¹ Yehova yamba kuli Mose ha mulundu wa Sinai , ngwenyi , ² " Hanjika kuli Izalele ngwo , ' Muze munuheta kuchifuchi chize ngunanwehe , nyi chifuchi chikapwe nyi kulama sambata ya Yehova . ³ Munulima minda yenu myaka yisambano , nyi ha myaka yisambano munululyeka mitondo yenu ya uva nikuhela mihako yayo . ⁴ Alyoze hamwaka wamuchishimbyali , sambata yikapwe uhwimino ulemu wachifuchi nwa telaku chilama , sambata ya Yehova . Kanda nulima minda yenu chipwe kululyeka mitondo yenu ya uva . ⁵ Kanda nukahela yize yalisokela , nawa kanda nuhela mbuto ya muzamba yize kanda alulyeka muminda yenu . Ukapwe mwaka ulemu wauhwimino mu chifuchi . ⁶ Yeswe yize muyikasoka mu minda yize kunwalimine hamwaka wasambata muyikapwa yakulya yenu . Yenu , nyi kuli ngamba jenu a malunga nyi mapwo , nyi kuli ngamba yoze watwama nyi yenu nukakunge kulya , ⁷ nyi yimuna yenu nyi tushitu a muchifuchi chenu akalye yeswe yize muyikasoka . ⁸ Alula masambata shimbyali mu mwaka , muyipwa ngwe , shimbyali ya myaka shimbyali , chekulinga ngwo mukapwe masambata shimbyali mu mwaka , muchilumbunuka ngwo makumi awana a myaka nyi myaka livwa . ⁹ Mba munutuma liji litavwi nyi tachi kweswe ha tangwa lyamuchikumi lya kakweji wamuchishimbyali . Ha tangwa lya kufuka shili munukatuma liji lya litavwi nyi tachi ndusu chifuchi chenu cheswe . ¹⁰ Uselenu mwaka wa makumi atano a Yehova nyi kwambujola utuswilo muchifuchi cheswe kuli enyacho . Muukapwa mwaka wa uwahililo kuli yenu , nyi upite nyi ndungo makahiluka kumunyachi wenyi . ¹¹ Mwaka wamakumi atano mukukapwa uwahililo kuli yenu . Kanda nukatumba minda yenu chipwe kuhela mbuto mukalye yeswe yize yalisokela , nyi kululyeka uva wa ku mitondo yize kuyishi kululyeka . ¹² Mumu mwaka wa uwahililo , keshika ukapwe usandu kuli yenu . Munukalya yalisokela mu minda . ¹³ Mutu mweswe nuhilwise ku upite wenyi ha mwaka wa uwahililo . ¹⁴ Nyi munulanjisa munda kuli usoko chipwe munulanda munda kuli usoko kanda nukalyonga chipwe kulinga chipi kuli umwe nyi muko . ¹⁵ Nyi munulanda munda kuli mwenyembo , chatamba kunyingika myaka yize hiyapalika nyi mihako yakulima ndo nyikuheta ha mwaka wa uwahililo . Nyi mwenyembo unalanjisa munda anyingike chocho neye . ¹⁶ Nyi myaka yinji yasala kuheta ha mwaka wa uwahililo mu wezako ndando ya munda , nyi myaka yasala yikehe nyikuheta ha mwaka wa kuwahilila nyi ndando mutepuluka , mumu yize macha mu munda wa yoze malanda muyilita nyi myaka shimbu mwaka wa kuwahilila kanda . ¹⁷ Kanda nulyonga , chipwe kuliluwisa umwe nyi mukwo ; alyoze , lemesenu Zambi wenu . Mumu nguli Yehova Zambi wenu . ¹⁸ Keshika munulinga kulita nyi yiyulo yami , fungenu shimbi jami , nyi kuyilinga . Chocho munukatwama kanawa muchifuchi . ¹⁹ Chifuchi muchikema mbuto yacho , nawa munukapwa nyi kulya nyi kukuta nyi kutwama kanawa . ²⁰ Nyi munwamba ngwenu , ' Yika mutukalya ha mwaka wa chishimbyali ? Talenu , twahashile kutumba mbuto nyi kukungulula yakulya yetu . " ²¹ Yami mungutuma kunuwahisa kwiza hali yenu ha mwaka wamuchisambano , chocho mukukema mbuto ya myaka yitatu . ²² Munukalima minda ha mwaka wa muchinake munukalya mihuko ya mwaka wa muchisambano nawa munukapwa nyi kulya cha mwaka kunyima nyi yize nunatuluka . Ndo kucha cha mwaka muchilivwa , munukalya kuli yize nwatulikile myaka yakunyima . ²³ Kanda nulanjisa chifuchi chenu kuli weka , mumu chifuchi hichami . Enu eswe nuli yilambala nyi myaka yenu yikehe ha chifuchi chami . ²⁴ Mukataliliza atu kuhilwisa nawa minda jo yize walanjile ; nukataliliza nawa kulandulwisa minda kuchisemuko kuze nwalanjile . ²⁵ Nyi mukwenu muka Izalele mapwa chiswale nyi ha chino malanjisa chihanda chimuwika cha upite wenyi , mba usoko wenyi ali hakamwihi akeze nyi kumuukula yize mukwo hanalanjisa . ²⁶ Nyi mutu kechi nyi usoko wa kuumukula upite wenyi , mba nyi hapwa nyi pichi nyi mbongo ja kulikulila . ²⁷ Alule myaka yapalikaho kufuma ha shimbu alanjishilileho munda wenyi nyi kuhilwishila mbongo kuli yoze walanjile . Nahase kuhiluka ku upite wenyi . ²⁸ Alyoze nyi kechi nyi upite wa kuukula munda wenyi mwene , munda muhukapwa wayoze mwene walanjile ndo nyi kuheta ha mwaka wa kuwahilila . Ha mwaka wakuwahilila , munda makamuhilwishila mwene yoze walajishile . Nyi uoite muhukahiluka kuli mwene mutangu . ²⁹ Nyi mutu malanjisa zuwo lya kujikinyina mu limbo , mahasa kuli kula ndo mwaka wa muwundu kufuma haze ayilanjishilile . Ha mwaka wa muwundu mapwa nyi tachi ja kuukula . ³⁰ Nyi zuwo kahashile kuli kula ndo nyi mwaka hiwahwa , nyi zuwo lya kujikilila limbo mulipwa upite wa yoze walilanjile nyi chisemukochenyi . Kechi kalitusula ha mwaka wa uwahililo . ³¹ Alyoze mazuwo a mu yihunda yize kuyishi yipanga yajinguluka kali ngwe minda ya chifuchi . Mahasa kwakula , chiko nawa akahilwise ha mwaka wa kuwahilila . ³² Alyoze , ma zuwo ja Alevi ali mu membo jo mahasa kwakula kala shimbu . ³³ Nyi umwe hali Alevi mahona kukula zuwo lize alanjishile , mba zuwo lize alanjishile mu limbo chatamba kuli hilwisa ha mwaka wa kuwahilila , mumu mazuwo ja Alevi mu membo jo we upite wo hakachi ka atu a Izalelele . ³⁴ Alyoze minda yize yili hakamwihi nyi mazuwo jo kanda akalanjisa mumu wapwa upite wo wa mutolo kuli Alevi . ³⁵ Nyi mukwenu muka limbo malumuka chiswale kahashile kulikwasa yiye mwene , munumukwasa ngwe chize mwakukwasa a njize chipwe ngwe mutu wakweka uli hakachi kenu . ³⁶ Kanda umufwetesa mbwezo nyiyimwe chipwe kupichila hali yiye , alyoze vwila woma Zambi mukulinga chocho usoko we matwama nyiyena . ³⁷ Kanda numwaha mbongo ha mbwezo , chipwe kumulanjisa ya kulya mumu wa mbongo . ³⁸ Yami Yehova Zambi wenu , wa nuchijile muchifuchi cha Engitu , kulinga ngwami ngunwehe chifuchi cha Kanana , nawa ngupwe Zambi wenu . ³⁹ Nyi mukwenu malumuka chiswale nyikulilanjisa yiye mwene kuli yena , kanda wumuzachisa ngwe kapinji . ⁴⁰ Akapwe kuli yena ngwe ngamba wa fweto . Apwe ngwe mutu unatwame shimbu yikehe nyi yena. Makakuzachila ndo nyi mwaka wakuwahilila . ⁴¹ Mba makakatuka kuli yena , yiye nyi ana jenyi hamuwika , kumakaya kuli akwa munyachi wenyi nyi ku upite wa tato . ⁴² Mumu o tuvumbi twami waze nachijile mu chifuchi cha Engitu . Kechi kulanjishiwa ngwe ndungo . ⁴³ Kanda nwayula nyi ukalu , mba nwaha vumbi kuli Zambi wenu . ⁴⁴ Mba kuli ndungo jenu a malunga nyi a mapwo , waze nwakufumisa kumavungu ali hakamwihi nyi yenu nukalande ndungo kuli wayo . ⁴⁵ Munahasa nawa kulanda ndungo kuli a njize waze atwama nyi yenu , waze asemukila muchifuchi chenu , anahase kupwa upite wenu . ⁴⁶ Munuhasa kwaswanyisa nyi ana jenu ali nyiyenu, kukwachilila ngwe upite , nyi kwalinga ndungo a mutolo , mba kanda nuyula akwenu nyi ukalu hali atu ja Izalele nyi utenu . ⁴⁷ Nyi njize chipwe atu waze nwa twamano ha shimbu yikehe mapwa nyi upite , mba umwe mukwenu mukwa Izalele hapwa chiswale nyi kulilanjisa yiye mwene kuli yoze njize , chipwe kumunyachi wa yoze njize , ⁴⁸ muze mukwenu mukwa yisalele hamulanda , munuhasa kumulanda nawa . Umwe muchisemuka chenyi mahasa kumukula yiye . ⁴⁹ Chipwe natu , chipwe musonyenyi , mamukula , chipwe umwe wamunyachi wenyi . Chipwe , nyi hapwa pichi malikula yiye mwene . ⁵⁰ Aka livwashane nyi yoze mutu wamulanjile ; akalule myaka haze alilanjishile yiye mwene kuli yoze wamulanjile nyi myaka yasalako kuheta ha kumutusula muyipwa nyi kulita mbongo akufweta ngamba wafweto , nyi ha myaka makamuzachila yoze wamulanjile . ⁵¹ Nyi myaka kuyili yinji nyi kuheta hamwaka wakuwahilila , mahilwisa ndando yinalite ngwe yizeyene myaka . ⁵² Nyi kwasala myaka yikehe kuheta ha mwaka wakuwahilila , chocho akalitese nyi yoze wamulanjile , kulita nyi myaka yasalako shimbukanda nuheta ha mwaka wakuwahilila , mahasa kufweta mbongo ja kuli kula kukawula myaka . ⁵³ Munukamuyula ngwe ngamba nwatwama nenyi ha mwaka nyi mwaka kanda numuyula nyi ukalu . ⁵⁴ Nyi kamukulile chocho , yiye makazata ndo nyi mwaka wa uwahililo , yiye nyi ana jenyi . ⁵⁵ Kuli yami atu ja Izalele a ngamba .Ngamba jami nachijile mu chifuchi cha Engitu . Nguli Yehova Zambi wenu .