Pasal 11
Ut no tuk go ida takokong yap Babel no kiklik go
1
Bukenok go blo idi logo, kukunan sogo suruakuon naklay, nebut-bluem klaya seguong pen-neakam.
2
Ngga ey, woyklak idi sono ip go nemotnang gemang klong-lak. Nan Sinear ku bata go sip no pung go, gemang got-nenangam.
3
Ngga ey, nemotnang goso menoduo lo-menoduo sono gemang pu-nenakam, “Ngge sogo, yap so klik go demu kua go. Weng-a! Kuensi lo suey so don ey, koy ba no demu ya duik-eyon.”Nggano, kuensiduik go demu ngganemot-a, ding tete so, ngga ey, demu ngganemot sebut genang, kuensi dali lo kua. No, nan ba sik so pupung go mlay-git seguo* sogo-a gemang.
4
Demu so duduik gono, gemang pu-nenakam, “Weng-a! Imot tete sogo yakena kangok go demutema ey ya klik go. Nggano, ut no tuk go ida-yap ey mea klik-eyon dali. Nggatang sogo so, kukunan blo logo imot meakua suep-lak, ngga ey, imot go sui iway, blo sono iti genang.”
5
Sinoknang ngganemot, yakena ey idayap eygo so kiklik gono, kebali ngganemot ikum so, Woy Wali Iram gemang li.
6
Nggano, Woy Wali Iram lo gemang pu, “Nemotnang ngge saula tang klaya. Ngga ey, nemotnang go nebut klaya dali.Nemotnang go usey ngge, kuduong sogo gabe. Nggeasui go sik so iti go, sogo-sogo so nemotnang lo pen go, mea lemoy seni.
7
Ngga kalik go, weng-a! Li-esion go, nemotnang go nebut-a bluot-sing go, way-way sogo, nemotnang go nebut meakua tup go senong.”
8
Yang! Sip ngga no, kukunan naklay blo sono ngga kalik go tap lo Woy Wali Iram lo saula-saula suep-lak go gabe. Nggano, yakena ngga lang-a betu go gemang itak.
9
Sip ngganemot no, kukunan saula-saula go nebut Woy Wali Iram lo bluot-sing go, nggano, kukunan blo lo saula-saula suep-sing go tang sogo so, yakena ngga Babel so pu go, e… nggeasui gono gabe pung.
Sem lo tui go tang
10
Ngge, Sem lo tui go tang gabe. Bu kenok go blo logo, yagui namon tete nogo, Sem go yagui 100 yam no, Arpakhsad Sem lo gemang tui.
11
Arpakhsad tui go blo logo, Sem wali go 500 yagui yam so. Sedue denok ey kabung denok ey gemang tui-sing dali.
12
Arpakhsad wali go yagui 35 yam no, Selah gemang tui.
13
Selah tui go blo logo, Arpakhsad wali go yagui 430 yam so. Sedue denok ey kabung denok ey gemang tui-sing.
14
Ngga ey, Selah wali go yagui 30 yam no, Eber gemang tui.
15
Eber tui go blo logo, Selah wali go yagui 403 yam no. Sedue denok ey kabung denok ey gemang tui-sing.
16
Ngga ey, Eber wali go yagui 34 yam no, Peleg gemang tui.
17
Pelek tui go blo logo, Eber maning wali go yagui 430 yam no. Sedue denok ey kabung denok ey gemang tui-sing.
18
Ngga ey, Pelek wali go yagui 30 yam no, Rehu gemang tui.
19
Rehu tui go blo logo, Pelek maning wali go yagui 209 yam no. Sedue denok ey kabung denok ey gemang tui-sing.
20
Ngga ey, Rehu wali go yagui 32 yam no, Serug gemang tui.
21
Serug tui go blo logo, Rehu maning wali go yagui 207 yam no. Sedue denok ey kabung denok ey gemang tui-sing.
22
Ngga ey, Serug wali go yagui 30 yam no, Nahor gemang tui.
23
Nahor tui go blo logo, Serug maning wali go yagui 200 yam no. Sedue denok ey kabung denok ey gemang tui-sing.
24
Ngga ey, Nahor wali go yagui 29 yam no, Terah gemang tui.
25
Terah tui go blo logo, Nahor maning wali go yagui 119 yam no. Sedue denok ey kabung denok ey gemang tui-sing.
26
Ngga ey, Terah wali go yagui 70 yam no, Abram, Nahor nggano Haran eygo Terah lo gemang tui.
Terah go tang
27
Ngge Terah go tang: Terah lo tui go Abram, Nahor nggano Haran. Haran lo Lot tui go gemang.
28
Ku nglangin Terah maning gono, Haran kebong go, nan Ur-Kasdim no gemang tuet.
29
Abram ey Nahor eygo nogo, kabung gemang tong. Abram go senun Sarai, Nahor go senun Milka, Nglangin Haran go denun,denun meno go sui, Yiska Milka go ndengon.
30
Sarai-a, duo ibui so.
31
Ngga ey, danon Abram, mamtaton Lot, Haran go danon, nggano Terah go tang
denunduo go Sarai ey Terah lo wawi go nan Kanaan nogo so gemang ip. No, nan Haran no pung gono, ngga no gemang suing.
32
Nglangin Tera go yagui 205 yam no, Tera gemang ip.