1
Ni Pablo, maysa nga apostol - saan nga apostol manipud kadagiti tattao wenno babaen iti tao, ngem babaen kenni Jesu-Kristo ken ti Dios Ama, a nangpagungar kenkuana.
2
ken kadagiti amin nga kakabsat, agsursuratak kadagiti iglesia ti Galacia.
3
Parabur kadakayo ken kappia manipud iti Dios nga Amatayo ken ti Apo a Jesu-Kristo,
4
a nangited iti bagina maipaay iti basbasoltayo tapno mawayawayaannatayo manipud iti daytoy agdama a lubong iti kinadakes, segun iti pagayatan ti Dios ken Amatayo.
5
Kenkuana ti dayag iti agnanayon nga awan patinggana. Amen.
6
Masdaawak ta nagbiitkayo a tumaltallikod kenkuana a nangawag kadakayo babaen iti parabur ni Kristo. Masdaawak
ta sumurotkayo iti sabali nga ebanghelio.
7
Awan ti sabali nga ebanghelio, ngem adda dagiti sumagmamano a lallaki a mangrirriribuk kadakayo ken kayatda a tiritiren ti ebanghelio ni Kristo.
8
Ngem uray no dakami wenno maysa nga anghel manipud langit ti mangiwaragawag kadakayo iti ebanghelio a sabali ngem iti inwaragawagmi kadakayo, rumbeng a mailunod isuna.
9
Kas imbagami idi, ita ibagak manen, "No adda mangiwaragawag kadakayo iti ebanghelio malaksid iti siguden nga inawatyo, rumbeng a mailunod isuna.
10
Ta sapsapulek kadi ita ti yaanamong dagiti tattao wenno iti Dios? Agsapsapulak kadi tapno maay-ayo dagiti tattao? No padpadasek pay laeng nga ay-aywen dagiti tattao, saanak nga adipen ni Kristo.
11
Ta kayatko a maammoanyo, kakabsat, a saan a naggapu ti ebanghelio nga inwaragawagko kadagiti tattao laeng.
12
Saanko nga inawat daytoy manipud iti siasinoman a tao, saan met a naisuro daytoy kaniak. Ngem ketdi, babaen daytoy iti panangipaltiing ni Jesu-Kristo kaniak.
13
Nangngeganyo ti maipapan iti sigud a kabibiagko iti Judaismo, no kasano ti nakaro a panangidadanesko kadagiti iglesia ti Dios iti nalabes unay ken ti panangdaddadaelko iti daytoy.
14
Inartapak dagiti kaaduan a kasadarak ken dagiti kailiak a Judio iti Judaismo. Nagregtaak iti kasta unay maipaay kadagiti kaugalian dagiti kapuonak.
15
Ngem naay-ayo ti Dios a nangpili kaniak manipud iti tian ni inak. Inawagannak babaen iti paraburna
16
tapno ipakaammona ti Anakna kaniak, tapno ikasabak isuna kadagiti Hentil. Saanak a nakiuman a dagus iti lasag ken dara
17
ken saanak a simmang-at iti Jerusalem para kadagiti nagbalin nga apostol sakbay kaniak. Ngem ketdi, napanak idiay Arabia ken kalpasanna, nagsubliak idiay Damasco.
18
Kalpasan ti tallo a tawen simmang-atak iti Jerusalem tapno sarungkarak ni Cefas ken nakipagnaedak kenkuana iti sangapulo ket lima nga aldaw.
19
Ngem awan ti nakitak a sabali nga apostol malaksid kenni Santiago, ti kabsat ti Apo.
20
Kitaem, iti sangoanan ti Dios, saanak nga agul-ulbod kadagiti isursuratko kadakayo.
21
Kalpasanna, napanak kadagiti rehion ti Siria ken Cilicia.
22
Saandak pay a nakitkita dagiti iglesia ti Judea nga adda ken Cristo,
23
ngem mangmangngegda laeng. "Isuna a nangidadanes kadatayo idi, iwarwaragawagna ita ti pammati a dinadaelna."
24
Daydayawenda ti Dios gapu kaniak.