¹ Echenu aze eswe ali mu ndungo akanyonge myata jo ene akwa kutela ulemu weswe . Akalinge chino hanga jina lya Zambi nyi ulongeso akahone kuyi shililika . ² Ndungo eswe ali nyi myata jo akwa kufukyela aka hone kwasolwela kuhona jumbi mumu hapwa mandumbu . Alyoze, shinaho akaalinge. Mumu waze atela ku azachila chikolo aku kwashiwa mumulimo yo hanafulyela nyi kwazanga. Longeshi yino yuma nyi kuyishinjila. ³ Kachi umwe malongesa longeso lyeka nyi keshi kutayiza kumaliji angunu aze a mwene wetu Yesu Kilishitu nyi kulongesa lize lya kulita nyi uwayilo, ⁴ kanalifuzu nyi kanyingikine nyichimwe . Alyoze kanahazwoka hakutwala ku yihula nyi kuhangujola cha maliji angunu kwenako kwa kukatuka lufwachinda , vunda , kutukana yishinginyeka ya wungulungula, ⁵ nyi kumbalanga cha atu api mu kunyonga cho. Haana tokesa umwene mwene nyi kunyonga ngwo uwayilo una jila yakufumbwilamo mbongo. Sona jimwe jikulu jinaseko kulemesa , {lihandunune ku atu ngwe wano.} Alyoze mu mikanda yingunu yamyaka ayi kuyishimo. ⁶ Alyoze uwayilo hamwe nyi kuyuka che kufumbuka chinene, ⁷ mumu kutwaka nehene nyi chimwe hano hashi , mba chipwe kutwaka hashile kuchizamo nyi chimwe. ⁸ Alyoze nyi , tuli nyi ya kulya nyi uzalo chatutamba kuyuka nayo ⁹ Alyoze waze wazanga kupwa pichi maalimbuka mu cheseko, mumu heto makaholokela mu usolo uunji wa kuhulana nyi wakulemeka kuze kuwaku shimbamisa , atu mu kwenyeka nyi mukwonona. ¹⁰ Mumu chipululu cha mbongo chikota cha yipi yeswe . Atu amwe anajifwila hana pyangula ku ufulyelo nyi hanali tuwu nyi yikola inji. ¹¹ Alyoze yena mutu wa Zambi china yino yuma . ukaule ululi , mwayilo , ufulyelo , zango , utunu, nyi kushimbika . ¹² Litachike kulitachika chipema cha ufulyelo . Kwata ku mwono wa mutolo uze akutambikilile , nyi yena wataijile kutayiza chipema kumeso ja yela anji. ¹³ Shimbi nguna kweha kumeso ja Zambi , yoze wakuhana mwono ku yuma yeswe , nyi ja Kilishit Yesu , yoze kumeso ja Ponteu Pilatu, washindakenyenye shindakenyo yipema , ¹⁴ ukafunge liji lya shimbi kulishi chipeka cheswe kapalya , ndo ku usolokelo wa mwene wetu Yesu Kilishitu. ¹⁵ Zambi maka lweza Kilishitu kusoloka ha shimbu lipema - Zambi, - yoze wapwa mukwa kuyula wa kuwaha kanda umuwika mwe mwana wa mwanangana wa myanangana mwe Mwene wa ene. ¹⁶ Iye wika keshi kufwa nyi katwama mu pangu . lize keshi kuhasa kumumona ka . Ulemu nyi ndundo ja mutolo jikapwe kuli iye . Amen, ¹⁷ Kanjisa waze apwa pichi ha mwakono kanda alengumuka chipwe kanda atalatala ha upite , wa ujilijili. Alyoze , hali Zambi ya mwono . Yoze wakutwaha yuma yeswe ya kulumbama hanga tukawaha nayo. ¹⁸ Alyoze akalinge yipema , akapwe pichi mu yitanga yipema yalumbama nyi akapwe akakunyengumuna akwa kulyanyina. ¹⁹ Muchino ma akalitulikila ene chakuputukilaho chipema ha myaka yize muyizaho , hanga aka kwata mwono uze wapwa mwono wamwenemwene. ²⁰ Timoteu , funga chize aku kunjikile . ukalikondolole ku kumbambula cha mokomoko , cha ujiluke nyi kulimika cha yinyingi yize anavuluka chocho nyi mahuza. ²¹ Atu amwe se hana yitaiza haana pyasuka ha kutwala ku ufulyelo . Vumbi likapwe hamwe nyi yenu.