¹ Gbékumuagbéa Yésu do lé aho ké mé élé fia nua léa yi va nanyi dé apu to. ² Améha dé gbé va pohlan doé yi éyi va nɔanyi dé étɔhun dé mé yi améawoya nɔ apua to. ³ Tétéa Yésu gblɔ énya sugbɔ niwo lé élododomé. Egblɔ bé: "Ebodéla dé yi bé bé yéado énuku. ⁴ Gakémé élé do énukuawoa édéwo gé jé émɔ ji. Hénviwo va yi fɔ wo tsé du. ⁵ Enukudéwo gé jé ékpéwoji toho ké éké n'léwoa. Tétéa omiɔ dobé anyigba n'yi o, ⁶ vɔa ké dɔkusu doa oku kéwunkéwun dobé ékén n'lé gɔmé niwo, yi opu. ⁷ Enuku buwo gé dé awunja mé. Awunjawo otsin yi bla énukuawo. ⁸ Enuku déwo ya ogédé anyigba nyɔɛ tɔa ji, yi omiɔ, tsi yi tsé éku, édéwo tsén alafa dika yi édéwo bladé yi édéwo blatɔ. ⁹ Améké éto sénu lé isia né sénu." ¹⁰ Enusrɔnlawo va igbɔ yi lé biɔ bé: "lémɔyi élého nu ni améha lé élododomé yi?" ¹¹ Yésu do yinti nuwo bé: "miawo yi émɔnu kpɔkpɔ léna bé mianyé énuké jipo fiaduhoa nyi vɔa owun niwo émɔnukpɔkpɔ kia o. ¹² Dobé améké si éléa ola nɛ kpé, tsagbé nénɔ yisi sugbɔ. Vɔa améké si n'léwoa, ola hɔ vidé ké lé yisia ji. ¹³ Enukumua n'ti n'tsɔ élododo tsé fia nuwo, dobé n'tɔ tsan né olé kpɔ nua, owun lé kpɔɛ lé nyatoho mé o, yi né olé sé énua, owun lé sé lé nyatoho mé o yi owun ja sé n'dékpékpé gɔmé o. ¹⁴ Enya kia wu énya ké énya gblɔdila Yésaya ho énya gblɔdinu bé: "milé sé nya vɔa miwun lé sé igɔmé, miakpɔnu vɔa mima jési énuké mikpɔawo. ¹⁵ Dobé wɔaho édukɔ kia ho ji tri n'tɔ yi wɔaho towo tsan tri n'tɔ yi omiɔna n'kuvi dé énukéwo okpɔa ji, alo otuna wɔaho étowo bé wɔasénu gɔmé yi trɔ jiméwo yi madagbé lé wɔa n'tiwo. ¹⁶ Oyra miaho n'kuviwo dobéna olé kpɔnu, kudo miaho étowo dobé olésénu. ¹⁷ Lé nyatoho méa, n'lé gblɔɛ ni mi bé, ényagblɔdila sugbɔ kudo améjɔjɔɛwo oji bé yiwo lakpɔ énukéwo milékpɔa, vɔa owun kpɔɛwo, yi oji bé wɔasé énuké milé séa vɔa owun té sé o. ¹⁸ Misé énukudola dé ho élododo. ¹⁹ Né inyi bé amédé sé jipofiaduhoa ho élododo yi n'sé igɔmé oa, la ila nyi bé fianfi lava yi éla fin énuké édo lé yiho éjiméa. Ekia yi nyi énuku ké gédé émɔ jia. ²⁰ Enuku kéwo gé dé ékpé nyigbajia, yi nyi améké séna énya yi wɔnɛsé zidika kudo jijɔ, ²¹ yi inyi bé ékén n'lé wɔasiwoa yi wɔna gapopo vidé ko yi tsrɔna. Né inyi bé éfukpékpé kudo éyomé titi va do la wɔaho hɔsé nu tsina zidika. ²² Ekéwo gé awunjawo méa wɔawo yi nyi amékéwo séna énya vɔa éhihémé ho éfuwo blanawo yi owun té tséna éku nyɔɛdé owun tséna éku o. ²³ Ekéwo géna dé anyigba nyɔɛ tɔa jia, wɔawo yi nyi amékéwo séna énya yi séna yigɔmé; yi nyi améké tséna éku lé nyatoho méa, yi kplɔna amé alafa dika, bladén kudo blatɔ va na jipofiaduhoa mé. ²⁴ Yésu gbé do élo bu niwo bé: "Jipofiaduhoa sɔ kudo ébodéla ké do énuku nyɔɛwo dé yiho ébomé. ²⁵ Yi gakémé améwo lé danlɔn a, éfutɔ vayi éboamé yi do énuku badawo tsé tsaka énuké édoa yi étso yi yi. ²⁶ Yi ké énukuawo miɔ yi otsén ékua, tétéa égbé badawo tsan zélé imé. ²⁷ Eboajikpɔlawo va éboatɔ gbɔ yi va lé biɔ bé: "Apétɔ, alo n'nyi énuku nyɔɛ yi odo lé éboaméa? Ganɛ yi égbé ku bada kiawo tso yi? ²⁸ Tétéa édo yinti nuwo bé: "ékiawo nyi éfutɔ ho nuwɔna." Yi subɔlawo gbé lé biɔ bé: "alo miayi miahu égbéawo tsé dangbéa? ²⁹ Ebotoa do yinti bé: "O, né inyi bé miahu égbé badawoa ila nyi bé mila hu énuku nyɔɛ tsa dangbé. ³⁰ Mitatiwo né ji dé édu kaka ni gakémé énukuawo la tsi yi ola dé wo. Gakémé oladéwoa, matonu amékéwo la déa bé: "midé égbé badawo yi miabɔwo dé tého dika tsagbé miaté tɔzowo, yi mia bɔ énuku nyɔɛwo dé tého dika lé ava ji." ³¹ Tétéa Yésu gbé tsɔ élododo bu tsé va wɔaho n'kumé lé gblɔ bé: "Jipofiaduhoa sɔ kudo afiti ho ku tsétsé ké n'tsu dé tsɔ yi doé yiho ébomé. ³² Ké inyi ati vitɔa wu lé atiawo méa, né inyi bé étsia ényi na ati gan lé atiawo mé yi héviwo va wɔna atɛn do imé yi gbɔnajɔɛ. ³³ Yésu gbé gblɔ énya bu niwo to élododo mé lé gblɔ bé: "Jipofiaduhoa di nyɔnu ké lé wɔ kpɔnɔ. Eku kpɔnɔ ho wɔa jijénu amétɔ yi tsɔ isi dé imé yi bluwo dé édu va do gakémé éma ho lé yidoké si." ³⁴ Yésu lé fianu améha to élo dodomé. N'lé gblɔ énya dé niwo né n'nyi to élododomé o. ³⁵ Elé léké tsagbé énya ké ényagblɔdila gblɔɛ dɛ bé: "Mahonu tso élododo mé yi madé énuwlawla kéwo lé tso kaka gɔmé jéjéa tsé fia. ³⁶ Ké Yésu nya améha jo vɔa, étrɔ yi ahomé. Tétéa énusrɔnlawo va igbɔ yi lé gblɔnɛ bé: "dé élododo ké odo tso bafo boa kudo égbé bada n'ti ni mi." ³⁷ Edo yinti nuwo bé améké do nu nyɔɛ yi nyi amégbétɔ ho vi. ³⁸ Eboa yi lé nyi éhihéa, yi énuku nyɔɛwo yi nyi amékéwo lé jipo fiaduhoa méa, yi égbéku badawo yi nyi jimahɔsétɔwo. ³⁹ Yi futɔ ké do égbé bada lé éboaméa yi nyi abusam, ébomé nu dédé ho gamé yi nyi éhihéa ho nuwuwu. Yi énuku délawo yi nyi Mawudɔlawo. ⁴⁰ Nɛnɛ yi olabɔ égbén badawo dé tého dika yi ola tɔzowo, néné ké yi éla nɔ lé éhihéa ho nuwuwu. ⁴¹ Amégbétɔ ho vi la dɔ yiho dɔlawo va éhihé mé yi ola po amé badawo kudo ola dé énuvɔnwo ji, ⁴² yi wɔatsɔwo dan'gbé dé ézo wɔadan gandé mé, guwun yi avi fanfan kudé adokli dudu la nɔ. ⁴³ Fifia amé jɔjɔɛwo la lé bi sigbé dɔkusu lé tatanyé ho fiaduhoa mé. Améké éto sénu lé isia né sénu." ⁴⁴ Jipo fiaduhoa sɔ kudo késinɔnu dé ké wlɔa lé éboméa. N'tsu dé kpɔɛ yi tsɔɛ tsé wla. Eji jɔɛ n'tɔ yi étsɔ énukéwo lé yisia tsé sa yi va plé éboa. ⁴⁵ Nɛnɛ ké yi jipo fiaduhoa gbé sɔ kudo jonusala ké lé ji jonu nyɔɛwo bé yéaplé. ⁴⁶ Né inyi bé ékpɔ jonu ké hɔ asia, élatsɔ yiho nuwo kpata tsé sa yi va plé jonua. ⁴⁷ Jipo fiaduhoa sɔ kudo akpavi lé kusa ké akpavi léla da dé apumé yi lé akpavi pomévi dékpékpé, kéwo hian kudo kéwo owunhian wɔa. Né inyi bé akpavi lékutan dɔa, akpavi lélawo dɔnɛ do dé apua godo. ⁴⁸ Tsoyi ijia, onɔnanyi yi bɔna akpavi nyɔɛwo dé kusin mé, vɔa otsɔna kéwo n'nyɔwoa tsé kɔgbé. ⁴⁹ Nɛnɛ yi éhihéa ho énuwuwu lanɔ. Mawudɔlawo lava toho ké Mawu drɔna vɔnu améwo léa bé wɔama amévɔɛnwo kudo nyɔɛwo domé. ⁵⁰ Wɔatsɔ amébadawo tso dangbé dé ézomavɔ mé, toho ké avifanfan kudo adokli dudu léa. ⁵¹ Misé énukéawo kpata gɔméa?" Enusrɔnlawo lé do yinti nɛ bé: ⁵² "ɛŋ, misé wɔagɔmé." Yi Yésu lé tonuwobé: "yinti éséfiala dékpékpé ké ofia nui tso jipo fiaduho n'tia lé sigbé Apétɔ dé ké do aho yi dé késinɔnu yéyé kudo hoho lé imé." ⁵³ Eké Yésu gblɔ énya kéawo kpata vɔa, étso lé guwun. ⁵⁴ Tsé yijia Yésu trɔyi wɔaho édumé yi va lé fianu lé wɔaho tsɔtsihɔmé. Amékéwo lé do toéa, éwɔ nukunu niwo yi olé gblɔ bé: "ganɛ yi amékia hɔ énunyanya kudo nukunuwɔwɔ kiawo lé? ⁵⁵ Alo n'tsu kia n'yi yi nyi kapita ho via? Alo n'nyi Maria yi nyi énɔa? Yakobo, Yosɛf, Simon kudo Yuda wo wun nyi nɔviawo n'tsuwoa? ⁵⁶ Yi nɔviawo nyɔnuwo owun lé miadomé lé gɛkéwoa? Fifia ganɛ ji yi ékpɔ énukéa kpata tso yi?" ⁵⁷ Tétéa opkɔ bé yéwo wɔ nuvɔn lé yinti, vɔa Yésu lé tonuwo bé: "n'nyi yi n'tɔ ho édumé alo ahomé yi omu do bubu ényagblɔdila n'ti lé o." ⁵⁸ Enukum n'ti yi n'wɔ nukunu sugbɔ lé guwun, dobé wɔaho éjimahɔsé n'ti.