Pasal 13
Abram ey Lot ey banom-banom tap klong go
1
Nan Mesir itak-nawon go, senun wawi go taut naklay ey ikak go Dun idi sono Ablam koklong go, Lot gemang keng dali.
2
Yang! Taut miam dega go sedue so, Abram mo lemoy. Nemot go menay, kambing-domba, sapi, drang-samon mata dega so.
3
Betel no koklong go, sip meno sik sogo sip meno no gemang klong. Kolong go, e… nebutpen eygo sip Betel ey Ai eygo, bala ey demusung ey banim klik go no gemang pung.
4
Nggano, Woy Wali Iram sono ta gemang kong.
5
Nggano, Lot nemot kalik dali. Nemot go yaptenglam ey koybutasemu ey, Menay, kambing-domba, sapi popong go mata dali so.
6
Ngganemot nogo, sip ngga no klay gono, nemot namon suing genang, sip bata kua. Nemotnamon go menay mata dega sogo nogo.
7
Nggano, Abram go menay yay sogo ey, Lot go menay yay sogo ey, nebut gemang teguot-nenawon. Ku ngganemot nogo, Kanaan ey, Feris eygo seduekabung ngga so gemang.
8
Ngga ey, Lot sono Abram lo pu-ton, “Imot ngge teguantemung kin klaya go, mot go kebalisedue, at go kebalisedue ey nebut teguot go kuaseni.
9
Ngge suey? Imot banom-banom tap ya wasey-mleyon. Nggeasui go, mot tang so sip se kuoy! Nago-a mot suing genang so ya? Mot-a ngge sono mo klong go, genam-a ngga sono mea klong.”
10
Lot nemu iti-siwon go, Yordan pay ngga teguop seni bu mata sogo. Yangga bu mata sogo sip, yakena Zoar sono go. Woy Wali Iram go usu kalik iikum, nan Mesir kalik ikum go sip.
11
Yordan pay ngganemot-a, Lot lo gemang kuoy. Ngga ey, woyklak idi sono Lot ip go gemang klong. Banom-banom tap so gemang wasey-klenawon.
12
Abram -a Nan Kanaan no gemang got-won. Yordan bu pay lo Lot-a bala klik-siton go, Sodom dagu no gemang pung.
13
Sodom yakena sogo seduekabung taybat kangok. taybat kangok dega so Woy Wali Iram nogo pupluok.
Hebron sono Ablam klong go
14
Lot klong gono, Abraham sono Woy Wali Iram lo gemang pu: ”Sip ngga, mot ip go sik so ikum-sitogoy go! Mot ey mot go duo eygo nogo so, At lo itak genang nan ngge naklay gabe. Suey so, nemu se-luik silo!
15
Mot ey, mot go duo eygo nogo so, mot lo ikum go nan ngge naklay mea itak. Mot go duono-duono senang so iitak genang nan gabe.
16
At lo iti go duo, mata dega so mot lo mea ke lo. Sungkuim kalik tagu i genang yakua.
17
Nggeasui go, nan ngge naklay lo mot se uwet. Ngge mot nogo so, Genam lo mea iti.”
18
Ngga bo idi lo, nebutpen eygo di dagu sono bala gemang klik-nawon. Dewi so pupu go sip Mambre, Hebron dagu no. Ngga ey, Woy Wali Iram nogo takong genang demusung gemang tong-nawon.