “saduisuk” tong go
1
Ablam go yagi 99 yam no, Woy Wali Iram tandali Ablam ey genang tugu. Nggano, Woy Wali Iram lo pu go: “Genam ngge, don dega eygo Ki Wali Mani Iram gabe! Genam nogo-a kengduduk so se, senang so kuno-woyno, Genam go duing go-a, mot se pupluok!”
2
Yang! Don eygo tegadi-a, mot sono At logo gabe dodok. Mot go duo mata so Genam lo mea ke!”
3
Ngga ey, Ablam unuik go, Woy Wali Iram lo gemang pu:
4
“Mot eygo tegadi, Genam gabe keduik-situgu: “Saula tang miam eygo aya so mot, At lo mea lemoy seni.
5
Ngga tang so, nggeasui go mot go sui Abraham so kua. No, Ablahame so gabe pupu.
6
Mot go duo, mata dega so mea ke. Nemotnang sik so, deguena miam ey mea wang dali. Saula tang miam eygo so, mot go duo ngga mea lemoy-ayun.
7
Mot go duo ey mot eygo nogo tegadi ngge, Genam lo mea lemoy seni. Ngge, senang tegadi gabe: “Mot go Ki Wali Iram so Genam gabe! Genam go duo-yap so motnang gabe.”
8
Nan ngge, mot ey mot go duo-yap eygo no itak-lu genang gabe. Nggesui go, amble kalik nan ngge so gabe got-tegoy. No, nan ngge naklay mot go duo tete so mea lemoy. Ngga ey, nemotnang go Ki Wali Iram so Genam-a mea. Genam go duo-yap so nemotnang mea, duono-duono mea susuing.”
9
Tandali Abraham sono Ki Wali Iram lo pu go: “Mot tang go, suey so waysagi ey tegadi ngge nogo, ta se mlak lo. Duono-duono tamlak go se pupluok.
10
Mot lo tui-tegoy go sedue denok, nemot go “saduisuk” se tong.Nggeasui go sik so, sedue denok tui go ku 8 tete no “saduisuk” se tong.
11
Mot go yap ba no koybutasemu lo tui go duo.
12
Koybutasemu duoy lo iti go, “saduisuk” se ibot-sing. “saduisuk” tong go ngganemot lo, At lo mot ey tegadi dok go ngga, ta taling genang.
13
“Saduisuk” tong go sik so, Genam ey mot ey senang tegadi dok go, duono-duono saysuk temoy no gigit genang.
14
“Saduisuk” kua tong go nggga, Genam go tegadi no kua mlak go tang so, Genam go blung sogo mea kua degut.”
15
Ngga ey, Ablaham sono Ki Wali Iram lo pu go: “Mot go kabung Sarai so kua usi. No, nggeasui go sik so nemot go sui, Sara gabe.”
16
Nemot nogo taitiklum sedue denok-a, Genam lo iti go mea tui-yun. Saula-saula go unen so nemot-a mea pu-netegon. Nemot lo tui go duo-yap sik sogo, deguena-deguena mea wang-sing”
17
Ngga ey, Ablaham ku sono kenuong go, dabui ba lo nebleng gemang klik-nawon: “Sedue seni tap temoy nogo, duo ya tui? Sara go yagui 90 yam no mo pung ne?”
18
Ngga ey, Ki Wali Iram sono Ablaham lo gemang pu: “Ngge suey, Ismael no genam go naklay ngge mea itak lu.”
19
No, way so Ki Wali Iram lo pu go: “Kua! Mot go kabung Sara lo sedue denok mea tui-yun. Ishakf so se temuit lo! Genam tang go tegadi no, Genam gabe mlak. Duo ngga ey, nemot lo tui go duo eygo nogo senang. Duono-duono itak genag so dok go tegadi gabe.”
20
No, Ismael so pu-to go ngga, Genam lo naklay mea lemoy dali. Genam lo taitigualaklum tabubluim go, nemot sinok mata so mea ke. Tang 12 yam sogo nglangin-babu so nemot mea lemoy. Tang babu goso nemot mea lemoy.
21
No, Genam go tegadi ngga, mot go duo Ishak ey dok go gabe. Sara lo tui genang sogo duo ey dok go. Yagui santugun go ngeasui go ku kalik dali no Sara duo mea tui-yun.”
22
Ngga yam so pen gono, Ki Wali Iram gemang klong.
23
Ku ngganemot dali no, Ki Wali Iram lo tegadi dok go kalik keng go, Ismael go “saduisuk”, Abraham lo gemang tong-won. Nemot go yap ba sogo sedue yap ba no tui go ey, koybutasemu duoy lo iti go ey naklay, “saduisuk” gemang ibot-singdapwon.”
24
Ablam go yagui 99 yam no, nemot go “saduisuk” gemang tong-nawon.
25
Danon Ismael go yagui 13 yam no “saduisuk” tong go.
26
Ku klaya go seguong no, Abaham go koybutasemu naklay ey kerlam so nemogo danon ei.
27
Ga Abraham go yap sego sude-sude naklay,ga nemugo yap no tugui go ga ei saula meno sik sogo ei idok go,nemot ey kerlam-kerlam so se tong.