16 ¹ Сўнгра қуръа Юсуфнинг ўғилларига тушди: Йерихонинг ёнидаги Йордандан, Йерихо сувларидан шарққа қараб Йериходан Бейт-Эл тоғигача чўзиладиган саҳро уларнинг ҳудуди бўлди. ² Бейт-Элдан чегара Лузга кетади ва Атаротгача Арқи ҳудудига ўтади. ³ Кейин денгизга, Йафлети ҳудудига, қуйи Бейт-Хўрон ҳудудига ҳамда Гезерга тушади ва денгиз олдида тугайди. ⁴ Буни Юсуфнинг ўғиллари: Манашеҳ ва Эфрайим мерос қилиб олдилар. ⁵ Эфрайим ўғилларининг авлодларига кўра чегараси мана бу бўлди: шарқдан уларнинг улушининг чегараси Атарот-Аддар юқори Бейт-Хўронгача бўлди. ⁶ Сўнгра чегара Миқметаҳнинг шимолий томонидан денгизга кетади ва Таанат-Шилўҳнинг шарқий томонига бурилиб, Йанохаҳнинг шарқий томонидан уни кесиб ўтади. ⁷ Йанохаҳдан Атарот ва Нааратга тушиб, Йерихога бирлашиб кетади ва Йордангача етади. ⁸ Чегара Таппуаҳдан денгизга, Канаҳ дарёсига боради ва дарё билан тугайди. Мана шу – Эфрайим ўғилларининг авлодларига кўра уларнинг қабиласининг улушидир. ⁹ Манашеҳ ўғилларининг улуши орасида, Эфрайим ўғилларига шаҳарлар ажратилди, барча шаҳарлар қишлоқлари билан бирга эди. ¹⁰ Бироқ эфрайимликлар Гезерда яшаган канъанликларни қувиб юбормадилар, шу сабабли, ҳозирги кунгача канъанликлар эфрайимликларнинг орасида, уларга товон тўлаб яшамоқдалар.