13 ¹ Мана, денгиздан чиқиб келаётган етти бошли, ўн шохли йиртқич ҳайвонни кўрдим. Унинг шохларида ўнта тож бор эди. Бошларида эса куфрона номлар ёзилган эди. ² Мен кўрган йиртқич ҳайвон қоплонга ўхшар эди. Унинг оёқлари айиқнинг оёқларидек, унинг оғзи эса шернинг оғзидек эди. Аждар унга ўзининг қудрати, тахти ва буюк ҳокимиятни берди. ³ Мана, мен кўрдимки, унинг бошларидан бири гўёки сўйилган эди, аммо бу ҳалокатли яра шифоланди. Бутун ер эса йиртқич ҳайвонни кузатиб, ҳайратланди ва йиртқич ҳайвонга ҳокимият берган аждарга сажда қилди. ⁴ Шунингдек: “Ким бу йиртқич ҳайвонга ўхшаш? Ким у билан жанг қила олади?”- дея ҳайвонга сажда қилди. ⁵ Йиртқич ҳайвонга мағрур ва куфрона сўзлайдиган оғиз берилди. Унга қирқ икки ой фаолият юритиш ҳокимияти ҳам берилди. ⁶ У Худонинг номи, Унинг қароргоҳи ва осмонда яшайдиганларни куфрлаш мақсадида Худога куфр келтириш учун оғзини очди. ⁷ Унга муқаддаслар билан уришиш ва уларни енгиш учун изн берилди. Шунингдек, ҳар бир қабила, халқ, миллат ва элатнинг устидан ҳокимият берилди. ⁸ Дунё яратилишиданоқ сўйилган Қўзининг ҳаёт китобида исмлари ёзилмаган, ер юзида яшаётганларнинг барчаси унга сажда қилишади. ⁹ Кимнинг қулоғи бор бўлса, эшитсин: ¹⁰ Ким асирга олиб кетса, унинг ўзи асирга олиб кетилади. Ким қилич билан ўлдирса, унинг ўзи қилич билан ўлдирилади. Бунда муқаддасларнинг бардоши ҳамда имони бор. ¹¹ Сўнгра мен ердан чиқиб келаётган бошқа бир йиртқич ҳайвонни кўрдим. Унинг қўзиникига ўхшаш иккита шохи бор эди. У аждардек гапирар эди. ¹² Шу йиртқич ҳайвон биринчи йиртқич ҳайвоннинг бор ҳокимияти билан унинг қаршисида ҳаракат қилмоқда ва бутун ерни ҳамда унда яшовчиларни ҳалокатли яраси шифоланган биринчи йиртқич ҳайвонга сажда қилишга мажбур қилмоқда. ¹³ У шундай буюк аломатлар яратадики, ҳатто одамлар олдида самодан ерга олов туширади. ¹⁴ Йиртқич ҳайвоннинг олдида яратиши учун унга берилган мўъжизалар билан у ер юзида яшайдиганларни аврайди. У ер юзида яшайдиганларга қиличдан ярага эга бўлган, аммо тирик қолган йиртқич ҳайвоннинг тасвирини ясашни айтади. ¹⁵ Унга йиртқич ҳайвоннинг тасвирига руҳ киритиш учун имкон берилди, токи йиртқич ҳайвоннинг тасвири шундай сўзлаб, ҳаракат қилсинки, тасвирга сажда қилмайдиган ҳар бир киши ўлдирилсин. ¹⁶ У шундай ҳам қиладики, ҳамманинг — катталару кичикларнинг, бойлару қашшоқларнинг, озодлару қулларнинг ўнг қўлига ёки пешанасига тамға қўйилади. ¹⁷ Шундай қилиб, йиртқич ҳайвоннинг тамғаси, ё унинг исми, ё унинг исмининг рақамига эга бўлганлардан бошқа ҳеч ким ҳеч нарса сотиб ола олмайди ҳам, сота олмайди ҳам. ¹⁸ Бунда донолик бор. Кимнинг ақли бўлса, йиртқич ҳайвоннинг сонини ҳисоблаб чиқсин, чунки бу сон – инсоннинг сонидир. Унинг сони олти юз олтмиш олтидир.