¹ Gapu iti pannakawayawaya a winayawayaannatayo ni Kristo. Isu nga agtakderkayo a sititibker ken saankayo manen nga agpaadipen iti sangol iti pannakabalud. ² Kitaenyo, siak, ni Pablo ibagbagak kadakayo a no nakugitkayo, awanto ti pagimbagan ni kristo kadakayo iti aniaman a wagas. ³ Agsaksiak manen kadagiti lallaki a nakugit a kasapulan nga agtulnogda iti sibubukel a linteg. ⁴ Naisinakayo kenni kristo, dakayo amin a "napalinteg" babaen iti linteg. Naiyadayokayo iti parabur. ⁵ Ta gapu iti Espiritu, ken babaen iti pammati, agur-uraytayo iti kinatalged iti kinalinteg. ⁶ Awan ti aniaman a kaipapananna kenni kristo Jesus ti pannakakugit wenno saan a pannakakugit, ti laeng pammati nga agtrabtrabaho babaen iti ayat. ⁷ Agtartaraykayo a sisasayaat. Siasino ti nangpasardeng kadakayo nga agtulnog iti kinapudno? ⁸ Saan a naggapu kenkuana a nangayab kadakayo ti panangallukoy nga aramidenyo dayta. ⁹ Paalsaen ti bassit a lebadura ti sibubukel a masa. ¹⁰ Adda panagtalekko kadakayo iti Apo a saankayo nga agpanunot iti sabali pay a wagas. Sagabaento ti mangrirriribok kadakayo ti bukodna a pannakaukom, siasinoman isuna. ¹¹ Kakabsat, no iwarwaragawagko pay laeng ti pannakakugit, apay a maidaddadanesak pay laeng? Iti kasta, madadaelto ti pakaitibkolan a bato iti krus. ¹² Tarigagayak a kaponen dagiti siasinoman a mangiyaw-awan kadakayo dagiti bagbagida. ¹³ Ta dakayo kakabsat, naayabankayo iti pannakawayawaya. Ngem saanyo koma nga usaren ti pannakawayawayayo a kas gundaway a maipaay iti lasag; imbes ketdi, pagserbianyo iti tunggal maysa babaen iti ayat. ¹⁴ Ta naipatungpal ti sibubukel a linteg iti maysa a sao, "Masapul nga ayatem dagiti kaarrubam a kas iti bagim". ¹⁵ Ngem no kagaten wenno tilmonenyo ti tunggal maysa, kitaenyo ta saanyo a dadaelen iti tunggal maysa. ¹⁶ Ibagak a magnakayo babaen iti Espiritu ket saanyonto a matungpal dagiti tarigagay iti lasag. ¹⁷ Ta dagiti tarigagay ti lasag ket maibusor iti Espiritu, ken dagiti tarigagay iti Espiritu ket maibusor iti lasag. Ta kagura dagitoy ti tunggal maysa, tapno saanyo nga maaramid dagiti banbanag a tartarigagayanyo nga aramiden. ¹⁸ Ngem no idaldalannakayo ti Espiritu, saannakayo nga iturturayan iti linteg. ¹⁹ Ita, makita dagiti aramid iti lasag. Dagitoy ket kinaderrep, kinarugit, tarigagay ti lasag, ²⁰ panagdayaw kadagiti didiosen, kinamananggagamud, kinamanangbubusor, panagraranget, panagimon, nalaka a panagunget, panagi-innagaw, saan a panagtitinnunos, panagsisina, ²¹ panagapal, kinamammartek, panagraranget gapu iti kinabartek, ken dagiti dadduma pay a banbanag a kas kadagitoy. Ballaagankayo a kas iti panangballaagko kadakayo idi a saanto a matawid dagiti agar-aramid kadagiti kakastoy a banbanag ti pagarian ti Dios. ²² Ngem dagiti bunga ti Espiritu ket ayat, rag-o, kappia, kinaanus, kinamanangngaasi, kinaimbag, pammati, ²³ kinaalumanay, ken panagteppel iti bagi. Awan ti linteg a maibusor kadagiti kakastoy a banbanag. ²⁴ Inlansa dagiti naibilang kenni kristo Jesus iti krus ti lasag nga addaan kadagiti regget ken dagiti amin a dakes a tarigagayna. ²⁵ No agbiagtayo babaen iti Espiritu, masapul a magnatayo met babaen iti Espiritu. ²⁶ Saantayo nga agbalin a natangsit, saantayo a paungeten ti tunggal maysa wenno saantayo nga apalan ti tunggal maysa.