Pasal 15
Abram ey Ki Wali Iram lo tegadi dok go
1
Ngga blo idi logo, Woy Wali Iram, sedi ba nogo kalik Abram lo ikum gono, Woy Wali Iram lo gemang pu-ton: “Abram, mot suali kua tra! Genam lo mot yay gabe susuing. Mot go seguot nogo, taiti kangok go-a mea iti lu!”
2
No, Abram lo pu go: “Ki Wali Mani Iram! Sogo-a genam no Mot lo mo iti? Genam, duo kua go so gabe ya kebong. Genam go yap naklay koybutasemu Damsik sik sogo Eliaser no mea itak lu.
3
Mot lo genam nogo duo kua iti go nogo, koybutasemu no, naklay ngga mea itak.”
4
Nggano, tandali Woy Wali Iram lo pu go, gemang tup-nawon: “Mot logo sogo-sogo mot go koybutasemu no yakua itak. No, mot tang go duo sedue denok lo, Ta mea mlak-yon.”
5
Ngga ey, kudia sono Abram wawi go pung gono, Woy Wali Iram lo gemang pu: “Ut sono ikum-bilo go, uttop tagu i ya! Mot lo tui genang duo miam dega so ngga kalik mea ke-lo.
6
Ngga ey, Abram go dabui Woy Wali Iram sono iti go gemang keng. Ngga tang so, Woy Wali Iram go dabui no iwat go sedue so, Abram gemang yang-won.
7
Ngga ey, tandali Woy Wali Iram lo gemang pu-ton: “Genam ngge, nan ngge mot go ta no itak genang so, Babilonia sogo yakena Ur sik so, mot so wawi go weng go, Woy Wali Iram gabe.”
8
No, way so Abram lo usi go: “Woy Wali Iram, Ki Wali Mani Iram! Nan ngge genam tete sogo seni so gabe, sogo sik so genam ya senong-lu?”
9
Ngga ey, Woy Wali Iram lo pu go: “At nogo so, sapi unen, kambing unen, kambing kensi yagui nangglik yam nogo-a se tong. Nggano, wabukurlung klaya, wiyagui klaya dali.”
10
Nggano, menay ngga, sapi, kambing domba, namon so tegek-sing go, idi-idi, way-way so tala namon ey gemang ta-sing. No, wi-a namon so kua tegek.
11
Menay temoy so dedam go wi uweng go, Abram lo yat-ton.
12
Woy yam so se susut, usene so Abram-a gemang to-nawon, ngga ey suali eygo kuklik ketok go.
13
Ngga no, Woy Wali Iram lo Abram no pu go: “Kua kay! Mot lo tui go duo, saula meno go nan no koybu-tasemu so mea lemoy. Yagui 400 yam so saula meno lo mea kenok.
14
No, mot lo tui go duo so kenok go saula, idikeba Genam lo mea taling. Ku mot go duo-yap nan ngga itak sogo nogo, taut mata so nemotnang lo mea ikak go pluep-lak.
15
Mot tang go wali, yagui walong so mea got lo. Nggano, suey so yakay ey mot ip go mu no mea tuet-neyon.
16
Mot go duo, duomdat, mamdat namon-namon tete sogo-a, ngge sono tandali mea pluep-neyon. Seduekabung Amori taybat kangok go seduekabung so maning kua lemoy go nogo, Genam logo meakua yat. No, nemotnang nogo idekeba iti genang.”
17
Ngga ey, kuklik gono, koyndop ey sagoy eygo kekayso pung go, menay tegek go ta-sing go nesip lo gemang klong.
18
Ki Wali Iram lo Ablaham ey tegadi dok-ngam go, ku ngganemot no gemang. Woy Wali Iram lo pu go: “Mot lo ke go duo no, nan ngge naklay mea itak. Nan Mesir sang sik so iti go, Efrat butuo no,*
19
seduekabung Keni, Kenas, Kadmon,
20
Het, Feris, Refaim,
21
Amori, Kanaan, Girgasi nggano Yebus go nan, naklay mo degut dali gemang.”