Pasal 12
Abram Ki Wali Iram lo usi go
1
Abram sono Woy Wali Iram lo pu go: “Mot go aya go yap, mot go tang, mot go yakena itak go se klong. Genam lo taling go nan sono, mot se ip!
2
Yang! Mot go duo-a, Saula tang babu goso, Genam lo mea lemoy. Mot blo nogo taitigualaklum At lo tabu mea bluim. Ngga tang so, sui iway eygo sedue so mot mea lemoy. Ngga ey, mot tang go taitigualaklum go yelung so mea lemoy.
3
Mot blo nogo taitigualaklum, nando lo tabu bluim go, taitigualaklum way-a nemot blo nogo At lo tabu mea bluim. Mot blo nogo piam nando lo pu go, nemot nogo piam Genam lo mea pu dali. Ngga no, saula-saula kukunan blo sogo nogo taitigualaklum mot tang sogo so, mea pung.”
4
Woy Wali Iram lo pu go kalik, yakena Haran itak go nogo, Abram go yagui 75 yam no.
5
Senun Sarai ey ntaton logo danon Lot wawi go, Abram ip go gemang klong. Nemot go, taut naklay ey, yakena Haran so idok go koybutasemu naklay ey king go gemang klong.
Klong go, nan Kanaan no gemang pung.
6
Ku nemu yamso wet-nawon gono, nebutpen eygo di tarbantin More sogo no gemang pung. Ngga Sikhem, dewi so pu sip. Ku ngganemot nogo, seduekabung Kanaan nan ngga so gemang.
7
Woy Wali Iram suong taling gono Abram no gemang pu, “Mot go duo no At lo itak genang, nan ngge gabe.” Ngga ey, Woy Wali Iram suong mo taling go nogo so, demusung meno, Abram lo gemang klik-nawon.
8
Ngga sik sogo, sada idi sono, nemot go tapmasi gemang klong. Yangga, sip medium eygo, nan Betel go woyklak idi sono. Sip ngga no, bala gemang kong-bawon. Yangga, Betel woysut idi no, yakena Ai-a woyklak idi no. Ngga nogo, demusung klik gono, Woy Wali Iram nogo ta gemang kong.
9
Ngga blo idi logo, tapmasi ip go, sipnemo sik so-sipmeno no gemang klong. Nan Kanaan sik sogo sada idi sono gemang klong
10
No, kluong ku kangok go nan Kanaan nogo pung gono, Abram sada idi sono naklay ket sono masi se walong. Nan Mesir no suing go, kluong ku tenkua go ku ngga lung-sing gono mea weng.
11
Nan Mesir sang blo no pung gono, senun Sarai sono gemang pu-ton, “Kabung penggu? Mot ngge naklay teguop seni go se!
12
Mesir sogo seduekabung lo mot ikum go nogo mea usi, 'ngge mot go kabung?' Ngga tang so genam-a but go kebong. No, mot-a wali-wali so mea itak sang.
13
Ngga kalik go, genam lo mea pu, ngga genam go kabuisruo-wa. Ngga tang so, wali wali so mot ey genam ey mea itak. Nggano, mot tang sogo so suey-suey so genam nogo nemotnang logo mea semu dali.”
14
Ngga seni so, Abram koklong go, yakena Mesir no pung go, seduekabung Mesir lo ikum go, Sarai kabung teguop dato go.
15
Deguena Mesir go kebali sedue lo Sarai ikum go teguop dato seni. Klong go deguena no gemang pen-nenawon. Ngga tang so, deguena Mesir go yap ba sono Sarai wawi go gemang degut.
16
Sarai tang sogo so, deguena lo Abram nogo suey-suey so gemang taling. Nggano, Abram nogo, koybutasemu, kambing domba, sapi, keledai nggano unta gemang ikak-sing.
17
No, Sarai deguena lo wawi go tang sogo so, Woy Wali Iram lo dalu kuaseni go-a, deguena ey nemot go yap ba sogo seduekabung nogo ey gemang iti.
18
Nggano, Abram deguena lo usi gono, tang gemang usi, “Sogo kalik go tasam-a, genam no mot lo mo pluok-to? Sogo so, kekayso kua pu, nemot ngge mot go kabung?
19
Sogo temoy no, kabuisruo so mot lo ne pu? Ne itak go, kabung so genam lo ne wawi-tu? Ngge, mot go kabung, wawi go klong-a!”
20
Nemot go kebali sedue no deguena lo mot-dak go, nan ngga sik sogo, nemot go taut naklay ey Abraham senun ey wawi go gemang klong.