¹ Maag a taga-Galacia! Siasino ti nangkulam kadakayo? Nalawag a naipakita kadakayo a ni Jesu-Kristo ket nailansa iti imatangyo. ² Kayatko laeng a maammoan daytoy manipud kadakayo. Inawatyo kadi ti Espiritu babaen kadagiti aramid ti linteg wenno babaen iti panamati iti nangngeganyo? ³ Maagkayo kadi launay? Nangrugikayo kadi iti Espiritu tapno agleppas laeng iti nainlasagan? ⁴ Nagsagabakayo kadi kadagiti adu unay a banbanag para iti awan kaipapananna, no pudno nga awan kaipapananna dagitoy? ⁵ Ket isuna kadi a mangmangted iti Espiritu kadakayo ken agar-aramid kadagiti nabileg nga ar-aramid kadakayo, aramidenna kadi daytoy babaen kadagiti aramid ti linteg wenno babaen iti panangdengngeg a mabuyogan ti pammati? ⁶ Namati ni Abraham iti Dios ken naibilang daytoy kenkuana a kas kinalinteg. ⁷ Iti isu met laeng a wagas, awatenyo ngarud a dagiti namati ket annak ni Abraham. ⁸ Idi pay ket nakitan ti Nasantoan a Surat a palintegento ti Dios dagiti Hentil babaen ti pammati, naikasaba iti ebanghelio kenni Abraham: a kunana "Mabendisionanto ti amin a nasion babaen kenka." ⁹ Dagiti namati ket nabendisionan ngarud a kadua ni Abraham nga addaan pammati. ¹⁰ Adda iti pannakailunod dagiti agtalek iti aramid ti linteg. Ta naisurat, "Nailunod ti tunggal maysa a saan a sumursurot iti amin a banbanag a naisurat iti libro ti linteg, nga aramiden amin daytoy." ¹¹ Nalawag ita nga awan ti palpalintegen ti Dios babaen iti linteg, ta "Agbiagto ti nalinteg babaen iti pammati." ¹² Saan a naggapu ti linteg iti pammati, ngem ketdi, "Isuna a mangar-aramid kadagitoy a banbanag iti linteg ket agbiagto babaen kadagiti linteg." ¹³ Sinubbotnatayo ni Kristo manipud iti lunod ti linteg idi nagbalin isuna a lunod para kadatayo. Ta naisurat, "Nailunod ti tunggal maysa a nakabitin iti kayo." ¹⁴ Ti panggep dayta ket umay koma ti bendision nga adda kenni Abraham kadagiti Hentil babaen kenni Kristo Jesus, tapno maawattayo koma ti kari iti Espiritu babaen iti pammati. ¹⁵ Kakabsat, agsasaoak a kas tao. Uray idi naaramiden ti natao-an a tulag, awan ti mangwaswas wenno mangnayon iti daytoy. ¹⁶ Ita, naisao dagiti karkari kenni Abraham ken kadagiti kaputotanna. Saanna nga ibagbaga ti, "kadagiti kaputotan," a maipapan iti adu, no di ket iti maymaysa laeng, "iti kaputotam," nga isu ni Kristo. ¹⁷ Ibagak daytoy ita. Ti linteg nga immay kalpasan iti uppat a gasot ken tallo pulo a tawen ket saanna a paawanen ti bileg ti immuna a tulag nga inaramid ti Dios, tapno ikkatenna ti kari . ¹⁸ Ket no immay ti tawid babaen ti linteg, saanton a pulos nga umay babaen iti kari. Ngem inted ti Dios daytoy nga awan bayadna kenni Abraham babaen iti kari. ¹⁹ Ania ngarud ti panggep ti linteg? Nainayon daytoy gapu kadagiti panagsalungasing aginggana nga umayto ti kaputotan ni Abraham kadagiti nakaikarianna. Naipaulog ti linteg babaen kadagiti anghel, babaen iti ima ti mangibabaet. ²⁰ Ket saan laeng a maymaysa a tao ti mangibabaet. Ngem maymaysa laeng ti Dios. ²¹ Ngarud, maibusor kadi ti linteg kadagiti karkari ti Dios? Pudno a saan! Ta no naited ti linteg a nakaited iti biag, pudno nga immay koma ti kinalinteg babaen iti dayta a linteg. ²² Ngem imbalud ti Nasantoan a Surat dagiti amin a banbanag iti babaen ti basol tapno iti kari a maigapu ti pammati kenni Jesu-Kristo ket maited koma kadagiti mamati. ²³ Ngem sakbay nga immay ti pammati, naibaludtayo iti babaen ti linteg aginggana iti pannakaipakaammo iti pammati. ²⁴ Isu ngarud a nagbalin ti linteg a mangaywan kadatayo aginggana nga immay ni Kristo, tapno mapalintegtayo babaen iti pammati. ²⁵ Ita ta dimteng ti pammati, awantayon iti panangsaluad iti mangay-aywan. ²⁶ Gapu ta aminkayo ket annak ti Dios babaen iti pammati kenni Kristo Jesus. ²⁷ Aminkayo a nabautisaran ken kristo ket inkawesyon ni Kristo. ²⁸ Awan ti Judio wenno Griego, tagabu wenno nawaya, lalaki wenno babai, ta maymaysakayo amin kenni Kristo Jesus. ²⁹ Ket no kukuanakayo ni Kristo, kaputotannakayo ngarud ni Abraham, dagiti agtawid segun iti kari.