1
Ablam senun Sarai duo maning kua iti goso susuing. No, Sarai go koybutasemu Masir kaguit gemang. Nemot go sui Hagar.
2
Ablam sono, Sarai lo gemang we-natun: “At nogo duo, Woy Wali Iram lo kua iti go se! Mot-a, genam go koybutasemu ngge ey srek-a! Genam nogo duo, nemot lo tui-yun sogo be!” Sarai lo pu go ngga no, Ablam-a gemang duk.
3
Kabung so iti genang so, Sarai lo Hagar wawi go gemang itak-natun. Ku ngganemot nogo, nan Kanaan sogo Ablam yagui 10 so mo suing.
4
Hagar ey Ablam to-nawon go, Hagar duo gemang iti-natun. No, Hagar senong go, ‘genam duo ey ba.’ Nemot-a blo sono dabui iti go, Sarai-a ku sono ne kenok.
5
Ngga ey, Ablam sono Sarai lo pu go: “Genam go koybutasemu Hagar, at lo mot no iti go. Duo eygo senong gono, ku sono genam-a way so ne kekenok. Ngge, mot go kuklue gabe! Kuklue ngge, Woy Wali Iram tang golo, mot ey at eygo nogo tang usi go mea pen!”
6
Way so Ablam lo pu go: “Nemot ngga, mot go koybutasemu-wa! Sogo kalik so, mot lo duing go-a nase puok.” Ngga ey, Hagar nogo don ey Sarai lo gemang taling. Ngga tang so, Sarai sik sogo Hagar gemang kap.
7
Uduong Sur sogo buput sono koklong gono, Woy Wali tamot lo Hagar gemang tegu.
8
Nggano, Woy Wali tamot lo pu go: “Sarai go koybutasemu, Hagar! Mot nago sik so, nago nogo so?” Way so, Hagar lo wa go: “Genam go mia tuiam Sarai sik sogo kap so!”
9
Woy Wali tamot ngga lo pu go: “Tandali iwot go klong go, nemot no se tebok!
10
Mot nogo duo mata dega so, At lo mea ke, seduekabung lo tagu i genang yakua.
11
Ku Walong kua luik gono sedue denok mea tui-lo, nemot go sui Ismael so se temuit.
12
No, mot go duo ngga, pligit-pligit so keleday blim kalik mea wali-tegon. Sedue eygo sagui keda so, nemot lo mea pung. Nemot nogo sagui nando lo semu go, sagui nemot lo mea pung. Nemot go ntatonnang eygo, nemot-a banom so mea pligit-klong.”
13
Dabui ba lo Hagar gemang usi-tugun: “Seni so, genam nemu so luluik go Woy Wali Iram ey genam mo tegu ba? Nemot lo pu go: 'Nemot ngga, Woy Wali Iram genam nemu so luluik go.''
14
Ngga tang sogo so, buput ngga so sedue lo pu go: “Lahai-Roi”*
15
Nggano, Hagar duo tui-natun go, nglangin Ismael so Ablam lo gemang temuit-nawon.*
16
Ablam go yagui ku ngganemot nogo, 86 yam no.