TE LOTIL BIJUP'TESWANEJETIK SOK TE LOTIL ALWANEJETIK. ¹ Ay me lotil alwanejetik te talik ta jlumaltike sok ay me lotil bijup'teswanejetik te ya xtal ta atojolike. Ya me yich'ik tel muken k'op te ya xjinwane sok ya me smukik ta yot'anik te Kajwaltik te mach'a la yich'ik manel yu'une. Ja me yakik yich'el tel ta ora te sjinjibal skuxlejalike. ² Bayal me ya st'unik te beluk k'exlaltik sbae, ja ta swentaik te ya xbolob sk'oplal te lek yach'il k'ope. ³ Ta swenta sbik'tal yot'anik yakik ta k'ulinajel, ya me xlo'leywanik ta swenta lotil k'opetik. Jich yu'un ma ba ya xjalaj xan te bin ora ya yich'ik ak'el ta k'abal; ma xjalaj te bin ora ya yich'ik tikunel bael ta lajele. ⁴ Melel te Diose ma la yak'bey perdón te ch'ul abatetik te la staik smulike. Ja la xch'oj tel koel ta bay k'atinbak jich chukulik ta kadenaetik ta bay ijk'al k'inal, le' yak ta smaliyel a te k'alal ya sta yorail te ich'el ta k'ope. ⁵ Sok ma la spasbey perdón te namey ants-winiketik ta balumilale. Te k'alal la yak' taluk te pulemal ta stojolik te mach'atik k'axintey mantaletik, janax la yich' koltayel te Noé sok te juktule. ⁶ Te Diose la yak' tanubuk te lum Sodoma sok te Gomorra, la yich' jinel ta k'axel, swenta yu'un la yak'botik jkiltik te bit'il ya xk'otik te mach'atik k'axinte mantaliletike. ⁷ Jauk me to la yich' koltayeltel lok'el te Lot te toj stukele melel bayal la smel yot'an yu'un te mach'atik ma la xch'uunik te mantale, sok te k'exlaltik nax sba te beluk la spasike. ⁸ Melel te Lote toj ta winikil, te kuxin ta jujun k'aal sok te mach'atik ma lek te yat'elike, bayal la smel-yot'an yu'un te la yiltiley sok la yaiy stojol te beluk k'axel amen la spasike. ⁹ Te Kajwaltike ya sna' te bit'il ya skoltay lok'el te mach'atik jun yot'anik te k'alal ya xtal te yiljibal yot'anike, sok te mach'atik ma tojok te yat'elike ya me yich'ik kastigo te k'alal ya yich'ik ich'el ta k'ope. ¹⁰ Ja in to ja me smelelil k'op te k'axel ya me yich'ik kastigo te mach'atik yakalik ta spasel te beluk ya smulan te sbak'etalike sok teme ma ya yich'ik ta muk' te mach'a wolwanej yu'unike. Ma xiwik ta spasel te beluk ma lekuke sok ya spasik te beluk ya smulan te sbak'etalike. Ma ya xiwik yu'un te ya sbolk'optayik te mach'atik toyol sk'oplalik ta ch'ulchane. ¹¹ Te ch'ul abatetike bayal me xan yipik sok bayal yu'elik, jauk me to ma ba ya sbolk'opteyik te Kajwaltike. ¹² Jai ants-winiketik to ja pajalik sok te chambalametik te ma sna'ik k'inale, janax kuxulik yu'un te ya yich'ik tsakele sok te ya yich'ik milele. Ma ya sna'ik te beluk ya sbolk'opteyike. Jauk me to ya me yich'ik jinel. ¹³ Ja me ya yich'ik te stojol te beluk ma lekuk la spasike. Ja ya skuyik te mero lek ayik teme la spasik ta sakil k'inal te beluk mulanbil sba yu'unike. Ja pajalik k'oem sok te beluk ch'alubene sok te beluk bolobene. Ja ya smulanik spasel te lot te k'alal ya sjuinex ta spasel te k'ine. ¹⁴ Te sitike nojel ta mulil te k'alal ya yilik te antsetike; mayuk bin ora te ya xlujbik ta spasel te mulile. Ja ya smonik te mach'atik pek'el yot'anik ta spasel te beluk ma lekuke, sok ay ta yot'anik te bik'tal ot'anile. ¡Nich'aniletik yu'un te beluk k'axel amene! ¹⁵ La yijk'tayikix jilel te lekil bee. Jowejemix sok ja la st'unikix te sbe te Balaame, te snich'an te Beor, te ja la smulan te la yich' tojel ta swenta te beluk ma toj ta pasele. ¹⁶ Jauk me to la yich' komel ta swenta te beluk amen la spase. Ay kojt' burro te uma'e, te jich k'opoj te bit'il winike. Jich la skom te alwanej te jowejem sjole. ¹⁷ Te ants-winiketik to jichik te bit'il slok'ib ja' te mayuk yalele. Jichik te bit'il tokal te ya xlikotik bael yu'un te ik'e. Chapalix sk'oplalik te ya x-ochik ta bay ijk'al k'inale. ¹⁸ Ya xk'opojik ta toybajel k'op, ya me smonik te ants-winiketik ta swenta te beluk mulanbil sba yu'un te sbak'etalike. Janix jich ya me smonik te ants-winiketik te mach'atik lok'elik to nax tel ta spasel te beluk ma lekuke. ¹⁹ Ya me yalik te ya xkolik tel lok'ele, jauk me to chukbilik me uuk yu'un te beluk malekuke. Melel te tul winike, esclavoinbil me yu'un te beluk ya yich' tsalel yu'une. ²⁰ Te mach'a la yijk'teyikix te beluk amen ta pasel ta balumilal ta swenta te la sna'bey sbaikix te Kajwaltik Jesucristoe, te ja koltaywanej jku'untike. Jauk me to te me lo'layotik xan ta spasel te beluk amene, k'axem to me jich ya xbolobik te bit'il sneelal toe. ²¹ Ja lekuk te manchuk la sna'beyik sba te tojil bee, teme ta patil ya yijk'tayik te lekil mantalil te ak'bile. ²² Jai ts'ibubil k'op to ja smelelil ta stojol te mach'atik jich ya spase: ''Te ts'ie ya sujt' ta banti te xee, sok te chitame ya me sujt' bael ta bay te ajch'ale.