¹ Yehova yamba kuli Mose , ngwenyi , ² '' Hanjika ku mbunga yeswe ya atu ja Izalele wambe kuli ayo ngwe , lipwisenu asandu , mumu ami Yehova Zambi yenu nguli musandu . ³ Mweswe alemese naye nyi tato , nawa nukafunge ma sambata jami . Yami Yehova Zambi yenu . ⁴ Kanda nwa lumukina kutupwonya amokomoko , chipwe kuli lingila tu zambi ku ikungo . Yami Yehova yenu . ⁵ Muze mulambula chitapo cha mulambu wa sambikila kuli Yehova , nuka chilambule hanga aka nutambule . ⁶ Akachilye tangwa lyo lyene lya ku chilambula , chipwe tangwa lya mu chali . Nyi chimwe mu chisala ndo tangwa lya muchitatu , aka choche ku kahya . ⁷ Nyi cheswe machilya ha tangwa lya mu chitatu , chili kulya chaluchisa ; kanda aka chitambula , ⁸ nyi mweswe yoze machilya makambata uhenge wenyi mumu hajilulula chuma chisandu cha Yehova , nyi mutu wacho aka muhandunune ha kachi ka atu jenyi . ⁹ Nyi hiwengula mbuto ya wande we , kanda ukengula mambango a wande we , chipwe ku kungulula mbuto ye yeswe ya mu wande . ¹⁰ Kanda nukahela uva yenu ya mu wande , chipwe ku kungulula uva ize hiya holokela hashi mu wande wenu . Nu kaisele iswale nyi njize . Yami Yehova Zambi Yenu . ¹¹ Kanda ukeya kanda ukalyonga mahuza . Kanda nu hanjika mahuza umwe kuli mukwo . ¹² Kanda nukalishinga mahuza ha jina lyami nyi kusaula jina lya Zambi yenu . Yenu Yehova . ¹³ Kanda umwesa lamba mwenyembo we chipwe ku mwiyila . Fweto ya ngamba kanda itwama nyi yena ufuku weswe ndo chimene . ¹⁴ Kanda nu shinga kafwa matwi chipwe kusa chi talingiso kulutwe lya kapuputa . Alyoze , nukevwile woma Zambi Yenu . Yami Yehova . ¹⁵ Kanda nulinga upatwilo wa mahuza . Kanda nulinga katonde kuli umwe mumu chiswale , nawa kanda nulinga katonde mumu iye mulemu . Alyoze , munu kapatwila mwenyembo we mu ululi . ¹⁶ Kanda wendangana nyi kutwala saki ha kachi ka atu je , alyoze fupa kufunga mwono wa mwenyembo we . Yami Yehova . ¹⁷ Kanda upwila kole mukwenu mu mbunge ye . unatela mu umwene mwene kutenukina mwenyembo we hanga kanda akapwa nyi chihanda ha shili mumu wa iye . ¹⁸ Kanda uka hilwisa upi chipwe nyi ka kucha hali mweswawo wa atu jenu , alyoze zanga mwenyembo we ngwe yena mwena . Yami Yehova . ¹⁹ Nuka funge shimbi jami . Kanda nukataiza imuna yenu kusema nyi vungu lyeka lya imuna . Kanda nu chinga mbuto jaali muze munu tumba wande wenu . Kanda nu zala mazalo akulinga ku mahina ali aku chinga . ²⁰ Mweswe yoze mapomba nyi mwana pwo kapinji yoze hatenda kuli lunga , alyoze kanda achi mukula hanji kumutusula , aka mukanyamise . Kanda nukashiha mumu pwo katusukile . ²¹ Lunga akanehe mulambu wa uhye kuli Yehova ku chikolo cha mbalaka ya chiwanyino - kuja panga kupwa mulambu wa uhye . ²² Mba sasendote mafuka mulonga wenyi nyi kuja panga ha mulambu wa uhye kuli Yehova , ha shili yize hahinga . Mba shili ize halinga maikonekena . ²³ Muze mununjila mu chifuchi mba hi nwa tumba mutondo yeka nyi yeka ya kuhya , mihuko yayo muikapwa ngwe ya kujilika kuilya . Mihuko , mwikapwa ya kujilika kuli yenu ha myaka itatu . ²⁴ Mba mu mwaka wa muchiwana mihuko yeswe mwikapwa isandu , mulambu wa uhaliso kuli Yehova . ²⁵ Mu mwaka wa mu chitano munuhasa kulya ye mihuko , hinwashimbwila hanga mitondo yikeme cha kulumbama . Yami Yehova Zambi yenu . ²⁶ Kanda nukalya yifwo nyi imwe ichili nyi manyinga yayo . Kanda nuka hula ma shipilitu ha yuma ya kulutwe , nawa kanda nufupa kutetekela akwenu mu tachi ja milima . ²⁷ Kanda nuka kelula kambu jenu ha mbalangwe chipwe kuteula masongo ja wevu wenu . ²⁸ Kanda nu kaliteta ha mijimba yenu mumu wa afu chipwe kulisa chato ha mujimba we . yami Yehova . ²⁹ Kanda uka visa sonyi mwane wa pwo ha kumupwisa chikoi , kuchina chifuchi cheswe muchilimbukila mu ukoi mba chifuchi cheswe muchikazala nyi ungulungulu . ³⁰ Fungenu sambata jami lemesa zuwo lyami lisandu . Yami Yehova . ³¹ Kanda nuya kuli waze akuhanjika nyi afu chipwe ma shipilitu . Kanda nwa fupa , kuchina manupihisa . Yami Yehova Zambi yenu . ³² Uka katuke hali mukwa kambu jitoma nyi ku vumbika ku pwaho cha kashinakaji . Ukevwile Zambi woma . Yami Yehova . ³³ Nyi njize katwama hamwe nyi yenu mu chifuchi chenu , kanda numulinga nyi umwe upi . ³⁴ Njize yoze watwama hakachi kenu aka pwe kuli yenu ngwe kasemukinyine mu Izalele yoze watwama hakachi kenu , nawa nuka muzange ngwe ye nwene , mumu nwa pwile njize mu Engitu yami Yehova Zambi yenu . ³⁵ Kanda nu patula nyi uhenge muze munutala usuhe , kulema , chipwe unji . ³⁶ Nuka zachise mbalansa ja ululi , nyi pezu ja ululi , nyi efa ja ululi , nyi hine ja ululi . Yami Yehova Zambi yenu , yoze wanuchijile mu chifuchi cha Engitu . ³⁷ Nuka funge yiyulo yami yesswe nyi shimbi jami jeswe , nyi kuihinga . Yami Yehova . "'