20 ¹ Раббий яна Мусога сўзлаб деди: ² “Исроил ўғилларига шуни айтгин: Исроил ўғилларидан ёки исроилликларнинг ораларида яшайдиган мусофирлардан бирор киши ўз фарзандларидан бирортасини Молекка берса, у ўлимга маҳкум этилсин: ернинг халқи уни тошбўрон қилсин. ³ Мен юзимни ўша одамга қарши қиламан ва уни халқининг орасидан қириб ташлайман, чунки Менинг Муқаддасгоҳимни булғаш ва Менинг муқаддас номимни беобрў қилиш учун у фарзандларидан бирини Молекка берди. ⁴ Ернинг халқи эса фарзандларидан бирини Молекка берган одамга эътибор бермаса ва уни ўлдирмаса, ⁵ унда Мен юзимни ўша одам ва унинг оиласига қарши қилиб, уларни халқдан қириб ташлайман. Шунингдек, у билан Молекнинг ортидан зинокорона юрганларнинг барчасини қириб ташлайман. ⁶ Кимки ўликларни чақирувчи ва сеҳргарларнинг ортидан зинокорона юриш учун уларга мурожаат қилса, унда Мен юзимни ўша одамга қарши қиламан ва уни ўз халқининг орасидан қириб ташлайман. ⁷ Ўзларингизни покланглар ва муқаддас бўлинглар, чунки Мен сизларнинг Раббий Худойингиз муқаддасман. ⁸ Менинг низомларимга амал қилинглар ва уларни бажаринглар, чунки Мен сизларни муқаддасловчи Раббийман. ⁹ Кимки ўз отасини ёки онасини лаънатлайдиган бўлса, бундай одам ўлимга маҳкум этилсин. У отасини ва онасини лаънатлади, унинг қони унинг устидадир. ¹⁰ Агар кимдир эрлик аёл билан зино қилса, агар кимдир ўз яқинининг хотини билан зино қилса, унда зинокор эркак ҳам, зинокор аёл ҳам ўлимга маҳкум этилсин. ¹¹ Ким отасининг хотини билан ётса, ўша одам отасининг яланғочлигини очган бўлади, уларнинг иккови ҳам ўлимга маҳкум этилсин, уларнинг қони уларнинг устидадир. ¹² Кимки ўзининг келини билан ётса, унда иккови ҳам ўлимга маҳкум этилсин. Улар жирканч иш қилдилар, уларнинг қони уларнинг устидадир. ¹³ Агар бирор эркак аёл билан ётгандек, бошқа эркак билан ётса, иккови ҳам жирканч иш қилган бўлдилар. Иккови ҳам ўлимга маҳкум этилсин, уларнинг қони уларнинг устидадир. ¹⁴ Агарда кимдир ўзига хотин олиб, устига унинг онасини оладиган бўлса, бу бузуқликдир. Бундай эркак ва аёлларни оловда ёндириб юбориш керак, токи ораларингизда бузуқлик бўлмасин. ¹⁵ Ким мол билан қўшилса, у ўлимга маҳкум этилсин, ҳайвонни ҳам сўйинглар. ¹⁶ Агар аёл бирор ҳайвон билан қўшилиш учун унинг олдида турса, унда аёлни ҳам, ҳайвонни ҳам ўлдир. Улар ўлимга маҳкум этилсин, уларнинг қони уларнинг устидадир. ¹⁷ Агар кимдир ўзининг синглисини, отасининг қизини ёки онасининг қизини олса ва унинг яланғочлигини кўрса ва синглиси ҳам унинг яланғочлигини кўрса, бу шармандаликдир. Улар ўз халқи ўғилларининг кўзи ўнгида қириб ташлансин. У синглисининг яланғочлигини очди, шунинг учун у гуноҳини ўзида кўтариб кетади. ¹⁸ Кимки хотинининг ҳайз кўриш вақтида у билан ётса ва унинг яланғочлигини очса, унда у хотинининг оқимини очган бўлади, хотини ҳам ўзининг қон оқимини очган бўлади: иккови ҳам ўз халқининг орасидан қириб ташлансин. ¹⁹ Онангнинг опа-синглисининг ҳамда отангнинг опа-синглисининг яланғочлигини очма. Чунки бундай киши ўзининг қон қариндошини яланғоч қилган бўлади: бундайлар ўз гуноҳларини кўтариб кетадилар. ²⁰ Агар ким амакисининг ёки тоғасининг хотини билан ётса, бундай киши амакисининг ёки тоғасининг яланғочлигини очган бўлади: бундайлар ўз гуноҳларини кўтариб юриб, фарзандсиз ўлиб кетади. ²¹ Агар ким ака ёки укасининг хотинини олса, бу ― нопокликдир: у ака ёки укасининг яланғочлигини очди. Улар фарзандсиз ўтадилар. ²² Менинг ҳамма низомларимга ва Менинг барча қонунларимга амал қилинглар ҳамда уларни бажаринглар, токи яшашингиз учун Мен сизларни олиб бораётган ер сизларни ўзидан ирғитиб ташламасин. ²³ Мен сизларнинг қаршингиздан қувиб юбораётган халқларнинг одатлари бўйича йўл тутманглар, чунки улар барча шу ишларни қилдилар ва Мен улардан ҳазар қилдим. ²⁴ Мен сизларга: “Уларнинг ерига сизлар эгалик қилинглар, сут ва асал оқаётган ерни Мен сизларга мерос қилиб беряпман”,- дедим. Мен – сизларни барча халқлардан ажратиб олган сизларнинг Раббий Худойингизман. ²⁵ Пок молни нопок молдан ва пок қушни нопок қушдан ажратинглар. Мен нопок, деб ажратган мол, қуш ва барча ерда судралиб юрувчи жонивор билан жонларингизни булғаманглар. ²⁶ Менинг олдимда муқаддас бўлинглар, чунки Мен Раббий муқаддасман ва сизлар Меники бўлишингиз учун Мен сизларни халқлар орасидан ажратиб олганман. ²⁷ Агар эркак ёки аёл ўликларни чақиришса ёки сеҳргарлик қилишса, унда улар ўлимга маҳкум қилинсинлар. Уларни тошбўрон қилиш керак, уларнинг қони ўзларининг устидадир”.