MA ME ATSAIK TE MACH'A LEK YA AWILIKE. ¹ Jkermanotak, ma me tsabiluk nax awu'unik te mach'a lek ya awilike, melel te ja'exe ay me xch'uunjel awot'anik ta swenta te Jkajwaltik Jesucristoe, te ja ay yutsilal stukele. ² Teme ay mach'a ya x-och bael te banti tsobolexe, te slapoj k'oel lekil sk'u'-spak' sok teme slapoj ch'ojk'owil te pasbil ta oroe, janix jich teme och bael tul winik te me'bae sok teme slapoj k'oel sk'u'-spak' te mayuk stulale, ³ teme janax bajt' ta awot'anik yilel te mach'a lek slapoj te sk'u'-spak'e, sok teme jich ya awalbeye: "Wokoluk, najk'anaba le' in to, ta bay lekil naktibal," jauk me to teme jich ya awalbey te me'ba winike: "Te ja'ate, baan tejk'anaba lum to o naklan ta lum," ⁴ ¿ma ba yakatikix ta slikel mulil abi, sok ma ba yakukatikix k'atbujel ta chajp'anwanej ta swenta te ma lekil snopjibal awu'unike? ⁵ Aya awaiyik stojol, jkermanotak te k'uxex ta jkot'ane, ¿ma ba jauk tsabilik yu'un Dios te me'baetik te leik ta balumilal to te ja k'ulej ya xk'otik yu'un te xch'uunjel yot'anike sok te ja ya yich'ik pajel chawej te beluk k'axel albil yu'un te Dios te mach'a sk'anojike? ⁶ ¡Jauk me to te ja'exe la awileyikix te me'baetike! ¿Ma ba jauk te k'ulejetik te ya yak'beyik swokolik sok ma ba jaukik te ya yik'ik bael ta bay te chajp'anwanejetike? ⁷ ¿Ma ba jauk te k'ulejetik te ya sbol k'opteyik te yutsil sbiil te Jkajwaltik te mach'a ik'otikix yu'une? ⁸ Jauk me to teme ya ach'uun spasel te lekil mantalil te ts'ibubil ta sjun te Diose: "K'UX ME YA AWAIY TE APAT AXUJK' JICH TE BIT'IL K'UX YA AWAIY ABAE," lek te jich ya apase. ⁹ Jauk me to teme tsabil nax awu'un te mach'a lek ya awile, yakat me ta spasel mulil abi, ja yakatik stael amulik te la ak'axintesbeyik te smantal te Diose. ¹⁰ ¡Te mach'a ya xch'uun spisil te mantalil yu'un te Diose, jauk me to teme la xk'axintey junuk te mantalile, la me xk'axintey spisil abi ! ¹¹ Janix stukel te Dios te jich la yale: "MA ME AWAIY MULWEJ," sok jich la yal xan: "MA ME AWAIY MILAW." Teme ma ba la awaiy mulweje, jauk me to teme la awaiy milawe, la me ak'axinteyix spisil te mantalil yu'un te Dios abi. ¹² Jich yu'un, k'opojan me ta lek sok ch'uuna me spasel te beluk leke, jich te bit'il te mach'atik nopol ya x-ich'otik ta k'op yu'un te mantalil yu'un te kolele. ¹³ Melel te mach'a mayuk yutsil yot'an ta stojol te yermanoe jich me mayuk yutsil ot'anil ya stauk te k'alal ya yich' ich'el ta k'ope. ¡Yan te mach'a ay yutsil yot'an ta stojol te yermanoe ya me yaiy tsalaw te k'alal ya yich' ich'el ta k'ope! ¹⁴ ¿Ja ba lekilal to, jkermanotak, teme ay mach'a ya yal te ay xch'uunjel yot'ane, jauk me to teme mayuk yat'elule? ¿ya ba xju' ya xkol yu'un te xch'uunjel yot'ane? ¹⁵ Teme ay tul jkermanotik winik o jkermanatik ants te ay swokol yu'un te mayuk sk'u'- spak' sok mayuk swe'el ta jujun k'aale, ¹⁶ teme ay mach'a jich ya yalbeye: "Lamal me k'inal ya xbaat, lapame a k'u', k'ixneame aba sok we'-uch'ajan me," jauk me to teme ma la awak'bey te beluk ya xtuun yu'un te sbak'etale, ¿ay ba stuul ya xk'ot abi ? ¹⁷ Janix jich te xch'uunjel ot'anile, teme mayuk te yat'elule, lajem abi. ¹⁸ Jich yu'un teme ay mach'a jich ya yale: "Te ja'ate ay xch'uunjel awot'an yan te jo'one ay jkat'el. "Ak'bon jkil te xch'uunjel awot'an te mayuk yat'elule, te jo'one ya jkak'bat awil te xch'uunjel jkot'an ta swenta te jkat'ele. ¹⁹ Te ja'exe ja ach'uunejik te junax te Diose; lek ay te bit'il ach'uunejike. Jauk me to janix jich xch'uunejik uuk te pukujetike sok ya xnijk' yot'anik yu'un. ²⁰ ¿Yu'un ba ya ak'an ana' stojol, winik te mayuk snopjibal awu'une, te ma xtuun te xch'uunjel ot'anil teme mayuk yat'elule? ²¹ ¿Ma ba jauk toj ilot yu'un Dios ta swenta yat'el te jtatik Abraham, te k'alal la yak' ta skajtijib majt'anil te Isaac te ja tul snich'ane? ²² La awil te bit'il te xch'uunjel yot'an te Abrahame, te la yak' ta ilel ta yat'el sok ta swenta xch'uunjel yot'an la sta te beluk sk'anoj ta yot'ane. ²³ Te beluk ts'ibubil ta sjun te Diose k'ot ta pasel te k'alal jich ya yal: "TE ABRAHAM LA XCH'UUNBEY SK'OP TE DIOSE, JICH LA YICH' ALBEYEL SK'OPLAL TE TOJ STUKELE." Te Abrahame ja la yich' albeyel te ja' sjoy sba sok te Diose. ²⁴ La awilikix te ja'exe, ta skaj te yat'el te tul winik te toj la yich' ilel yu'un te Diose, ma jauk nax yu'un te xch'uunjel yot'ane. ²⁵ Janix jich, ¿ma ba jauk te mulawil ants te Rahab sbiile, te toj la yich' ilel yu'un te Diose, ta swenta te yat'ele, te k'alal la yik' ochel te tsajtaywanejetik sok te la stikun bael ta yan bee? ²⁶ Melel jich te bit'il te bak'et te mayuk s-espíritue, lajem k'oem abi, janix jich uuk te xch'uunjel ot'anile teme mayuk yat'elule, lajem k'oem abi.