3 ¹ Йешуа эрта тонгда турди, кейин улар Шиттимдан қўзғалиб, Йорданга келдилар. Йешуа ва Исроилнинг барча ўғиллари уни кечиб ўтмасдан, ўша ерда тунадилар. ² Уч кундан сўнг назоратчилар қароргоҳ бўйлаб юрдилар ³ ва халққа буюриб дедилар: “Раббий Худойингизнинг Аҳд Киботини, руҳонийларни ҳамда Киботни кўтариб келаётган левитларни кўрганингизда, сизлар ҳам ўз ўрнингиздан қўзғалиб, унинг ортидан боринглар. ⁴ Бироқ сизлар билан уларнинг орасидаги масофа икки минг тирсак ўлчамда бўлиши керак. Кетаётган йўлни билиш учун унга яқин келманглар: чунки сизлар бу йўлдан илгари ҳеч қачон юрмагансизлар”. ⁵ Йешуа халққа: “Ўзларингни покланглар, чунки эртага Раббий сизларнинг орангизда мўъжизалар яратади,”- деди. ⁶ Руҳонийларга эса Йешуа: “Аҳд Киботини олинглар ва халқнинг олдида боринглар,”- деди. Руҳонийлар Аҳд Киботини олиб, халқнинг олдида кетдилар. ⁷ Шунда Раббий Йешуага деди: “Мана шу кундан Мен сени бутун Исроил нигоҳида улуғлашни бошлайман, токи Мен Мусо билан қандай бирга бўлган бўлсам, сен билан ҳам худди шундай бирга бўлишимни улар билсинлар. ⁸ Сен эса, Аҳд Киботини кўтариб бораётган руҳонийларга буюриб: Йордан сувининг қирғоғига келганингиз заҳоти Йорданда тўхтанглар, деб айтгин”. ⁹ Йешуа Исроил ўғилларига: “Бу ерга келинглар ва сизларнинг Раббий Худойингизнинг сўзларини тингланглар,”- деди. ¹⁰ Сўнг Йешуа деди: “Сизларнинг олдингиздан канъанликларни, хетликларни, ҳивликларни, перизликларни, гиргошликларни, амўрликлар ва ябусликларни қувиб юборадиган тирик Худо сизларнинг орангизда эканлигини мана шундан билиб оласизлар: ¹¹ Мана, бутун ер Раббийсининг Аҳд Киботи сизлардан олдин Йордандан ўтади. ¹² Исроил қабилаларидан ўн икки нафар одам, яъни ҳар бир қабиладан бир нафардан одам олинглар. ¹³ Бутун ернинг Эгаси бўлмиш Раббийнинг Аҳд Киботини кўтариб бораётган руҳонийлар оёқларининг кафти Йордан сувига теккан заҳоти Йорданнинг суви қурийди, юқоридан оқаётган сув эса девор бўлиб туриб қолади”. ¹⁴ Шундай қилиб, халқ Йордандан ўтиш учун ўз чодирларидан қўзғалганида ва руҳонийлар халқнинг олдида Аҳд Киботини кўтариб борганларида, ¹⁵ Аҳд Киботини кўтариб бораётганлар Йорданга киргани заҳоти ва Киботни кўтариб бораётган руҳонийларнинг оёқлари Йорданнинг сувига ботгани заҳоти, (Йордан эса буғдой йиғим-терими вақтида барча қирғоқларидан тошади) ¹⁶ юқоридан оқаётган сув тўхтади ва жуда катта масофада, Заретан ёнидаги Адам шаҳригача девор бўлиб кўтарилди. Саҳро текислиги денгизга, яъни Туз денгизига қуйилаётган сув эса тугади ва қуриб қолди. ¹⁷ Шунда халқ Йерихонинг қаршисидан ўтди. Раббийнинг Аҳд Киботини кўтариб бораётган руҳонийлар эса, Йорданнинг ўртасидаги қуруқликда мустаҳкам турдилар. Бутун халқ Йордандан ўтиб бўлмагунича, барча исролликлар қуруқ ердан ўтдилар.