¹ Idi simmalog ni Jesus manipud iti turod, simmurot kenkuana dagiti adu a tattao. ² Ket adtoy, adda agketong nga immasideg ken nagparintumeng iti sangoananna, a kinunana, "Apo, no pagayatam, mabalinnak a dalusan." ³ Inyunnat ni Jesus ti imana ket sinagidna isuna, a kinunana, "Pagayatak. Madalusanka." Dagus a nadalusan isuna iti ketongna. ⁴ Kinuna ni Jesus kenkuana, "Kitaem ta awan ti siasinoman a pangibagaam. Mapankan iti dalanmo, ken ipakitam ta bagim iti padi, ket idatonmo ti sagut nga imbilin ni Moises, kas pammaneknek kadakuada. ⁵ Idi simrek ni Jesus idiay Capernaum, immasideg kenkuana ti maysa a senturion ket nagpakaasi kenkuana ⁶ a kinunana, "Apo, ti adipenko ket nakaidda iti balayko saan a makakuti ken agsagsagaba iti nakaro nga ut-ot." ⁷ Ket kinuna ni Jesus kenkuana, "Umayak ket paimbagek isuna." ⁸ Simmungbat ti senturion ket kinunana, "Apo, saanak a maikari tapno sumrekka iti sirok ti balayko. Ibagam laeng ti sao ket umimbagen ti adipenko. ⁹ Ta uray siak ket maysa a tao a naisaad iti babaen ti turay, ket addaanak met iti soldado. Ibagak iti maysa, 'Mapanka', ket mapan isuna, ken iti maysa pay, 'Umayka', ket umay isuna, ken iti adipenko, 'Aramidem daytoy,' ket aramidenna." ¹⁰ Idi nanggeg ni Jesus daytoy, nasdaaw isuna ket kinunana kadagiti sumursurot kenkuana, "Pudno, ibagak kadakayo, awan pay ti nasarakak nga addaan iti kastoy a pammati ditoy Israel. ¹¹ Ibagak kadakayo, adunto ti umay manipud iti daya ken iti laud, ket agsanggirdanto iti lamisaan a kaduada ni Abraham, ni Isaac, kenni Jacob, idiay pagarian ti langit. ¹² Ngem dagiti annak ti pagarian ket maipuruakto idiay akinruar a kasipngetan, a no sadino ket addanto iti sangsangit ken panagngaretnget dagiti ngipen." ¹³ Imbaga ni Jesus iti senturion, "Mapanka! Kas iti pinatim, isu ngarud ti maaramid para kenka." Ket immimbag ti adipen iti dayta met laeng nga oras. ¹⁴ Idi napan ni Jesus idiay balay ni Pedro, nakita ni Jesus ti babai a katugangan ni Pedro a nakaidda nga agsakit ken addaan iti gurigor. ¹⁵ Sinagid ni Jesus ti imana, ket pinanawan isuna ti gurigorna. Kalpasanna ket bimmangon isuna ket inrugina ti nagserbi kenkuana. ¹⁶ Idi dimtengen ti rabii, inyeg dagiti tattao kenni Jesus dagiti adu a linuganan dagiti demonio. Pinaksiatna dagiti espiritu babaen iti maysa a sao ken pinaimbagna dagiti amin a masakit. ¹⁷ Iti kastoy a wagas, natungpal ti insao ni Isaias a profeta, a kunana, "Isuna a mismo innalana dagiti an-annayentayo ken sinagabana dagiti saksakittayo.'' ¹⁸ Ita, idi nakita ni Jesus dagiti adu a tattao iti aglawlawna, imbilinna a pumanawda a mapan iti ballasiw ti Baybay ti Galilea. ¹⁹ Ket adda eskriba a napan kenkuana ket kinunana, "Manursuro, sumurotak kenka iti sadinoman a papanam." ²⁰ Kinuna ni Jesus kenkuana, "Addaan iti abut dagiti musang, ken addaan iti umok dagiti billit iti tangatang, ngem ti Anak ti Tao ket awanan iti pangiyiddaanna iti ulona.'' ²¹ Adda met maysa kadagiti adalanna ti nagkuna kenkuana, "Apo, ipalubosmo nga umuna a mapanak ken ipunponko ti amak." ²² Ngem kinuna ni Jesus kenkuana, "Surotennak, ket ibatim ti natay a mangipunpon iti bukodda a minatay." ²³ Idi limmugan ni Jesus iti maysa a bangka, limmugan met dagiti adalanna iti daytoy. ²⁴ Ket adtoy, adda rimsua a dakkel a bagyo iti baybay, isu a nasabsabuagan ti bangka kadagiti dalluyon. Ngem nakaturog ni Jesus. ²⁵ Napan kenkuana dagiti adalan ket riniingda isuna, a kinunada, "Isalakannakami, Apo; mataytayon!" ²⁶ Kinuna ni Jesus kadakuada, "Apay a mabutengkayo, dakayo a bassit ti pammatina?" Kalpasanna, bimmangon isuna ket tinubngarna dagiti angin ken ti baybay. Ket adda ti naisangsangayan a panagtalna. ²⁷ Nasdaaw dagiti lallaki ket kinunada, "Ania a kita ti tao daytoy, nga uray pay dagiti angin ken ti baybay ket agtulnog kenkuana?" ²⁸ Idi dimteng ni Jesus iti ballasiw ken iti pagilian dagiti Gadareno, sinabat isuna dagiti dua a lallaki a linuganan dagiti demonio. Rimmuarda kadagiti tanem ket kasta unay ti rungsotda, isu nga awan ti agdaldaliasat a makalabas iti dayta a dalan. ²⁹ Ket adtoy, nagikkisda ket kinunada, "Ania aya iti pakainaiganmi kenka, Anak ti Dios? Immayka kadi ditoy a mangparigat kadakami sakbay iti naituding a tiempo?'' ³⁰ Ita, adda sadiay iti arban dagiti adu a baboy a mangmangan, iti saan unay nga adayo manipud kadakuada. ³¹ Nagpakpakaasi dagiti demonio kenni Jesus ket kinunada, "No papanawennakami, ibaonnakami iti dayta nga arban dagiti baboy." ³² Kinuna ni Jesus kadakuada, "Mapankayo!" Rimmuar dagiti demonio ket napanda kadagiti baboy. Ket adtoy, nagdardaras ti sibubukel nga arban a bimmaba iti rangkis ti turod ket nagturong iti baybay ket natayda iti danum. ³³ Dagiti agtartaraken kadagiti baboy ket nagtarayda nga immadayo a napanda iti siudad ket impadamagda amin, nangnangruna ti napasamak kadagiti lallaki a linuganan idi dagiti demonio. ³⁴ Ket rimmuar ti entero a siudad a napan iti ayan ni Jesus. Idi nakitada isuna, nagpakpakaasida a pumanaw isuna iti rehionda.