16 ¹ Сизларга Кенхрея Жамоатининг жамоахизматчиси, опамиз Фивани тавсия этаман. ² Сизлар уни Раббимиз ҳақи муқаддасларга муносиб равишда қабул қилинглар. У нимага муҳтож бўлса, ёрдам беринглар, чунки у кўпларга ва менинг ўзимга ҳам ёрдамчи бўлган. ³ Исо Масиҳдаги ҳамкорларим Прискилла ва Акилга салом айтинглар. ⁴ Улар менинг жоним учун ўз бошларини тиккан эдилар. Уларга фақатгина мен эмас, балки мажусийлардан бўлган барча Жамоатлар ҳам миннатдорчилик билдирмоқдалар. Уларнинг уй Жамоатига ҳам салом айтинглар. ⁵ Масиҳ учун Ахаянинг бошланғичи бўлган менинг севиклим Епенетга ҳам салом айтинглар. ⁶ Биз учун кўп меҳнат қилган Мирйамга ҳам салом айтинглар. ⁷ Ҳаворийлар орасида ном чиқарган, мендан олдин Масиҳда бўлган менинг қамоқдош ва қариндошларим Андроник ҳамда Юнийга салом айтинглар. ⁸ Раббимдаги менинг севиклим Амплиасга салом айтинглар. ⁹ Масиҳдаги ҳамкоримиз Урбанга ва менинг севиклим Стахисга салом айтинглар. ¹⁰ Масиҳда синалган Апеллесга салом айтинглар. Аристовулнинг уйдагиларига салом айтинглар. ¹¹ Менинг қариндошим Ҳиродионга салом айтинглар. Раббийда бўлган Наркиснинг уйдагиларига салом айтинглар. ¹² Раббий ҳақи меҳнат қилаётган Трифен ва Трифосга салом айтинглар. Раббий ҳақи жуда кўп меҳнат қилган севикли Персисга салом айтинглар. ¹³ Раббийда танланган Руфга ҳамда менга онадек бўлган унинг онасига салом айтинглар. ¹⁴ Асинкрит, Флегон, Ҳермас, Патробас, Ҳермес ва улар билан бирга бўлган биродарларга салом айтинглар. ¹⁵ Филолог ва Юлияга, Нирей ва унинг синглисига, Олимпас ҳамда улар билан бирга бўлган барча муқаддасларга салом айтинглар. ¹⁶ Бир-бирингизга муқаддас ўпич билан саломлашинглар. Масиҳнинг ҳамма Жамоатлари сизларга салом йўллаяптилар. ¹⁷ Эй, биродарларим, сизлардан ўтинаманки, сизлар ўрганган таълимотингизга хилоф равишда бўлиниш ва васвасага сабаб бўладиган одамларни назорат қилинглар ва улардан четлашинглар. ¹⁸ Чунки бундай одамлар Раббимиз Исо Масиҳнинг эмас, балки ўз қорнининг қулидирлар. Улар тилёғламалик ҳамда нотиқлик билан соддадилларнинг юракларини алдайдилар. ¹⁹ Сизларнинг итоатингиз эса ҳаммага маълум, шунинг учун мен сизлардан хурсандман, бироқ сизлар яхшиликка нисбатан доно ва ёвузликка нисбатан соддадил бўлишингизни истайман. ²⁰ Тинчлик Худоси эса шайтонни тезда сизларнинг оёқларингиз остида янчиб ташлайди. Раббимиз Исо Масиҳнинг инояти сизлар биландир! ²¹ Менинг ҳамкорим Тимўтий ҳамда қариндошларим Луций, Ясон ва Сосипатр сизларга салом йўллаяптилар. ²² Бу мактубни ёзаётган мен – Тертий ҳам сизларга Раббимда салом айтяпман. ²³ Мени ва бутун Жамоатни уйига қабул қилган Гай ҳам сизларга салом йўллаяпти. Шаҳарнинг хазинабони Ераст ва биродаримиз Кварт ҳам сизларга салом йўллаяптилар. ²⁴ Раббимиз Исо Масиҳнинг инояти сизларнинг ҳаммаларингиз биландир! Омин.