¹ Muze te Yesu hasemuka mu Mbeteleme chihunda cha mu Yundeya ha matangwa ja mwanangana Helonde , akwa kutanga malunga akatukile kuchivumbo ahetele mu Yelusaleme nyi kwamba ngwo , '' ² kuli ali yono mwanalunga wasemuka wa Ayunda ? Twamona katongonoshi ku chivumbuko keshika tweza mukumuwahila .'' ³ Muze mwanangana Helonde achivwile , walipikalile , nyi a Y elusaleme eswe hamwe nenyi . ⁴ Helonde mwakungulwile asasendote akwa kulutwe eswe nyi akwa kusonyeka ja atu , nyi yiye yahula ayo , '''kuli Kilishitu masemukina?'' ⁵ yamba kuli iye , 'mu Mbeteleme chihunda chamu Yundeya , mumu hi chinasonewa kulya pulofeta , ⁶ 'Nyi yena , Mbeteleme , chifuchi Yunda , hi uli mukepe ko hakachi ka akwa kuyula ja Yunda , mumu muli yena kumakatutuka mukwa kuyula , iye makafunga atu jami mu A-Izalele.''' ⁷ Hohene Helonde watambikile akwa mana ku tenga wahulile shimbu lize lutongonoshi wasolokele. ⁸ watumine ku Mbeteleme , ngwenyi , '' Yenu nyiku mufupa yono mwana . Muze munumuwana , nukeze nukangwmbulwile hanga nyi yami nawa ngukaye ngukamuwahile '' ⁹ Muze hevwa mwanangana , ayile mujila yo , nyi lutongonoshi yoze amwene kuchivumbuko watetekelele ndo yaheta nyi kumana haze hanakapwa mwana . ¹⁰ Muze amwene lutongonoshi , awahililile nyi uwahililo unene. ¹¹ Anjilile mu zuwo ya mona mwe mwana hamwe nyi naye Maliya . Alyumbile nyi kumuwahila . no nyikupakula upite wo amulambwile yawana ya olu, nyi limbano , nyi mika . ¹² Zambi ya lweza muchiloto kuhona ku palika kuli Helonde , akatukile kuya kuchifuchi cho mujila yeka. ¹³ Muze haya , mungelo wa mwene yasoloka kuli Yosefwe mu chiloto ngwenyi , '' katuka , utwale mwe mwana nyi naye , uchinyine ku Engitu. Ukapwe ndo mungukakwambulwila , mumu Helonde mafupa mwe mwana kumwenyeka''. ¹⁴ Uze ufuku Yosefwe watwalile mwe mwana nyi naye yaya nyiku Engitu. ¹⁵ Wapwileko ndo kufwa cha Helonde . Hanga chika manunuke chize ahanjikile mwene kupalikila muli pulofeta , '' Mu Engitu natambikile mwanami.'' ¹⁶ Hohene , Helonde , muze amwene ngwe akwa mana hamukekuna wevwile chikolo ufwatulo. Mba watumine akashihe ana malunga eswe mu Mbeteleme nyi manjiza jacho eswe chize ku myaka yali nyi waze kanda aheta ku myaka yali , nyi kulita nyi wola akwa mana ejile nyi kumulweza. ¹⁷ Hohene chamanunukine chize ahanjikile ku kanwa lya pulofeta Yelemiya , ' ¹⁸ ''liji alivwile mu Lama, kulila nyi kunenganya chinene, Lakela kana lilila anenyi , Iye wakanyine nyi ku muholesa , mumu kechi kamona nawa.'' ¹⁹ Muze te Helonde hafwa , kumanyina , mungelo wamwene yasoloka, kuli Yosefwe mu chilota mu Engitu ngwenyi , ²⁰ ''katuka utwale mwe mwana nyi naye uye ku chifuchi cha Izalele , mumu hanafu waze afupile kwenyeka mwono wamwe mwana,'' ²¹ Yosefwe ya katuka , yatwala mwana nyi naye , nyi kuheta ku chifuchi cha Izalele. ²² Alyoze muze evwile ngwo Akeleu kanakayula mu Yundeya kusalakana tato Helonde , wevwile woma kuyako . Neye te Zambi hamutoweza mu chilota , wayile kweka ku yihunda ya Ngalileya . ²³ Wahetele watwamine ku limbo analivuluka ngwo Nazale . Hanga chikamanunuke chize ahanjikile ku makanwa ja a pulofeta , ngwo kumakamuvuluka ngwo ka- Nazale.