3 ¹ Шундай қилиб, яҳудийларнинг қандай устунлиги бор? Ёки хатнанинг нима фойдаси бор? ² Яҳудийлар ҳар жиҳатдан буюк устунликка эгадирлар, чунки Худонинг сўзи уларга ишониб топширилган эди. ³ Унда нима? Агар айримлари имонсиз бўлсалар, уларнинг имонсизлиги Худонинг содиқлигини бекор қиладими? ⁴ Йўқ, асло! Худо ҳақ, аммо ҳар бир инсон ёлғончидир. Зеро ёзилганидек: “Сен Ўз Сўзларингда оқланасан ва ҳукм қилишингда ғалаба қозонасан”. ⁵ Шундай экан, агар бизнинг ноҳақлигимиз Худонинг ҳақлигини янада тасдиқласа, унда нима деймиз? Инсон нуқтаи назаридан айтайин: Худо ғазабини ёғдираётганида ноҳақ бўладими? ⁶ Йўқ, асло! Унда Худо дунёни қандай қилиб ҳукм қилар экан? ⁷ Агарда Худонинг ҳақиқати менинг ёлғончилигим туфайли Унинг шуҳрати учун кўпроқ ошаётган бўлса, яна нима учун мен гуноҳкор сингари ҳукм қилинишим керак экан? ⁸ Яхшилик чиқсин, деб ёмонлик қилайликми? Чунки баъзилар бизга туҳмат қилиб: “Улар шундай демоқдалар,”- деб айтмоқдалар. Бундайларга адолатли ҳукм бор. ⁹ Шундай қилиб, нима, биз устунликка эгамизми? Ҳеч ҳам! Чунки яҳудийлар ҳам, юнонлар ҳам – ҳаммалари гуноҳ остида эканликларини исбот қилиб бердик-ку. ¹⁰ Худди ёзилганидек: “Ҳақ одам йўқ – биронта ҳам йўқдир. ¹¹ Тушунаётган ҳеч ким йўқ ва Худони излаётган ҳеч ким йўқдир. ¹² Ҳамма йўлдан озган, уларнинг ҳаммаси ярамасдир. Яхшилик қилувчи йўқ – биронта ҳам йўқдир. ¹³ Уларнинг томоғи очиқ тобутдир; ўз тиллари билан алдайдилар. Уларнинг лабларида илоннинг заҳри бор. ¹⁴ Уларнинг оғизлари лаънат ва аччиқликка тўла. ¹⁵ Уларнинг оёқлари қон тўкишга тездир. ¹⁶ Уларнинг йўлларида вайронагарчилик ва фалокатдир. ¹⁷ Улар тинчлик йўлларини билмайдилар. ¹⁸ Уларнинг кўз олдида Худонинг қўрқуви йўқдир”. ¹⁹ Энди биламизки, агар Қонун нимаики деса, Қонун остида бўлганларга айтади, токи ҳар бир оғиз тўсилсин ва бутун дунё Худонинг олдида айбдор бўлсин. ²⁰ Чунки Қонуннинг ишлари билан Унинг ҳузурида ҳеч ким оқланмайди, чунки Қонун орқали гуноҳ билинмоқда. ²¹ Аммо энди Қонундан ташқари Худонинг ҳақлиги намоён бўлди – (бунга Қонун ва пайғамбарлар ҳам гувоҳлик берганлар) – ²² яъни Исо Масиҳга бўлган имон орқали Худонинг ҳақлиги ҳамманинг ичида ва ҳамма имонлиларнинг устида намоён бўлди, чунки ҳеч қандай фарқ йўқдир. ²³ Зеро ҳамма гуноҳ қилган ва Худонинг шуҳратидан маҳрум бўлган, ²⁴ энди эса Исо Масиҳдаги қайта сотиб олиниш орқали Худонинг инояти билан текин оқланмоқда. ²⁵ Чунки Худо Ўзининг ҳақлигини кўрсатиш учун Масиҳни Унинг қонида ярашиш қурбонлигига тайинлаб қўйди, токи Худо одамларнинг илгари қилинган гуноҳларини Ўзининг сабр-тоқатида жазосиз қолдириб, ²⁶ ҳозирги вақтда Ўзининг ҳақлигини кўрсатиб, У ҳақ ва Исога ишонган одамни оқлайдиган Худо бўлсин. ²⁷ Унда мақтанишга сабаб қани? – Йўқ бўлди. Қайси қонун билан? Ишлар қонуни биланми? Йўқ, имон қонуни билан йўқ бўлди. ²⁸ Шундай қилиб, одам Қонун ишлари билан эмас, балки имон билан оқланади, деб ҳисоблаймиз. ²⁹ Наҳотки Худо фақатгина яҳудийларнинг Худоси бўлиб, мажусийларнинг Худоси бўлмаса? Албатта мажусийларнинг ҳам Худосидир. ³⁰ Чунки Худо ягонадир. У хатна қилинганларни имони бўйича, хатна қилинмаганларни эса имони орқали оқлайди. ³¹ Шундай қилиб, биз бу имон орқали Қонунни бекор қиляпмизми? – Йўқ, асло! Балки Қонунни тасдиқлаяпмиз.