11 ¹ Ҳазорнинг подшоҳи Йабин буларни эшитиб, Мадоннинг подшоҳи Йўбобга, Шимроннинг подшоҳига, Оқшофнинг подшоҳига, ² тоғларнинг шимолий томонида, Киннеретнинг жанубий томонидаги текисликларда, водийларда ҳамда ғарб томондан Новоҳ-Дорда яшовчи подшоҳларга, ³ шарқ томонда ва ғарб томонда яшовчи канъанликларга, амўрликларга, хетликларга, перизликларга, тоғда яшовчи ябусликларга ҳамда Миспаҳ еридаги Ҳермон яқинида яшовчи ҳивликларга одам юборди. ⁴ Улар ва улар билан уларнинг барча қўшини, сонининг кўплиги денгиз қирғоғидаги қумга тенг бўлган кўп сонли халқ от ва жуда ҳам кўп жанг аравалари билан чиқди. ⁵ Барча ушбу подшоҳлар биргаликда йиғилиб, Исроилга қарши жанг қилиш учун Мером сувлари бўйида биргаликда қароргоҳ қурдилар. ⁶ Бироқ Раббий Йешуага деди: “Улардан қўрқма, чунки эртага, чамаси мана шу вақтда Мен уларнинг барчасини қирғин қилиниши учун Исроил ўғилларига топшираман. Уларнинг отларининг томирини кес ва уларнинг жанговар араваларига ўт қўй”. ⁷ Йешуа ва у билан бирга жангга лаёқатли барча одамлар Мером сувларининг бўйида қўққисдан уларга қарши чиқдилар ва уларга ташландилар. ⁸ Раббий уларни Исроилнинг қўлига топширди ва уларни қириб ташладилар, уларнинг ортидан буюк Cидўнгача, Мисрофот-Маимгача, шарқ томонда Миспаҳ водийсигача таъқиб қилдилар. Уларни шундай қириб ташладиларки, улардан ҳеч ким тирик қолмади. ⁹ Йешуа улар билан Раббий унга нима деган бўлса, шундай йўл тутди: уларнинг отларининг томирларини кесди ва жанговар араваларига ўт қўйди. ¹⁰ Йешуа ўша пайта ортга қайтиб, Ҳазор шаҳрини қўлга киритди ва унинг подшоҳини қилич билан ўлдирди. Ҳазор эса авваллари ўша барча подшоҳликларнинг боши эди. ¹¹ Улар унда бўлган барча тирик жонни бутунлай йўқ қилиб, қиличнинг тиғи билан қириб ташладилар. Бирорта ҳам нафас олувчи жон қолмади. Ҳазорга эса у ўт қўйди. ¹² Йешуа ушбу подшоҳларнинг барча шаҳарларини, уларнинг барча подшоҳларини қўлга олди ва Раббийнинг қули Мусо буюрганидек, уларни бутунлаб йўқ қилиб, қиличнинг тиғи билан қириб ташлади. ¹³ Бироқ фақатгина Йешуа ўт қўйган Ҳазордан ташқари баландликларда турган барча шаҳарларни Исроил ёндирмади. ¹⁴ Ушбу шаҳарларнинг барча ўлжалари ва чорвасини Исроил ўғиллари талон-тарож қилдилар. Бироқ ҳар бир кишини улар қиличнинг тиғи билан ўлдирдилар ва уларнинг барчасини қириб ташладилар, бирорта ҳам нафас олувчи жонни қолдирмадилар. ¹⁵ Раббий Ўз қули Мусога қандай буюрган бўлса, Мусо Йешуага шундай буюрди. Йешуа эса худди шундай қилди ва Раббийнинг Мусога буюрган барча сўзларининг ҳеч биридан чекинмади. ¹⁶ Шу тарзда, Йешуа ушбу барча тоғли ерларни, барча жанубий ерларни, Гошеннинг барча ерларини, водийларни, текисликларни, Исроил тоғини, унинг этагидаги текисликларни, ¹⁷ яъни Сеир томонига ёйилган Халак тоғидан то Ҳермон тоғи ёнидаги, Лебанон водийсидаги Баал-гадгача уларни қўлга киритди. Уларнинг барча подшоҳларини қўлга олиб, уларни шикастлади ва ўлдирди. ¹⁸ Йешуа ушбу барча подшоҳлар билан узоқ вақт жанг олиб борди. ¹⁹ Гибъўн аҳолиси бўлмиш ҳивликлардан ташқари бирорта шаҳар Исроил ўғиллари билан иттифоқ тузмади. Уларнинг ҳаммасини жанг билан қўлга киритдилар. ²⁰ Чунки уларнинг қирғин қилишга топширилиши ва уларга шафқат қилинмаслиги, аммо Раббий Мусога буюрганидек қириб ташланишлари учун улар ўз юракларини қаттиқ қилишлари ва Исроилни уруш билан кутиб олишлари Раббийдан эди. ²¹ Ўша пайтда Йешуа келиб, тоғлардан, Хеброндан, Дебирдан, Анабдан, Яҳудонинг барча тоғларидан анакликларни қириб ташлади. Йешуа уларни шаҳарлари билан биргаликда бутунлай йўқ қилиб ташлади. ²² Исроил ўғилларининг ерида бирорта ҳам анакликлар қолмади, улар фақатгина Ғазода, Гатда ва Ашдодда қолдилар. ²³ Шундай қилиб, Раббий Мусога айтганидек, Йешуа бутун ерни қўлга киритди ва уни Исроилга, уларнинг қабилалари орасида тақсимлаб, улуш қилиб берди. Шундай қилиб, ер урушдан тинчиди.