14 ¹ Севгининг ортидан қувинглар. Руҳий инъомлар, айниқса, пайғамбарчилик қилиш учун рашқ қилинглар. ² Ким номаълум тилда гапирса, у одамларга эмас, Худога гапиради, чунки уни ҳеч ким тушунмайди. У Руҳ билан сирларни гапиради. ³ Ким пайғамбарчилик қилса, у барпо қилиш, далда бериш ва юпатиш учун одамларга гапиради. ⁴ Номаълум тилда гапирувчи ўзини барпо қилади, пайғамбарчилик қилувчи эса Жамоатни барпо қилади. ⁵ Сизларнинг ҳаммангиз номаълум тилларда гапиришингизни хоҳлайман, лекин пайғамбарчилик қилганингиз афзалроқдир. Агар фақатгина тилларда гапирувчи Жамоатни барпо қилиши учун ўша тилларни талқин қилмаса, унда пайғамбарчилик қилувчи номаълум тилларда гапирувчидан буюкроқдир. ⁶ Энди, биродарлар, агар мен сизларнинг олдингизга келиб, номаълум тилларда гапира бошласам-у, аммо ваҳий ёки билим билан, пайғамбарчилик ёки таълим билан уни сизларга тушунтириб бермасам, унда сизларга қандай фойда келтираман? ⁷ Ҳатто товуш чиқарадиган жонсиз най ёки чанг фарқли овозлар чиқармаса, най ёки чанг чалинаётганини қандай билиш мумкин? ⁸ Агар жанг карнайи ноаниқ овоз чиқарса, унда ким жангга тайёрлана бошлайди? ⁹ Шунга ўхшаб, агар тилингиз билан ҳам тушунмайдиган сўзларни айтсангизлар, одамлар нима деганингизни қандай билиб оладилар? Сизлар ҳавога гапирган бўласизлар. ¹⁰ Мана, дунёда қанча ҳар хил сўзлар бор, аммо уларнинг биронтаси ҳам маъносиз эмас. ¹¹ Шунинг учун агар сўзларнинг маъносини тушунмасам, унда мен гапираётган киши учун бегона юртликман ва гапираётган киши ҳам мен учун бегона юртликдир. ¹² Худди шундай, сизлар ҳам руҳий инъомлар учун рашк қилаётиб, Жамоатни барпо қилиш учун улар билан бойишга ҳаракат қилинглар. ¹³ Шунингдек, номаълум тилда гапирувчи талқин қилиш учун ибодат қилсин. ¹⁴ Агар мен номаълум тилда ибодат қилсам, руҳим ибодат қилади, онгим эса ҳосилсиз қолади. ¹⁵ Унда нима қилсам экан? Руҳим билан ибодат қиламан, онгим билан ҳам ибодат қиламан. Руҳим билан қўшиқ айтаман, онгим билан ҳам қўшиқ айтаман. ¹⁶ Хуллас, агар сен руҳинг билан дуо ўқийдиган бўлсанг, ўша ерда турган оддий одам сенинг миннатдорчилигингга қандай қилиб “омин” дейди? У сенинг нима айтаётганингни тушунмайди-ку! ¹⁷ Сен яхши миннатдорчилик билдиряпсан, аммо бошқа одам барпо қилинмаяпти. ¹⁸ Худойимдан миннатдорманки, мен номаълум тилларда ҳаммаларингиздан кўпроқ гапираман. ¹⁹ Жамоатда эса номаълум тилда ўн минг сўз гапиргандан кўра, бошқаларга насиҳат қилиш учун ўз онгим билан бешта сўз айтганим афзалроқдир. ²⁰ Биродарларим, онгингизда болалар каби бўлманглар, ёвузликка нисбатан гўдаклар каби бўлинглар, онгингизда эса вояга етганлар каби бўлинглар. ²¹ Қонунда ёзилган: “Бошқа тиллар ва бошқа оғизлар билан бу халққа гапираман, лекин ўшанда ҳам Мени тингламайдилар,- дейди Раббий”. ²² Шундай қилиб, номаълум тиллар имонлилар учун эмас, балки имонсизлар учун аломатдир. Пайғамбарчилик эса имонсизлар учун эмас, имонлилар учундир. ²³ Агар бутун Жамоат бир ерда тўпланиб, ҳамма номаълум тилларда гапира бошласа ва оддий одамлар ёки имонсизлар у ерга кирса, унда: “Сизлар ақлдан озибсизлар”,- деб айтмайдиларми? ²⁴ Лекин ҳамма пайғамбарчилик қилаётган бўлса, ва имонсиз ёки оддий бир одам кирса, шунда у ҳамма томонидан фош қилинади ва ҳамма томонидан ҳукм қилинади. ²⁵ Шундай қилиб, унинг юрагидаги сирлар ошкора бўлади. У юз тубан йиқилиб, Худога сажда қилиб: “Ҳақиқатан ҳам Худо сизлар билан”,- деб айтади. ²⁶ Шунинг учун, эй, биродарлар, нима қилсак экан? Сизлар тўпланганингизда, ҳар бирингизда бирор қўшиқ борми ёки таълимот, ёки тил борми, ёки ваҳий, ёки бирор талқин қилиш борми – буларнинг ҳаммаси Жамоатни барпо қилиш учун бўлсин. ²⁷ Агар ким номаълум тилда гапирса, унда икки ёки энг кўпи уч киши навбат билан гапирсин, бир киши эса талқин қилсин. ²⁸ Агарда талқин қилувчи бўлмаса, Жамоатда жим туриб, ўзига ва Худога гапирсин. ²⁹ Пайғамбарчилик қилувчилардан ҳам икки ёки уч киши гапирсин, қолганлар эса муҳокама қилсинлар. ³⁰ Агар ўтирганларнинг бошқасига ваҳий келса, унда биринчиси жим турсин. ³¹ Чунки ҳамма таълим олиши ва юпаниши учун ҳаммангиз бирин-кетин пайғамбарчилик қилишингиз мумкин. ³² Пайғамбарчилик руҳлари эса пайғамбарчилик қилувчиларга бўйсунадилар. ³³ Чунки Худо тартибсизлик Худоси эмас, балки тинчлик Худосидир. Муқаддасларнинг ҳамма Жамоатларида тартиб шундайдир. ³⁴ Хотинларингиз Жамоатда жим турсинлар, чунки уларнинг гапиришларига ижозат берилмаган, лекин Қонун айтганидек, итоатда бўлсинлар. ³⁵ Агар улар бирор нарсани ўрганишни хоҳласалар, уйда ўз эрларидан бу ҳақида сўрасинлар, чунки хотинга Жамоатда гапириш уятдир. ³⁶ Ахир Худонинг Сўзи сиздан чиққанми? Ёки ёлғиз сизларга етиб борганми? ³⁷ Агар сизлардан кимдир ўзини пайғамбар ёки руҳий киши, деб ҳисобласа, ўша киши менинг сизларга нималарни ёзаётганимни билиб олсин, чунки бу Раббийнинг амрларидир. ³⁸ Аммо ким буни англамаса, унда англамай қўя қолсин. ³⁹ Шундай қилиб, биродарларим, пайғамбарчилик қилиш учун рашқ қилинглар, номаълум тилларда ҳам гапиришни тақиқламанглар. ⁴⁰ Ҳамма нарса одоб ва тартиб билан қилинсин.