12 ¹ Осмонда буюк аломат содир бўлди: қуёшга бурканган аёл пайдо бўлди, унинг оёқлари остида ой, унинг бошида эса ўн иккита юлдуздан иборат тож бор эди. ² У ҳомиладор бўлиб, тўлғоқ азобларидан ҳамда оғриқдан қичқирар эди. ³ Осмонда яна бошқа аломат содир бўлди – мана, етти бошли, ўн шохли катта қизил аждар пайдо бўлди, унинг бошларида эса еттита тож бор эди. ⁴ Унинг думи осмондан юлдузларнинг учдан бир қисмини тортиб кетди ва уларни ерга улоқтирди. Шу аждар туғиши керак бўлган хотиннинг ёнида турди, токи туққанидан кейин унинг боласини ютиб юборсин. ⁵ Аёл эса барча халқларга темир ҳасса билан чўпонлик қилиши керак бўлган ўғилни туғди, ва унинг боласи Худога, Унинг тахти олдига олиб чиқиб кетилди. ⁶ Аёл эса саҳрога қочиб кетди. У ерда Худодан унга жой тайёрланган эди, токи у бир минг икки юз олтмиш кун у ерда озиқлансин. ⁷ Осмонда уруш бўлди – Микаэл ва унинг фаришталари аждарга қарши жанг қилдилар. Аждар ва унинг фаришталари эса уларга қарши жанг қилдилар, ⁸ аммо дармонсиз бўлиб қолдилар ва уларга осмонда бошқа жой топилмади. ⁹ Шунда бутун дунёни алдаб йўлдан оздираётган, шайтон ва иблис, деб аталадиган улуғ аждар, қадимги илон ағдарилди. У ўз фаришталари билан бирга ерга ағдарилди. ¹⁰ Мен осмонда сўзлаётган кучли овозни эшитдим: “Энди Худойимизнинг нажоти, қудрати, шоҳлиги ҳамда Масиҳнинг ҳокимияти амалга ошди, чунки биродарларимизнинг айбловчиси, туну кун Худонинг олдида уларни айбловчи ерга ағдарилди. ¹¹ Улар эса Қўзининг қони ва ўзларининг гувоҳлик сўзи билан уни енгдилар. Улар ўз ҳаётларини то ўлгунча севмаган эдилар. ¹² Шунинг учун, эй, самолар ва унда яшовчилар, қувонинглар! Ерда ва денгизда яшовчиларнинг ҳолига вой! Чунки иблис вақт оз қолганини билиб, сизнинг олдингизга ўта ғазаб билан тушди”. ¹³ Аждар ўзининг ер юзига ағдарилганини кўриб, ўғил туққан аёлни қува бошлади. ¹⁴ Аёлга эса улкан бургутнинг икки қаноти берилди, токи у илоннинг юзидан саҳрога, ўзининг жойига учсин ва ўша жойда маълум вақт, муддат ҳамда ярим вақт озиқлансин. ¹⁵ Илон аёлни тошқинда оқизиш учун унинг ортидан оғзидан тошқиндек сув чиқарди. ¹⁶ Аммо ер аёлга ёрдам берди, ер ўз оғзини очиб, аждар оғзидан чиқарган тошқинни ютиб юборди. ¹⁷ Шунда аждар аёлдан қаттиқ ғазабланди. У аёлнинг уруғининг қолдиғи, яъни Худонинг амрини сақлаётган ҳамда Исо Масиҳнинг гувоҳлигига эга бўлганлар билан жанг қилгани чиқди.