¹ Sa kapapantagan oto a masa, na si Cesar Agostos a Solutan sa Roma na inisugo iyan a milista so langon a bibiyag a taw sa doniya. ² Giyai e paganay a kinilistaan ko manga taw sako kapapantagan a si Kiriniyo e governador sa Siriya. ³ Kagiyakamaoto na Somiyong so oman e isa a taw ko siti a pimbawataan on ka an milista. ⁴ Si mambo si Yusop na giyanatan iyan so siti a Nasarit roo sa Galili na somiyong sa Bitlihim sa Yodiya ka giyoto e mapapayag a inged e Daod sabap sa kababadan sekaniyan e Daod. ⁵ Somiyong roo si Yusop a pediyan si Mariam ka an siran milista a matataalik a kakhawinga rekiran na sa maoto na si Mariam na pakatatalingomaan a kapembawata iyan. ⁶ Sii ko katatago iran sa Bitilihim na miyaoma den so gawii a kapembawata e Mariyam. ⁷ Inimbawata iyan so kaka a wata iyan na mama, na biyongkosan iyan so wata sa manga dinis ago liyokan iyan sii ko manga ragami ko pekhanan o manga ayam, ka da den a kiyaminan kiran ko walay a pembolosan. ⁸ Sangkoto a gagawii na aden a manga tomatagikor sa bilibili sii ko manga pangomaan a kena a ba mawatan sa Bitlihim ka pephagipaten iran so manga bilibili iran. ⁹ Na miphayag kiran so isa a malaikat o Kadenan, na sominindaw kiran so sigay o Kadnan, na tanto siran a miyanga alek. ¹⁰ Ogaid na gominiraw kiran so malaikat a "Di kano pekhalek, ka inowitan ko sekano sa mapiya a tothol a tanto a ikhababaya o langon a taw. ¹¹ Sii sa angkai a gawii na inimbawata sa siti o Daod so Pephanabet rekano. Sekaniyan so Al Masih a aya Kadnan. ¹² Giyai e khikilala niyo ron: khatoon iyo so maito a wata a bobongkosan sa manga dinis a lolokanen sii ko manga ragami ko pekhanan no mga ayam." ¹³ Na sagogonaa den na tekaw den miyakadakel so manga malaikat a poon sa kasorgaan a pephodin iran so Allah a tig iran a, ¹⁴ “Mababantog so Allah roo sa kasorgaan, na sii sa doniya na lomilintad so manga taw a ikasosoat iyan!" ¹⁵ Kagiya mama-kakasoy so manga malaikat sa kasorgaan, na mimbibitiyarai so manga tomatagikor ko manga bilibili na tig o oman e isa ko ped iyan a "Sumong tano sa Bitlihim ka an tano mailay angkai a miyanggolaola a piyakitokawan rekitano o Kadnan." ¹⁶ Na minggagaan siran roo somong, na miyatoon iran si Mariyam ago si Yusop, na miyailay iran so wata a pakaiigaan ko pekhanan no manga pangangayamen. ¹⁷ Na oriyan o kiyailaya iran on na piyakalangkap iran so pitharo kiran o malaikat makapantag sangkaoto a wata. ¹⁸ Na so langon o miyamakaneg sii na miyamemesa ko pitharo rekiran o manga tomatagikor sa bilibili. ¹⁹ Ogaid na si Mariyam na tiyanodan iyan langon angkai a miyanggolaola a di niyan dii pamimikiranen. ²⁰ Na mimbabaling so manga tomatagikor sa bilibili a pembantogen ago pephodin iran so Allah sabap ko langon a miyaneg iran ago miyailay iran, ka giyoto e pitharo rekiran o malaikat. ²¹ Sii ko ikawalo gawii a aya den katoria ko wata na iningaranan sekaniyan sa Isa, a so ngaran a inibegay rekaniyan o malaikat sa daon pen kikeraringen. ²² Kagiya maipos so manga gawii a gii kashoti e Mariyam ago si Yusop a miyatoman so sogoan o Kitab o Mosa na inowit iran so wata roo sa Yarosalim ka phaladen iran ko Kadnan. ²³ Ka misosorat ko Kitab o Kadnan a "Oman e kaka a wata a mama na paliyogat a ishenggay a rek o Kadnan." ²⁴ Inawidan iran mambo so ishapaat iran ko Allah a aya iran kiyatomana ko katharo o Kitab o Kadnan a "apiya anda ko dowa timan a marapatik o di na dowa timan a kangodaan a pagapak." ²⁵ Sa masa oto na aden a mama a mababaling sa Yarosalim a aya ngaran iyan na si Simiyon. Maontol sekaniyan ago baraamal a gii niyan penayaon a kaphakalintad a Israil. Sumesenep rekaniyan so Soti a Roh. ²⁶ Na miyaphayag on o Soti a Roh a di phatay taman sa di niyan mailay so Al Masih a initopa o Kadnan. ²⁷ Somiyong si Simiyon ko Timplo a phagona so Roh, na samaoto na so wata, a si Isa, na inowit roo o manga lokes iyan sa kathomana iran ko sogoan o Kitab makapantag rekaniyan. ²⁸ Na kinowa e Simiyon so wata na siyakopo niyan, na piyanalamatan iyan so Allah a tigiyan a ²⁹ “Imanto, Kadnan, na khapakay den a matay so oripen ka a lomilintad, ka initoman ka so initopangka raken,. ³⁰ Na so den so manga mata ko e miyakailay ko kaphanabet ka ³¹ A miyatiyagar ka ko kamamasaan o langon a taw. ³² Sekaniyan e solo a phakapayag ko lalan ka sii ko langon o manga nasiyon ago mabantog mambo so manga pagtaw ngka a Israil." ³³ Miyamemesa so ama ago so ina o wata kagiya maneg iran so pitharo e Simiyon makapantag ko wata iran. ³⁴ Mandiyandi na inipangangarapan siran e Simiyon, na pitharo iyan ki Mariyam a ina o wata a "Giyangkai a wata na khabaloy a khasabapan ko kakhabinasa ago kakhasabet o madakel a manga taw sa Israil; na khabaloy mambo a nanao a sopaken o madakel a taw ³⁵ Seka mambo na tanto a pekharata a ginawa ngka a datar a khasokhar a pedang. a aya khasabapan ko kakhapayag o manga pamikiran a migagaib ko manga poso iran. ³⁶ Aden a babay roo a pephakapayag ko lalag o Allah a aya ngaran iyan na si Ana, a wata e Panowil a maaped ko kababadan ni Asir. Miyalokelokes sekaniyan a miyakathapi ago so karoma niyan ko miyakapito ragon ipoon ko kararagai ron, ³⁷ Na miyabalo ko miyakawalo polon ago pat ragon. Da sekaniyan den awa ko Timplo, ka gagawii daondaw na ron den peshimba a sarta a gii phowasa ago pephangangarapan. ³⁸ Sii den sangkoto a masa na miyakaoma sekaniyan ago piyanalamatan iyan so Allah, na pitharo iyan so makapantag sangkoto a wata ko langon a taw a phenayaon iran so kakhasabet a Yarosalim. ³⁹ Kagiya matoman e Yusop ago si Mariyam so langon a ipapaliyogat o Kitab o Kadnan na miyaling siran ko siti iran a Nasarit roo sa Galili. ⁴⁰ Miyakala den so wata ago mimbaloy a mabager. Mapepeno sekaniyan a ongangen, na shisii rekaniyan so limo o Allah ⁴¹ Oman ragon na peshong so manga lokes e Isa sa Yarosalim ka an iran gii mashelasela so Pista a Paska. ⁴² Isako makapagidad sekaniyan sa sapolo ago dowa ragon na somiyong siran roo peman ka aya iran olaola. ⁴³ Kagiya mapasad so Pista na mimbabaling siran, ogaid na mithalimbagak so wata, a si Isa, sa Yarosalim, na di ini katawan o manga lokes iyan. ⁴⁴ Aya katao iran on na lomolook sekaniyan ko manga ped iran, na miyakalalakaw siran den ko miyakasalongan. So kiyasagipaa iran sa diiran ped si Isa na inipangingisha iran ko manga tonganay iran ago so manga ginawai iran. ⁴⁵ Kagiya da iran sekaniyan matoon na komiyasoy siran sa Yarosalim kaan iran mapeloloba. ⁴⁶ Oriyan o miyakatelo den gawii na miyatoon iran sekaniyan sii ko Timplo a moontod a lomolook ko manga guro a pephamakinegen iyan ago pephangingishaan iyan siran. ⁴⁷ So langon a pephamakineg rekaniyan na miyanga bebengang ko kapakasasabot iyan ago manga sembag iyan. ⁴⁸ Kagiya mailay sekaniyan o manga lokes iyan na miyamemesa siran den, na pitharo on i ina iyan a "Wata aken, ino ngka rekami ai kidian? Saken ago si ama a ka na tanto a miyakaawid a akal ami sa gii ami reka giii kapelolobaa.?" ⁴⁹ Somimbag si Isa a gominiraw, "Ino ako niyo pen gii pelolobaa? Ba niyo di katawi a disomala a shisii ako ko Walay o Ama aken?" ⁵⁰ Ogaid na da iran kasaboti so pitharo iyan kiran. ⁵¹ Na miyonot kiran si Isa sa kiyabaling iran sa Nasarit na pepharatiyayaan iyan siran. Ogaid na si ina iyan na tatagoon iyan ko poso iyan angkai langon a miyanggolaola. ⁵² Na sii ko kapephakala e Isa na pepakala mambo so ongangen iyan, ago pekhababayaan sekaniyan o Allah ago so manga taw.