Pasal 14
Plesi go ta ba sik so Ablam lo Lot lek go
1
Ku ngganemot nogo, Babilonia go deguena Amrafel, Elasar go deguena Ariokh, Elam go deguena Kedorlaomer, nggano, Goyim go deguena Tideal. Nemotnang deguena namonnamon, ple tui genang so klaya so lemoy go.
2
Sodom go deguena Bera, Gomoro go deguena Birsya, Adma go deguena Syinab, Zeboim go deguena Semeber, nggano Zoar so pupu go deguena Bala. Nemotnang deguena taidi ey ple gemang tui.
3
Deguena taidi ngga, klaya so yaluim go, Sidim pay no sip gemang iti. Sip ngga nggeasui go beap temoy (Laut mati) gemang.
4
Seni so, yagui 12 yam so, nemotnang ngga Elam go deguena Kedorlaomer go masi ba no mo suing. No, yangui 13 tete no deguena ngga go tateglok go ple gemang pung.
5
Yagui 14 tete no, deguena Kedorlaomer plesedue daley ey weng go, deguena-deguena Asyterot-Karnaim sogo sedue Refaim, Ham sogo sedue Zuzim, Emim, Kiryataim sogo Syawe, Kedorlaomer go masi ba no don gemang unuik-sing.
6
Ngga ey, nemotnang medium Edom sogo sedue Hori lo truik go, e… El-Paran neguen pay seding no gemang itak.
7
Ngga sik sogo, nemotnang so truik go sedue ngga, En-Mispat no tandali gemang weng-lak. Nggeasui go sip ngga, Kades so gemang pupu. Nan Amalek, sedue Amori, nan Hazezon-Tamar so susuing go saula naklay, nemotnang lo tamlak go.
8
Ngga ey, Sodom, Gomora, Adma, Zeboim nggano Bela sik sogo deguena-deguena tala lot go, Sidim pay no ple gemang tui.
9
Sedue Elam, sedue Goyim, sedue Babilonia, nggano sedue Elasar ey, deguena taidi ey deguena namonnamon ey ple way-way so gemang tui.
10
Yang! Pay ngganemot sogo aspal put mata so gemang. Sodom ey Gomora eygo sik sogo deguena-deguena, suali so kukuek go, aspal put ba lo pui go gemang leguot-sing. No, kumeduim sono kuek go-a susuoy so gemang kuek.
11
Deguena namonnamon yam sogo don ey suing golo, Sodom ey Gomora eygo sik sogo taut naklay ikak go gemang klong-lak.
12
Ablam ntaton go danon Lot, Sodom dali sogo tang so, plesi lo mlak go nemot go taut nakay ey wawi go gemang kuek.
13
Tasam lemoy go naklay, Abram Iblani duo ngga nogo, sedue meno susuoy so kap golo gemang pen. Sedue Amori go nebutpen eygo di Mamre, ngga so Abram susuing gono. Sedue Amori ey sedue Eskol, sedue Aner, ngga anduasi-yap gemang.
14
Ntaton go danon Lot plesi lo mlak go klong go deguo Abram gemang tup-nawon. Ngga ey, ple pupung-ple dadap naklay go sedue seguong-a, bala ba no Abram lo yaluim-sing go 318 yam so. Yam so taling-won gono, deguena namonnamon ngga truik go, yakena Dan sono gemang tebok.
15
Abram go sedue namonnamon yam so wasey gono, kuklik ba lo degut go plesi gemang tuk-sing. Ngga ey, yakena Damsik go dun idi sono gemang truik.
16
Nemotnang lo ikak go taut naklay Abram lo tandali lek. Danon Lot ey taut ey, kabung-kabung naklay ey nemotnang lo tandali gemang wawi.
Abram blo no taitigualaklum Melkisedek lo tabubluim go
17
Kedorlaomer ey nemot no tebok go deguena-deguena go don Abram lo pedueng go. Tandali Abram uweng gono, deguena Salem lo tap sono, deguena pay so pu go sip Syawe pay sono weng go Abram gemang tegu.
18
Melkisedek ngga, Salem deguena. Ki Wali Mani Iram no taitisopuitgo dega. roti ey anggul ey iti go Abram sono gemang weng.
19
Abram blo nogo taitigualaklum tabubluim go, gemang pu: “Ut nan so semu go, Woy Wali Iram, Ki Wali Mani Iram sik sogo teguop mot blo nogo senang so mea uweng.
20
Ki Wali Mani Iram go sui-a blo sono iway ey se iti! Mot nogo don Nemot lo mo iti, plesi go don but go mo pedueng.” Ngga ey, ple ba so Abram lo ikak go taut ngga, tanamon yam so wasey go, klaya tete sogo-a Melkisedek go ta sono gemang iti-nawon.
21
Ngga ey, deguena Sodom lo Abram no pu-ton: “Taut-a mot go ikak go se klong! No, at go sedue kabung-a tandali at sono se itak-sando!”
22
No, way so Abram lo pu go: “Ut nan so semu go, Woy Wali Iram go sui no gabe wa-situgu,
23
‘Mot go sogo-sogo genam logo ya kua nagluim, dansruip datonang yakua nagluim.’ Mot lo pu genaning: ‘genam go taut logo tang so, Abram go taut gemang miam.’
24
Atnang tete sogo, genam go sedue kabung seguong logo-a gabe. No, imot no yalu so kut go deguena deguena, Aner, Eskol nggano, Mamre tete sogo-a suey so se ikak dali.” “