15 ¹ Раббий яна Мусо билан Аҳарўнга сўзлаб деди: ² “Исроил ўғилларига эълон қилиб айтинглар: Агар кимнингдир танасидан суюқлик оқса, у оқмаси туфайли нопок бўлади. ³ Мана бу – унинг оқмаси туфайли нопоклигининг кўрсаткичи: унинг танасидан унинг оқмаси оққанида ёки унинг оқмаси танасида ушланиб турганида, бу унинг нопоклигидир. ⁴ Оқмага эга бўлган одам ётган ҳар қандай тўшак нопок ва у ўтирган ҳар қандай буюм нопокдир. ⁵ Ким унинг тўшагига тегинса, ўша одам кийимларини ювиб, сув билан ювиниши керак ва у кечгача нопок бўлади. ⁶ Кимки оқмаси бўлган одам ўтирган бирор-бир буюмга ўтирса, ўша одам кийимларини ювиб, сув билан ювиниши керак ва у кечгача нопок бўлади. ⁷ Кимки оқмаси бўлган одамнинг танасига тегинса, ўша одам кийимларини ювиб, сув билан ювиниши керак ва у кечгача нопок бўлади. ⁸ Агар оқмаси бўлган одам пок одамга тупурса, ўша одам кийимларини ювиб, сув билан ювиниши керак ва у кечгача нопок бўлади. ⁹ Оқмаси бўлган одам ўтирган ҳар қандай арава нопок бўлади. ¹⁰ Унинг остида бўлган бирор буюмга тегинган ҳар ким кечгача нопок бўлади. Кимки бу буюмларни кўтарса, ўша одам кийимларини ювиб, сув билан ювиниши керак ва у кечгача нопок бўлади. ¹¹ Оқмаси бўлган одам қўлини сувда ювмасдан бирор кишига тегинса, ўша одам кийимларини ювиб, сув билан ювиниши керак ва у кечгача нопок бўлади. ¹² Оқмаси бўлган одам тегинган сопол идишни синдириб ташлаш керак. Ҳар қандай ёғоч идишни эса сув билан ювиш керак. ¹³ Оқмаси бўлган одам ўз оқмасидан қутулганидан сўнг, у покланиши учун ўзига етти кунни ҳисоблаши керак. Сўнг кийимларини ювиб, танасини тирик сув билан ювиши керак ва у пок бўлади. ¹⁴ Саккизинчи куни эса у ўзига иккита мусича ёки иккита ёш кабутарни олиб, Йиғин Чодирининг кириш жойига, Раббийнинг юзи қаршисига келиб, уларни руҳонийга берсин. ¹⁵ Руҳоний бу қушлардан бирини гуноҳ қурбонлигига, иккинчисини эса тамоман ёндириш қурбонлигига келтиради. Шунда руҳоний уни оқмасидан Раббийнинг қаршисида поклайди. ¹⁶ Агар бирор эркакда уруғ оқиши рўй берса, унда у бутун танасини сув билан ювиши керак ва у кечгача нопок бўлади. ¹⁷ Уруғ теккан ҳар қандай кийим ва ҳар қандай чарм сувда ювилиши керак ва кечгача нопок бўлади. ¹⁸ Агар эркак аёл билан ётса, унинг уруғи эса оқса, унда улар сувда ювинишлари керак ва кечгача нопок бўладилар. ¹⁹ Агар аёлда танасидан чиқаётган қон оқиши бўлса, унда ҳайз кўриши учун у етти кун алоҳида бўлиши керак. Унга тегинган ҳар кимса кечгача нопок бўлади. ²⁰ Ҳайз кўриши давомида у ниманинг устида ётса ва у ниманинг устида ўтирса, шуларнинг барчаси нопок бўлади. ²¹ Унинг тўшагига тегинган ҳар ким ўз кийимларини ювиб, сув билан ювиниши керак ва у кечгача нопок бўлади. ²² У ўтирган ҳар қандай буюмга тегинган ҳар ким кийимларини ювиб, сув билан ювиниши керак ва у кечгача нопок бўлади. ²³ Ким унинг тўшаги ёки у ўтирган буюмга тегинса, у кечгача нопок бўлади. ²⁴ Агар эри у билан қовушса, унда аёлнинг нопоклиги эрига ҳам ўтади, у етти кун нопок бўлади, у ётган ҳар қандай тўшак ҳам нопок бўлади. ²⁵ Агарда аёлда ҳайз бўлмаган кўп кунлар давомида қон кетса, ёки одатдаги ҳайз кунларидан унда узоқроқ қон кетса, унда нопоклиги оқаётган барча кунлари давомида, худди ҳайз кунлари давомидагидек, у нопокдир. ²⁶ Ҳайз кунлари давомидаги тўшаги сингари, у ётадиган ҳар қандай тўшак қон оқаётган барча кунларда нопок бўлади. Ҳайз кунларида нопок бўлаётгани сингари, у ўтирадиган ҳар қандай буюм нопок бўлади. ²⁷ Буларга тегинган ҳар ким нопок бўлади. У кийимларини ювиб, сув билан ювиниши керак ва у кечгача нопок бўлади. ²⁸ Аёл ўз қон оқишидан қутулганидан сўнг, у ўзига етти кунни ҳисоблаши керак ва шундан сўнг пок бўлади. ²⁹ Саккизинчи куни эса у ўзига иккита мусича ёки иккита ёш кабутарни олиб, уларни руҳонийга, Йиғин Чодирининг кириш жойига келтиради. ³⁰ Руҳоний қушлардан бирини гуноҳ қурбонлигига, бошқасини эса тамоман ёндириш қурбонлигига келтириб, уни ҳайз қони оқишидан Раббийнинг қаршисида поклайди. ³¹ Шу тарзда, Исроил ўғилларини уларнинг нопокликларидан сақланглар, токи улар, уларнинг орасида бўлган Менинг Чодиримни булғаб, ўзларининг нопокликларида ҳалок бўлмасинлар”. ³² Бу – оқмаси бўлган одам ҳақидаги ва уруғи оқиб, шу орқали нопок бўладиган одам ҳақидаги, ³³ ҳайз кетишидан қийналаётган аёл ҳақидаги ва оқмаси бўлган эркак ёки аёл ҳамда нопок аёл билан ётадиган эркак ҳақидаги қонундир.