¹ Yehova yamba kuli Mose ngwenyi , ² " Hanjika kuli atu ja Yizalele nyi kwamba ngwe , ' Nyi umwe malakenya chilakenyo kuli Yehova , akafwete nyi kulita nyi ndando jize makamutongwela . ³ Ndando munusela hali lunga chize kumyaka makumi aali amyaka ndo kumakumi a sambano amyaka muyipwa makumi atano ashekele ja palata , nyi kulita nyi shekele ya muma musandu . ⁴ Nyi mapwa pwo ndando mamusela makumi atatu ashekele . ⁵ Uli nyi myaka itano ndo kumyaka makumi aali ndando yenyi makumi atatu ashekele , hali mapwo kumi lya shekele . ⁶ Nyi mapwa nyikakweji umuwika ndo kumyaka itano ndando yalunga muyipwa shekele jitano ja palata , hali pwo shekele jitatu ja palata . ⁷ Nyi mahyana makumi a sambano amyaka lunga ndando yenyi kumi lya shekele nyi shekele jitano , hali pwo kumi lya shekele . ⁸ Nyi mutu mahona kuhetesa chilakenyo kwesekesa nyi ndando yize mamusela , akatwale mwe mutu kuli sasendote , hanga akamusele ndando kwesekesa nyi kuhona chenyi . ⁹ Keshika nyi kwe chimuna malakenya mutu kutwala kuli Yehova , yihanda yeswe yachimuna muyipwa yisandu . ¹⁰ Mutu kanda alumuna chipwe kusumbakenya chipema ha chipi , chipwe chipi ha chipema . Nyi ngwe ma chizako , chi muna umwe kuli mukwo , eswe nyi yoze achizeko mapwa asandu . ¹¹ Keshika , nyingwe chimuna alakenyenga mutu kuli Yehova waluchisa , Yehova kechi kumutambula , mwe mutu akatwale chimuna kuli sasendote . ¹² Sasendote makamusela ndando , kulita nyi upi wenyi . Ndando yeswayo makamusel asasendote ye nayo . ¹³ Alyoze mwenya chimuna nyi makazanga kunukula , akawezeleko yihanda yitano ku ndando yenyi . ¹⁴ Nyi ngwe mutu masela zuwo lyenyi lisandu kuli Yehova , sasendote masela ndando nyikulita nyi upeme walyo hanji nyi upi walyo . Ndando makalisela sasendote , yenayo muyikapwa . ¹⁵ Mba nyi mwenya zuwo mazanga kwikula , akawezeko chihanda cha ndando ku ndando , mba mulikapwa nyi lyenyi . ¹⁶ Nyi umwe masela chihanda chachihinga chenyi , ndando yacho muyikapwa kulita nyi mbuto yacho - homele yimuwika ya sevanda munusela ndando yamakumi atano ashekele ja palata . ¹⁷ Nyi hasela munda wenyi chize kumwaka wa uwahililo , ndando yacho nwasele . ¹⁸ Alyoze nyi masela munda wenyi kulutwe lya mwaka wa uwahililo , sasendote akalule ndando yawo kulita nyi myaka yasalako ndo ku mwaka wa uwahililo , nyi ndando yawo nukatepulule . ¹⁹ Nyi ngwe mwenya munda mazanga ku ukula , akaweze chihanda cha ndando ku ndando , mba mu upwa nyi wenyi . ²⁰ Nyi kakulile we munda , chipwe nyi haulanjisa ku mutu weka , kechi kaukula nawa . ²¹ Keshika , we munda , nyi maukula hatangwa lya uwahililo , muukapwa mwambu usandu kuli Yehova , ngwe mulambu uze hiunahu kulambula kuli Yehova . Makauzuka kuli sasendote . ²² Nyi ngwe mutu mahana chihanda chamunda , chize kuchakundamine ku mavu ja usoko , ²³ sasendote akalule ndando yakuheta ndo kumwaka wa uwahililo , mwe mutu akafwete ndando hatangwa lize ngwe chawana chisandu ku meso ja Yehova . ²⁴ Ha mwaka wa uwahililo , munda muukahiluka kuli yoze waulanjishile , yoze wauzukile . ²⁵ Ndando yize munukasa yikalite nyi shekele ya muma musandu , makumi aali angela makafwika shekele umuwika . ²⁶ Nyi umwe kanda akahana kapula -jimo wa chimuna , mumu kapula- jimo kapwa wambala wa Yehova ; chipwe wa ngombe chipwe wapanga , wambala wa Yehova . ²⁷ Nyi ngwe chimuna mapwa waluchisa , mwenye ye akamulande handando ize hamusela , akawezeko chihanda cha ndando ku ndando . Nyi chimuna kamukulile , akamulanjise handando ize mamusela . ²⁸ Nyichimwe chuma mutu makatumbika kumeso ja Yehova , ku yuma yeswe mapwa nayo , chipwe mutu chipwe mutu chipwe chimuna , chipwe munda wa usoko wenyi , muchikalanjishiwa chipwe kukukula . Yuma yeswe maka tumbika muyikapwa yisandu kumeso ja Yehova . ²⁹ Nyi umwe hamutumbikila shingo yakumwonwona hakachi ka atu kanda aka mukula . Yono mutu akamushihe . ³⁰ Chihanda chakumi cha ha mavu , chipwe chambuto ya mavu chipwe cha muhuko ya mutendo , yambala ya Yehova . ³¹ Nyi ngwe mutu makula chakuchihanda chenyi cha kumi , akawezeko chihanda cha ndando . ³² Chihanda chakumi cha ngombe chipwe cha mapanga , chimuna mweswe wakwalula kuli kafunga , wamuchikumi mapwa musandu kuli Yehova . ³³ Kafunga kanda akasakula hali mupema nyi mupi chimuna , chikwo nawa kanda akasumbakenya . Nyi masumbakenya , ka eswe makapwa asandu . Kechi kamukula . "' ³⁴ Jino je shimbi jize Yehova watuminyine ha mulundu wa Sinayi kuli Mose ja atu ja Yizalele .