1
Ita, maipanggep iti taraon a naidaton kadagiti didiosen: Ammotayo nga "adda amin pannakaammotayo." Agpannakkel ti pannakaammo, ngem dumakdakkel ti ayat.
2
No ipagarup ti siasinoman nga ammona ti maysa a banag, dayta a tao ket saanna pay nga ammo a kas ti rumbeng nga ammona.
3
Ngem no ay-ayaten ti siasinoman ti Dios, dayta a tao ket am-ammona.
4
Isu a maipanggep iti pannangan iti naidaton a makan kadagiti didiosen: Ammotayo a "ti didiosen iti daytoy a lubong ket awan serserbina" ken "awan sabali a Dios no di ket ti maymaysa a Dios."
5
Ta adu dagiti maaw-awagan a dios idiay langit wenno ditoy daga, a kas ti kinaadda dagiti adu a "dios ken ap-appo."
6
"Ngem para kadatayo, adda laeng maymaysa a Dios, iti Ama, a nagtaud kenkuana amin a banbanag, ken agbibiagtayo gapu kenkuana, ken maymaysa nga Apo a ni Jesu-Kristo, a babaen kenkuana ket adda amin a banbanag, ken babaen kenkuana nga addatayo."
7
Nupay kasta, daytoy a pannakaammo ket awan iti tunggal maysa. Ngem ketdi, nagrukbab dagiti dadduma idi iti didiosen, ken kankanenda daytoy a taraon a kasla maysa a banag a naidaton iti didiosen. Iti kasta narugitan dagiti konsensiada gapu ta nakapoy daytoy.
8
Ngem ti taraon ket saannatayo nga iyasideg iti Dios. Saantayo a dakes no saantayo a mangan wenno nasayaat no kanentayo daytoy.
9
Ngem salwadam a ti wayawayam ket saan nga agbalin a pakaitibkolan ti maysa a nakapsut ti pammatina.
10
Ta kaspangarigan adda maysa a tao a makakita kenka, nga addaaan iti pannakaammo, a mangmangan iti taraon idiay templo ti didiosen. Saan kadi a ti nakapuy a konsensiana ket mapatured a mangan iti naidaton iti didiosen?
11
Isu a gapu iti pannakaawatyo maipanggep iti pudno a kababalin dagiti didiosen, ti nakapsut a kakabsat, a nakatayan ni Kristo, ket nadadael.
12
Ngarud, no makabasolka iti kakabsatmo ken nasugatam ti nakapuy a konsensiada, makabasolka kenni Kristo.
13
Ngarud, no ti taraon ti pakaitibkolan ti kabsatko, saanakton pulos a mangan manen ti karne, tapno saan a siak ti pakaigapuan a matinnag ti kabsatko.